តំបន់អាស៊ីខាងត្បូង ខ្យល់ព្យុះមូសុង បានធ្វើឲ្យមនុស្សរាប់រយនាក់ស្លាប់ចាប់តាំងពីខែមិថុនា
មនុស្សប្រមាណ ៦៥០នាក់ បានស្លាប់ នៅប្រទេសឥណ្ឌា ប៉ាគីស្ថាន និងនេប៉ាល់ ដោយសារភ្លៀងលាយខ្យល់ព្យុះ។
យោងតាមទិន្នន័យផ្លូវការកាលពីថ្ងៃទី១៣ ខែសីហា បានឲ្យដឹងថា ភ្លៀងលាយខ្យល់ព្យុះ បាន សម្លាប់មនុស្សរាប់រយនាក់ចាប់តាំងពីខែមិថុនា នៅតំបន់អាស៊ីខាងត្បូង ដែលទឹកជំនន់ និងការបាក់ដីនៅរដូវខ្យល់មូសុងនេះ បានបង្កការខូចខាតជាទូទៅ។ មនុស្សប្រមាណ ៦៥០នាក់ បានស្លាប់នៅប្រទេសឥណ្ឌា ប៉ាគីស្ថាន និងនេប៉ាល់។
សេវាកម្មឧតុនិយមឥណ្ឌា បានចេញសេចក្តីព្រមាន នៅសប្តាហ៍នេះ សម្រាប់ខ្យល់ព្យុះ ជាសំខាន់កើតមាននៅរដ្ឋភាគខាងត្បូង និងរដ្ឋភាគឥសាន។ មន្រ្តីនៅស្រុក ស្ហ៊ីខា រ៉ាណា បានប្រាប់ឲ្យដឹងថា កាលពីថ្ងៃអង្គារ អ្នកជួយសង្រ្គោះបានស្វែងរុករកមនុស្ស ២នាក់ ដែលបានបាត់ខ្លួន បន្ទាប់ពីមានការកើនឡើងនូវទឹកជំនន់ភ្លាមៗ ដែលបានសម្លាប់មនុស្ស ៩នាក់ នៅក្នុងស្រុកអ៊ុយណា នៅក្នុងរដ្ឋអ៊ីម៉ាស្ហ៉ាល់ ប្រាដេស។
យោងតាមសាក្សីនៅក្នុងរដ្ឋអ៊ុតតា ប្រាដេស ភាគខាងជើង បានឲ្យដឹងថា យានយន្តមួយគ្រឿងត្រូវបានចរន្តទឹកហូរនាំយកទៅ។ យ៉ាងហោចណាស់មានមនុស្ស ១៧នាក់ បានស្លាប់នៅក្នុងទឹកជំនន់ចាប់តាំងពីសប្តាហ៍មុន។ នៅភាគខាងលិច តំបន់វាលលំហនៃរដ្ឋរ៉ាចាសឋាន ស្ថិតនៅក្នុងទឹក។ បើយោងតាមអាជ្ញាធរតំបន់ បានឲ្យដឹងថា មនុស្សយ៉ាងតិច ២២នាក់ បានបាត់បង់ជីវិតតាំងពីថ្ងៃអាទិត្យ។
យោងតាមតួលេខដែលបានប្រកាសដោយអាជ្ញាធរតំបន់ បានឲ្យដឹងថា នៅក្នុងភាគខាងជើងនៃប្រទេសឥណ្ឌា នៅក្នុងរដ្ឋអ៊ុយតារ៉ាខាន ក៏រងផលប៉ះពាល់ផងដែរដោយទឹកជំនន់ ដែលបានសម្លាប់មនុស្សយ៉ាងហោចណាស់ ៥១នាក់ តាំងពីខែមិថុនា។ ហើយនៅក្នុងខែកក្កដា មនុស្សជាង ២០០នាក់ បានស្លាប់នៅក្នុងរដ្ឋភាគខាងត្បូង ខេរ៉ាឡា នៅខណៈដែលការបាក់ដីបានវាយប្រហារភូមិជាច្រើន រួមទាំងចំការតែ។
កាលពីខែឧសភា និងមិថុនា ប្រទេសឥណ្ឌា ក៏បានទទួលរងរួចហើយនូវរលកកម្តៅដ៏ខ្លាំងក្លា រហូតសីតុណ្ហភាពឡើងដល់ 49,2°C ដែលត្រូវបានវាស់វែងឃើញក្នុងរដ្ឋធានីញូ ដេលលី។ គ្រោះមហន្តរាយធម្មជាតិដែលពាក់ព័ន្ធនឹងឧតុនិយមកើតឡើងជាញឹកញាប់នៅរដូវនេះ និងលាតសន្ធឹងពីខែមិថុនា ដល់ខែកញ្ញា។ យោងតាមអ្នកជំនាញ ការប្រែប្រួលអាកាសធាតុ បង្កើនឡើងនូវកម្រិតភាពញឹកញាប់ និងភាពធ្ងន់ធ្ងរផងដែរ។
ឥណ្ឌាគឺជាប្រទេសទី៣ ដែលបំភាយឧស្ម័នផ្ទះកញ្ចក់ដ៏ច្រើនសំខាន់។ ប្រទេសនេះ ក៏បានតាំងចិត្តធ្វើឲ្យសម្រេចនូវការបំភាយកាបូនសូន្យពីពេលនេះទៅដល់ឆ្នាំ២០៧០ ឬពីរទសវត្សក្រោយប្រទេសឧស្សាហកម្មភាគច្រើនៃលោកខាងលិច។
យោងតាមអាជ្ញាធរទទួលបន្ទុកគ្រោះមហន្តរាយធម្មជាតិ បានឲ្យដឹងថា នៅប្រទេសប៉ាគីស្ថានជិតខាង រដូវខ្យល់មូសុង បានសម្លាប់មនុស្ស ១៧៨នាក់ ដែលមាន ៩២នាក់ គឺជាកុមារ ចាប់តាំងពីការមកដល់នូវភ្លៀងខែកក្កដា នៅក្នុងប្រទេស។
យោងតាមអាជ្ញាធរទទួលបន្ទុកមហន្តរាយធម្មជាតិក្នុងប្រទេស បានឲ្យដឹងថា ប្រទេសនេប៉ាល់មានមនុស្ស ១៧១នាក់ បានស្លាប់ ចាប់តាំងពីការចាប់ផ្តើមនូវរដូវខ្យល់មូសុង កាលពីពាក់កណ្តាលខែមិថុនា ក្នុងនោះ មនុស្ស ១០៩នាក់ បានស្លាប់ដោយសារការរអិលបាក់ដី។ មនុស្សជាង ៤០នាក់ បានបាត់ខ្លួន និងយ៉ាងហោចណាស់ប្រជាជន ២០០នាក់ បានរងរបួស។
នៅក្នុងស្រុក ជីតវ៉ាន់ ភាគកណ្តាល រថយន្តពីរគ្រឿងត្រូវបានទឹកនាំយកទៅក្នុងស្ទឹងកាលពីពាក់កណ្តាលខែកក្កដា បន្ទាប់ពីបានឆ្លងកាត់ពីលើរនាំងសន្តិសុខបេតុង នៅពេលមានការរអិលបាក់ដី។ ហើយគ្រោះថ្នាក់នេះ ក៏បានសម្លាប់មនុស្សប្រមាណ ៥០នាក់ ផងដែរ។
Daily Program
