អត្ថាធិប្បាយគម្ពីរដំណឹងល្អ ថ្ងៃទី០៧ ខែមីនា ឆ្នាំ២០២៤

(លូកា ១១,១៤-២៣ )រិះគិតព្រះបន្ទូលដោយ លោកបូជាចារ្យ អេមេល្សដាល ហ្វ្រង់ស័រ

អត្ថបទដំណឹងល្អនៅថ្ងៃនេះព្រះយេស៊ូដេញខ្មោចចេញពីមនុស្សម្នាក់ ហើយភ្លាមៗ​នោះ​ពួកខាងគណៈផារ៉ាស៊ីជំទាស់ គេថាព្រះយេស៊ូដេញខ្មោចដោយសារព្រះអង្គបាន​ទទួលអំណា​ច​ពីស្តេចខ្មោច តាមពិតគ្មានហេតុគ្មានផលទេ គឺដោយពួកគេមិនព្រមទទួល​ព្រះយេស៊ូ​តែ​ប៉ុណ្ណឹង។ ខ្ញុំឆ្ងល់រឿងមួយពេលព្រះយេស៊ូមានព្រះបន្ទូលថា ព្រះរាជ្យរបស់ព្រះជាម្ចាស់​យាង​មក​ដល់ហើយគង់នៅជាមួយអ្នករាល់គ្នា ព្រះរាជ្យរបស់ព្រះជាម្ចាស់គឺព្រះយេស៊ូនឹងហើយ ព្រះយេស៊ូគឺជាព្រះរាជ្យរបស់ព្រះជាម្ចាស់ ព្រះយេស៊ូគឺជាសេចក្តីស្រឡាញ់ ជាធម៌មេត្តាករុណា ជាយុត្តិធម៌របស់ព្រះជាម្ចាស់ ដែលសព្វថ្ងៃព្រះអង្គនៅជាមួយយើង។

តើយើងចង់ទទួលព្រះរាជ្យនេះ? តើយើងចង់ឱ្យសង្គមរបស់យើង​ពេញ​ដោយ​សេចក្តី​ស្រឡាញ់ ធម៌មេត្តាករុណា និងយុត្តិធម៌? បើយើងចង់បាន ហេតុនេះ សុំឱ្យព្រះយេស៊ូ កសាងព្រះរាជ្យរបស់ព្រះជាម្ចាស់នៅក្នុង​ព្រះសហគមន៍របស់ព្រះអង្គ  ​តាម​រយៈ​កិច្ច​ការ​ល្អ​ទាំង​ប៉ុន្មាន​ដែលយើងប្រព្រឹត្ត គឺយើងជួយឱ្យព្រះរាជ្យរបស់ព្រះ​ជាម្ចាស់គង់នៅ​ជាមួយយើង។

ចំណុចទីពីរគឺព្រះយេស៊ូមានព្រះបន្ទូលអំពីម្នាក់ដែលខ្លាំងពូកែអាចយកអាវុធចូលទៅក្នុងចិត្តរបស់យើងនោះគឺមារ​ ឲ្យតែបងប្អូនភ្លេចខ្លួនមារ​នឹងចូលនៅក្នុងខ្លួនយើង ដើម្បី​ឱ្យ​យើង​ចាញ់​ការល្បួង ត្បិតវាចង់បំផ្លាញយើង។

ដូច្នេះនៅរដូវត្រណមនេះ យើងត្រូវតែប្រុងស្មារតីជានិច្ចគឺមើលចិត្ត​គំនិតរបស់​យើង​កុំ​ឱ្យ​ប្រពឹត្តអំពើបាប កុំឱ្យយើងចាញ់ការល្បួង រាល់ពេលដែលយើងចាញ់ការល្បួង យើងធ្វើតាម​មារ ​ជីវិតរបស់យើងវិនាសអន្តរាយ។ សូមឱ្យយើងប្រុងស្មារតី ហើយចាប់អារម្មណ៍​ពី​ទី​សម្គាល់នៃវត្តមានរបស់ព្រះយេស៊ូនៅក្នុងជីវិតរបស់យើង៕ អាម៉ែន!

វាយអត្ថបទ​ដោយ សេង លក្ខិណា