អត្ថាធិប្បាយគម្ពីរដំណឹងល្អថ្ងៃទី១៧ ខែវិច្ឆិកាឆ្នាំ២០២៣

អត្ថាធិប្បាយគម្ពីរដំណឹងល្អថ្ងៃទី១៧ ខែវិច្ឆិកាឆ្នាំ២០២៣ តាមលូកា ១៧,២៦-៣៧​អត្ថា​ធិប្បាយ​ដោយលោកបូជា​ចារ្យ​ផាន បូរី

នៅក្នុងអត្ថបទព្រះគម្ពីរដំណឹងល្អនៅក្នុងថ្ងៃនេះ ព្រះយេស៊ូមានព្រះបន្ទូលក្រើនរំលឹក​យើង​ជាគ្រីស្តបរិស័ទ យើងជាមនុស្សឱ្យយើងចេះកែប្រែចិត្តគំនិត យល់ព្រមកែប្រែចិត្ត​គំនិត​ពី​ទង្វើ​មិន​ល្អ​មក​ជា​ទង្វើល្អ ពីទង្វើដែលពោរពេញដោយហិង្សាមកជាទង្វើ​សន្តិភាព ពីទង្វើដែលមិនចេះចែករំលែកមកជាទង្វើចិត្តមេត្តាករុណាធម៌វិញ ហេតុនេះ​ព្រះយេស៊ូចង់ឱ្យមនុស្សអាក្រក់កែប្រែចិត្តគំនិត ឧទាហរណ៏ថា ចង់ឱ្យមនុស្សដែល​ញាណស្រាឈប់ផឹកស្រា ពីមនុស្សដែលញាណបារីឈប់ជក់បារី ឱ្យមនុស្សដែលចូល​ចិត្ត​លេង​ល្បែងឈប់លេងល្បែងឬអ្នកញាណថ្នាំឈប់ញាណថ្នាំ។ អ្វីដែលព្រះយេស៊ូ​ចង់មានព្រះបន្ទូលនៅថ្ងៃនេះ គឺចង់មនុស្សកែប្រែចិត្តគំនិតដោយសាររបៀបរស់នៅ​ក្នុង​សង្គមរបស់យើងនាំឱ្យស្មុគស្មាញ នាំឱ្យរញ៉េរញ៉ៃ ហេតុនេះព្រះយេស៊ូមានព្រះបន្ទូល ថា នៅគ្រាបុត្រមនុស្សយាងមកក៏ដូចនៅសម័យលោក ណូអេ​ ដែរ កាលនោះមនុស្ស​ម្នា​គិតតែស៊ីផឹក រៀបការប្ដីប្រពន្ធរហូតដល់ថ្ងៃលោកណូអេ ចូលក្នុងទូកសំពៅធំមួយ ទឹកជំនន់ឡើងលិចបំផ្លាញមនុស្សទាំងអស់។

បងប្អូនជាទីស្រលាញ់ បងប្អូនជាទីគោរពរាប់អាន ប្រសិនបើបងប្អូនអានអត្ថបទនេះ​រហូតដល់ខាងក្រោម នោះយើងនឹងឃើញមានរឿងផ្សេងៗទៀត នេះខ្ញុំលើកតែ​ឧទាហរណ៍ខ្លីមួយនេះដើម្បីឱ្យមនុស្សយើងជាអ្នកមានបាប មនុស្សយើងដែលមានចិត្ត​លោភលន់ មនុស្សយើងមានចិត្តតណ្ហា ចេះកែប្រែចិត្តគំនិតរបស់ខ្លួនដើម្បីទទួលការ​សង្គ្រោះដូចយើងធ្លាប់លឺព្រះគម្ពីរមួយថា​ ​« ចូរអ្នករាល់គ្នាងើបមើលទៅលើពីព្រោះ​ព្រះជាម្ចាស់ជិតរំដោះអ្នករាលើគ្នាហើយ » ប្រសិនយើងចង់ឱ្យព្រះជាម្ចាស់រំដោះយើង ទាំងរូបកាយ ទាំងព្រលឹងវិញ្ញាណ យើងត្រូវការកែប្រែចិត្តគំនិត។ ប្រសិន​បើ​យើង​ចង់​ទទួលការសង្គ្រោះ យើងត្រូវកែប្រែចិត្តគំនិតពីគំនិតមិនល្អ  ពីគំនិតអវិជ្ជមានមកជា​គំនិតល្អ​​ឬ​ជាគំនិតវិជ្ជ​មាន ពីចិត្តដែលជាអាត្មានិយមមកឱ្យយើងមានចិត្តទូលំទូលាយ​ជាមួយអ្នកដទៃ ជាមួយអ្នកជិតខាងរបស់យើង​។ ហេតុនេះព្រះយេស៊ូមានព្រះបន្ទូល​ទៀតថា អ្នកដែលខំរក្សាជីវិតរបស់ខ្លួននឹងត្រូវបាត់បង់ជីវិត រីឯអ្នកដែលបាត់បង់ជីវិត​នឹងទទួលបានជីវិតវិញ យើងពិតជាពិបាកស្ដាប់ សុទ្ធតែជារបៀបផ្ទុយ ប៉ុន្តែព្រះយេស៊ូ​ចង់​ឱ្យ​យើងកែប្រែចិត្តគំនិត ហើយនេះព្រះយេស៊ូបានលើកឡើងពីការស៊ីផឹក មនុស្ស​យើងជួនកាលញាណស្រា ជួនកាលយើងផឹកមួយកេះ ២កេះ មួយលីត្រ ២លីត្រ ផឹកច្រើនពេករហូតដល់បាត់បង់ស្មារតី ​បាត់បង់សតិសាមបញ្ញរហូតសល់ស្លាប់​ដោយ​សារ​តែចង់សប្បាយ ចង់ភ្លើតភ្លឺន ចង់ឱ្យមានភាពអ៊ូអរនៅក្នុងក្រុមគ្រួសារប៉ុន្តែភ្លេចគិត​ថា ​អ្វីទាំងអស់នេះនាំឱ្យខ្លួនវិនាសអន្តរាយ នាំឱ្យខ្លួនជួបបញ្ហា នាំឱ្យខ្លួនជួបឧបសគ្គ ការស៊ីផឹករបស់មនុស្ស។ ការរៀបការប្ដីប្រពន្ធ ប្រពន្ធមួយ ប្រពន្ធ២ ប្រពន្ធ៣ ប្ដីមួយ ប្ដី២ ប្ដី៣ មនុស្សរស់នៅដោយមានភាពច្របូកច្របល់ មិនប្រាកដប្រជា ហេតុ​នេះ​ហើយបានជាព្រះយេស៊ូ សូមឱ្យយើងកែប្រែចិត្តគំនិត ត្បិតព្រះរាជ្យរបស់ព្រះជាម្ចាស់​មក​ជិត​បង្កើយហើយ កែប្រែចិត្តគំនិតដើម្បីទទួលដំណឹងល្អ កែប្រែចិត្តគំនិតដើម្បី​ទទួល​ព្រះយេស៊ូ ដើម្បីកលា្យជាបុគ្គលល្អ ដើម្បីក្លាយជាមនុស្សល្អ យើងត្រូវកែប្រែចិត្ត​គំនិត រស់នៅឱ្យបានគាប់ប្រសើរ ឱ្យគាប់នឹងព្រះហឬទ័យរបស់ព្រះជាម្ចាស់។ ព្រះជាម្ចាស់ចង់ឱ្យមនុស្សទាំងអស់រស់នៅល្អ អត់មានអំពើបាបនឹងចេះយោគយល់គ្នា​ទៅវិញទៅមក ហេតុនេះសូមបងប្អូនជៀសវាងការហូបស្រាជ្រុលហួស សេពគប់ពួក​ម៉ាក​មិនល្អ ការប្រើប្រាស់គ្រឿងញៀន បងតូចបងធំ សូមបញ្ឈប់នឹងខិតខំប្រឹងប្រែងកែ​ប្រែចិត្ត រស់នៅឱ្យល្អ ហើយប្រសិនបើនបងប្អូនជាគ្រីស្តបរិស័ទ ចូរយកព្រះបន្ទូលរបស់​ព្រះយេស៊ូ​នេះទៅអនុវត្តក្នុងជីវិតប្រចាំថ្ងៃដើម្បីទទួលការសង្គ្រោះ។​អាម៉ែន៕