អត្ថាធិប្បាយគម្ពីរដំណឹងល្អថ្ងៃទី១៣ ខែតុលាឆ្នាំ២០២៣

អត្ថាធិប្បាយគម្ពីរដំណឹងល្អថ្ងៃទី១៣ ខែតុលាឆ្នាំ២០២៣ តាមលូកា ១១,១៥-២៦អត្ថាធិប្បាយដោយលោកបូជា​ចារ្យ​ផាន បូរី

អត្ថបទដំណឹងល្អនៅក្នុងថ្ងៃនេះ យើងបានឮថាពួកខាងគណៈផារ៉ាស៊ីបានចោទប្រកាន់ព្រះយេស៊ូ តើពួកគេបានចោទប្រកាន់ព្រះយេស៊ូអំពីរឿងអ្វី?

ពួកគេបានឃើញព្រះយេស៊ូបានបណ្តេញខ្មោចចេញពីមនុស្ស។ ពួកគណៈផារ៉ាស៊ីធ្វើអត់បាន ក៏ប៉ុន្តែព្រះយេស៊ូធ្វើបាន ហេតុនេះនាំឱ្យគេច្រណែនជាមួយនឹងព្រះយេស៊ូ មិនតែប៉ុណ្ណោះពួកគេបានចោទប្រកាន់ព្រះយេស៊ូថា ព្រះយេស៊ូអាចបណ្តេញខ្មោចបានចេញពីមនុស្សដោយសារពួកស្តេចខ្មោចបានប្រគល់អំណាចឱ្យព្រះយេស៊ូ។  

អ្វីដែលគេចោទប្រកាន់នេះ តើវាត្រឹមត្រូវដែរឬទេ?

ច្បាស់ហើយអត់ទេ!

ហេតុនេះហើយបានជាព្រះយេស៊ូព្រះអង្គមានព្រះបន្ទូលថា នគរណាក៏ដូចជានគរណាដែរ ប្រសិនបើពលរដ្ឋបែកបាក់ទាស់ទែងគ្នាឯង នគរនោះពិតជាវិនាស ហើយផ្ទះទាំងប៉ុន្មានមុខជាត្រូវរលំសង្កាត់លើគ្នាជាមិនខាន។ យ៉ាងណាវិញ ប្រសិនបើមារសតាំងទាស់ទែងគ្នាឯង​ ធ្វើម្តេចធ្វើឱ្យរាជ្យរបស់វានៅស្ថិតស្ថេរគង់វង្សបាន។

ព្រះយេស៊ូបានពន្យល់ពួកខាងគណៈផារ៉ាស៊ីឱ្យគេយល់ថា ព្រះអង្គមិនមែនជាស្តេចខ្មោចដូចគេគិតទេ ចឹងព្រះអង្គគឺជានរណា បានជាមានអំណាចដេញខ្មោចចេញពីមនុស្ស? ច្បាស់តាមជំនឿរបស់យើង ជាគ្រីស្តបរិស័ទ យើងជឿថាព្រះយេស៊ូគឺជាព្រះគ្រីស្ត​ ជាព្រះបបុត្រារបស់ព្រះជាម្ចាស់មួយរយភាគរយ ដែលមកពីព្រះជាម្ចាស់ ហើយទៅឯព្រះជាម្ចាស់វិញ ជាព្រះមេស្ស៊ីដែលគង់នៅជាមួយយើង ព្រះអង្គយាងមកដើម្បីបណ្តេញសេចក្តីអាក្រក់ចេញពីគំនិតរបស់មនុស្សយើង ចេញពីចិត្តរបស់មនុស្សយើង និងព្រះអង្គព្យាបាលអស់អ្នកដែលទន់ខ្សោយ អស់អ្នកដែលស្រេកឃ្លាន អស់អ្នកដែលចង់ធ្វើដំណើររួមជាមួយព្រះអង្គ។ ព្រះយេស៊ូមានព្រះបន្ទូលថា គ្រូពេទ្យមកត្រូវការព្យាបាលអ្នកជំងឺ អ្នកដែលអត់ឈឺមិន​ត្រូវការ​គ្រូពេទ្យទេ។

ព្រះយេស៊ូគឺជាព្រះសង្រ្គោះ ជាព្រះគ្រីស្ត ព្រះអង្គយាងមក នាំពន្លឺមកក្នុងពិភពលោក ដើម្បីឱ្យពិភពលោកមានសេចក្តីសុខសាន្តក្នុងការរស់នៅជាមួយគ្នា ក្នុងការប្រស្រ័យទាក់ទងគ្នា និងព្រះយេស៊ូឱ្យយើងមានអំណរសប្បាយ សុភមង្គលកប់ជ្រៅនៅក្នុងជីវិតគ្រីស្តបរិស័ទ និងរបស់មនុស្សទាំងឡាយ។

បងប្អូនជាទីស្រឡាញ់ បងប្អូនជាទីគោរពរាប់អាន! ពេលណាយើងជឿលើព្រះយេស៊ូ ពេលណាយើងទុកចិត្តលើព្រះយេស៊ូនាំឱ្យយើងចាកចេញពីទុក្ខកង្វល់ទាំងឡាយ ទោះបីយើងនៅតែខ្វាយខ្វល់ ក៏ប៉ុន្តែព្រះយេស៊ូនាំឱ្យយើងមានអំណរសប្បាយ ព្រះយេស៊ូនាំឱ្យយើងមានសុភមង្គល ព្រះយេស៊ូបណ្តេញសេចក្តីអាក្រក់ចេញពីចិត្តគំនិតរបស់យើង ព្រះយេស៊ូដេញសេចក្តីអាក្រក់ចេញពីរូបកាយរបស់យើង ព្រះយេស៊ូបានដេញខ្មោចចេញពីមនុស្សយើងម្នាក់ៗផងដែរ។

ខ្មោចដែលមនុស្សកំពុងតែមាន គឺជាខ្មោចដែលនាំឱ្យមនុស្សច្រណែនគ្នា ដូចពួកខាងគណៈផារ៉ាស៊ីដែលច្រណែនព្រះយេស៊ូ ឃើញព្រះយេស៊ូធ្វើអំពើល្អ គេអត់បានធ្វើអំពើល្អ ឃើញព្រះយេស៊ូមានអំណាចបណ្តេញខ្មោចគេអត់មានអំណាចបណ្តេញខ្មោច ហេតុអ្វីគេច្រណែនព្រះអង្គ។ មនុស្សយើងពេលខ្លះយើងច្រណែនគ្នា ពេលណាយើងច្រណែនគ្នា នាំឱ្យមានសង្គ្រាមកើតមានឡើងនៅក្នុងប្រទេស ឬនៅកន្លែងណាមួយ​។ ប្រសិនបើក្រុមគ្រួសារទាស់គ្នា ក្រុមគ្រួសារនោះអត់មានសុភមង្គលទេ។  បើប្រទេសណាមួយមានសង្គ្រាមកើតឡើង ប្រទេសនោះរស់នៅដោយមានភាពភ័យខ្លាច អត់មានសេរីភាព។ ហេតុនេះព្រះយេស៊ូយាងមក ព្រះអង្គបណ្តេញសេចក្តីអាក្រក់ទាំងនេះចេញ ហើយយកអ្វីដែលវិសុទ្ធ អ្វីដែលល្អ អ្វីដែលមកពីព្រះជាម្ចាស់ ដើម្បីឱ្យពិភពលោករស់នៅជាមួយគ្នាដោយមិនប្រកាន់គ្នា ដោយអត់មានការច្រណែនឈ្នានីសគ្នាទេ។ ហេតុនេះសុំឱ្យខ្មោចដែលមាននៅក្នុងចិត្តរបស់មនុស្ស វិនាសអន្តរាយដោយសារជឿលើព្រះយេស៊ូ។

សូមឱ្យយើងយកព្រះបន្ទូលរបស់ព្រះយេស៊ូទៅអនុវត្តនៅក្នុងជីវិតរបស់យើង ដើម្បីឱ្យយើងឈ្នះសេចក្តីអាក្រក់។ ហេតុនេះព្រះបន្ទូលរបស់ព្រះយេស៊ូគឺជា​ជីវិត ជាសេចក្តីពិត និងជាផ្លូវដែលនាំមនុស្សទាំងអស់ ឆ្ពោះទៅរកសេចក្តីសុខសាន្តរស់នៅជាមួយគ្នាដោយសុខដុមរមនា៕