ថ្ងៃទី0៧ ខែមករាឆ្នាំ២០២៥ អត្ថាធិប្បាយគម្ពីរម៉ាកុស ៦,៣៤-៤៤បកស្រាយដោយ៖ លោកបូជាចារ្យ រឿង ឆ័ត្រសិរី
ថ្ងៃនេះយើងស្តាប់ព្រះបន្ទូលរបស់ព្រះជាម្ចាស់ចំពោះការប្រោសប្រណី! ក្នុងព្រះបន្ទូលរបស់សន្តម៉ាកុសនៅក្នុងថ្ងៃនេះបាននិយាយអំពី ព្រះជាម្ចាស់យេស៊ូគ្រីស្តបានចិញ្ចឹមប្រជាជនប្រាំពាន់នាក់។ បាទបងប្អូន! នៅក្នុងការរស់នៅជាមួយព្រះអង្គ នឹងដើរជាមួយព្រះអង្គយើងមានការប្រឈមជារឿយៗ ហើយការប្រឈមនឹងគឺការខ្វះខាតខាងផ្លូវកាយ ជាពិសេសរឿងម្ហូមអាហារ ជាកត្តាសំខាន់មួយដែលនាំព្រះយេស៊ូ និងសាវ័កឲ្យដោះស្រាយ ប៉ុន្តែនៅក្នុងការចិញ្ចឹមប្រជាជនប្រាំពាន់នាក់នឹងមិនមែនគ្រាន់តែបង្ហាញថាព្រះអង្គមានអំណាចនៃការគ្រប់គ្រង ឬការចែករំលែកប្រជាជនបានតែប៉ុណ្ណោះទេ ប៉ុន្តែព្រះអង្គចង់ឱ្យយើងបានស្គាល់ការប្រណីសន្តោសរបស់ព្រះជាម្ចាស់។
ការដឹងថាព្រះយេស៊ូមានសេចក្តីមេត្តាករុណាចំពោះយើង ការអស្ចារ្យមិនគ្រាន់តែជាការបំពេញសេចក្តីត្រូវការខាងផ្លូវកាយសម្រាប់ព្រះយេស៊ូគ្រីស្តគឺជារបៀបបង្រៀន ឬដាស់តឿនយើងឱ្យដឹងថាព្រះយេស៊ូនៅស្រឡាញ់ និងជួយយើងគ្រប់ពេលវេលា។ ដូច្នេះពេលព្រះអង្គធ្វើរបៀបនេះ ក៏ព្រះអង្គត្រូវការទុកចិត្តទៅលើរបៀបរបស់ព្រះអង្គ ចំនែកក្រុមសាវ័កអាចមានរបៀប ដោះស្រាយបញ្ហាពីហ្នឹង។
បើគិតតាមរបៀបធម្មតាត្រូវការលុយដើម្បីទិញនំបុ័ង និងម្ហូបមកចែកប្រជាជន! ទោះយ៉ាងណាក៏តែមិនគ្រប់គ្រាន់! ព្រះយេស៊ូបានប្រាប់គាត់ថា ចូរទៅមើលថាមាននំបុ័ង ឬមានអ្វីខ្លះទៀតទេ! ចំណុចនេះពួកគាត់ត្រូវការរត់ទៅរករបស់ ឬនឹករកវិធីផ្សេងពីនេះទៀត! ត្រង់នេះមានន័យថានៅពេលដែលយើងជួបបញ្ហា សូមឲ្យយើងរកដំណោះស្រាយ និងរិះរកច្រកចេញឲ្យលទ្ធភាព ហើយទុកចិត្តលើព្រះអង្គក្រោយក្រុមសាវ័កបានដឹងនិងយល់ពីអង្គហេតុនេះ ព្រះយេស៊ូបានឲ្យសាវ័កចាត់ចែងឱ្យប្រជាជនអង្គុយជាក្រុមៗ ហើយក៏បានឱ្យសាវ័កទៅចែកនំបុ័ងម្តងទៀត ពេលនោះឃើញថា នំបុ័ងមានរហូតគ្រប់គ្រាន់សម្រាប់មនុស្សទាំងអស់។មានន័យថាព្រះអង្គក៏ត្រូវការសាវ័កនឹងទៅចាត់ចែងកម្មវិធីនៃការអស្ចារ្យរបស់ព្រះអង្គចូលរួមចំណែកមួយនៃការអស្ចារ្យរបស់ព្រះអង្គ។ បាទបងប្អូន! យើងជាគ្រីស្តបរិស័ទយើងទាំងអស់គ្នាជាសាវ័ករបស់ព្រះយេស៊ូពិតមែនការងារ ឬបេសកកម្ម ឬអ្វីដែលយើងចង់ធ្វើថ្វាយទៅព្រះជាម្ចាស់ជូនកាលយើងធ្វើអស់ពីលទ្ធភាពហើយ ហើយយើងដឹងថាយើងមិនអាចទៅរួចទេព្រោះលទ្ធភាពយើងមានកំរិត យើងខ្វះនេះខ្វះនោះ ប៉ុន្តែនៅពេលដែលយើងផ្ញើជីវិត ផ្ញើគម្រោងការណ៍របស់យើង ផ្ញើកិច្ចការរបស់យើងលើព្រះអង្គ យើងនឹងឃើញថា ព្រះអង្គនឹងបំភ្លឺយើងដើម្បីធ្វើកិច្ចការនោះឱ្យសម្រេច។
ដូច្នេះពេលយើងចូលរួមការងារជាមួយព្រះអង្គក៏ដូចជាសហការណ៍ជាមួយអ្នកដឹកនាំព្រះសហគមន៍របស់យើង ជាមួយលោកអភិបាល ជាមួយលោកបូជាចារ្យ ឬជាមួយបងប្រុសបងស្រីក្តី កិច្ចការដែលយើងធ្វើជាមួយគ្នាមិនថាការសង្រ្គោះ នោះក៏អាចសម្រេចបានដោយជោគជ័យ៕
Daily Program
