ថ្ងៃទី0៤ ខែមករា ឆ្នាំ២០២៥ អត្ថាធិប្បាយគម្ពីរ យ៉ូហាន ១,៣៥-៤២បកស្រាយដោយ៖ លោកបូជាចារ្យ អ៊ុន សុន
លោកយ៉ូហានបាទីស្តណែនាំ និងបង្ហាញអំពីព្រះយេស៊ូដល់សាវ័ករបស់ព្រះអង្គ នេះជាកូនចៀមរបស់ព្រះជាម្ចាស់!
បាទបងប្អូនជាទីស្រឡាញ់! យើងបានធ្វើបុណ្យព្រះយេស៊ូប្រសូត្រយើងបានធ្វើបុណ្យគោរពព្រះរាជ្យវង្សរបស់ព្រះយេស៊ូ និងយើងបានធ្វើបុណ្យថ្ងៃទីមួយលើកតម្កើងព្រះនាងម៉ារីជាព្រះមហាក្សត្រជាមាតានៃព្រះជាម្ចាស់។ ថ្ងៃអាទិត្យខាងមុខនេះ យើងនឹងធ្វើបុណ្យព្រះយេស៊ូសម្តែងព្រះអង្គឱ្យមនុស្សលោកស្គាល់ជាការពិតសេចក្តីទាំងនេះ ពិធីបុណ្យទាំងអស់នេះពិតជាសិរីរុងរឿងរបស់ព្រះជាម្ចាស់! នេះជាអំណរសប្បាយមួយដែលធ្វើឱ្យពិភពលោកទាំងមូល បានទទួលស្វាគមន៍ព្រះយេស៊ូប្រសូត្រនៅក្នុងជីវិតរបស់យើង ម្នាក់ៗដែលជាបុត្រធីតារបស់ព្រះជាម្ចាស់។
ដំណឹងល្អថ្ងៃនេះក៏បង្ហាញអំពីព្រះយេស៊ូ បានអញ្ជើញសាវ័ករបស់លោកយ៉ូហានដែលមករកព្រះអង្គសួរថាលោកនៅឯណា? ព្រះយេស៊ូក៏បានប្រាប់ថា សុំអញ្ជើញមកអ្នកនឹងឃើញ ព្រះអង្គបានបង្រៀនគេ បានអប់រំគេ បានឱ្យគេស្នាក់នៅជាមួយ ក្នុងចំណោមសាវ័កពីរនាក់នោះមានម្នាក់ឈ្មោះអង់ត្រេមានបងដែលឈ្មោះសិលា ហើយគាត់ក៏បានទៅរកស៊ីម៉ូន និងប្រាប់ថា៖ “យើងបានរកព្រះមេស្ស៊ីឃើញហើយ!” ហើយក៏បាននាំលោកស៊ីម៉ូនមកជួបព្រះយេស៊ូ ព្រះយេស៊ូបានស្វាគមន៍លោកស៊ីម៉ូន ហើយប្រាប់ថា៖ “ពីនេះទៅអ្នកនឹងមានឈ្មោះថាសិលា”។
នេះជាសេចក្តីមួយដែលនាំឱ្យយើងឃើញថា ព្រះជាម្ចាស់សព្វព្រះហឫទ័យត្រាស់ហៅយើងចូលក្នុងគម្រោងការណ៍របស់ព្រះអង្គ។ ព្រះយេស៊ូជាព្រះគ្រីស្តដែលប្រសូត្រមកគ្មានវាំង គ្មានអង្គរក្ស គ្មានអ្នកបម្រើទេ! ប៉ុន្តែព្រះអង្គសុខចិត្តមករួមទុក្ខរួមសុខ និងរស់នៅជាមួយមនុស្សលោក ហើយត្រាស់ហៅមនុស្សលោកចូលមកក្នុងគម្រោងការណ៍របស់ព្រះជាម្ចាស់ដើម្បីស្រឡាញ់ និងបម្រើបងប្អូនឯទៀតៗ៕
Daily Program
