ថ្ងៃទី២២ ខែមិថុនា ឆ្នាំ២០២៥ អត្ថបទគម្ពីរ (លូកា ៩,១១-១៧)អត្ថាធិប្បាយគម្ពីរដោយ៖ លោកបូជាចារ្យ គង់ វៀល

សូមគោរពជម្រាបសួរបងប្អូនទាំងអស់គ្នា! ថ្ងៃនេះជាថ្ងៃអាទិត្យដ៏ពិសេសម្តងទៀត គឺជាថ្ងៃបុណ្យគោរព​លើក​តម្កើងព្រះកាយ និងព្រះលោហិតព្រះយេស៊ូគ្រីស្ត។ ក្រោយពេលបុណ្យព្រះវិញ្ញាណ​ដ៏​វិសុទ្ធ​យាង​មក យើងមានរដូវមួយដ៏សែនពិសេស គឺរដូវធម្មតា នៅរយៈពេលប៉ុន្មានអាទិត្យនេះ យើង​មាន​បុណ្យ​ជា​ច្រើន​ដែលមិនទាក់ទងនិងប្រវត្តិសាស្រ្តនៃព្រះសហគមន៍ ប៉ុន្តែ! ពិធីបុណ្យទាំងនោះបង្ហាញ​ពីចំ​ណុ​ច​មួយឬ​ក៏​លទ្ធិ​សាសនាមួយ។

ដូច្នេះថ្ងៃអាទិត្យនេះយើងហៅបុណ្យលទ្ធិសាសនា ពីរអាទិត្យមុនមានបុណ្យព្រះត្រៃឯក សម្រាប់​អាទិត្យ​នេះ​បុណ្យលើកតម្កើងព្រះកាយ និងព្រះលោហិតរបស់ព្រះគ្រីស្ត។ ពិតជាអស្ចារ្យមែនទែន​ក្នុង​មួយ​ឆ្នាំ​ៗ​យើងធ្វើធម្មទេសនា ដើម្បីយល់កាន់តែច្បាស់អំពីធម្មជាតិនៃព្រះកាយ និងព្រះលោហិតរបស់​ព្រះ​គ្រីស្ត​។ ព្រះកាយនិងព្រះលោហិតព្រះគ្រីស្ត គឺជាព្រះកាយរបស់ព្រះអង្គផ្ទាល់ ព្រះអង្គដែល​មាន​ព្រះ​ជន្ម​គង់​នៅ ព្រះអង្គដែលសោយទុក្ខលំបាក សោយទិវង្គតលើព្រះឈើឆ្កាង និងមានព្រះជន្ម​រស់​ឡើង​វិញ ដែល​មាន​ព្រះកាយ​ប្រកបដោយសិរីរុងរឿង។

ព្រះកាយ! ជាព្រះកាយដែលយើងទទួលនៅពេលចូលរួមពិធីបុណ្យសក្ការៈបូជា (អភិបូ​ជា​) នៅ​ពេល​​ដែល​នំបុ័ង និងស្រាលើអាសនៈក្លាយទៅជាព្រះកាយ និងព្រះលោ​ហិត​របស់ព្រះអង្គ។ ​ព្រះយេ​ស៊ូ​គ្រីស្ត​មាន​ព្រះបន្ទូលថា នេះគឺជារូបកាយរបស់ខ្ញុំ នេះគឺជាលោហិតរបស់ខ្ញុំ។ យើងត្រូវតែសួរខ្លួនឯងថា តើអ្វីដែលព្រះអង្គកំពុងនិយាយមានន័យយ៉ាងម៉េច? នៅពេលជប់លៀងចុងក្រោយជាមួយសាវ័ក ព្រះអង្គ​និយាយ​ឱ្យយើងស្តាប់ ឱ្យយើងយល់​ ​ឱ្យយើងជឿថា ព្រះយេស៊ូកំពុងប្រគល់​ព្រះកាយរបស់​ព្រះអង្គ​ផ្ទាល់​ឱ្យ​យើង​មានព្រះជន្មជាមួយព្រះជាម្ចាស់ ឱ្យយើងមានជីវិតថ្មី គឺជាជីវិតដែលប្រកបដោយសិរីរុងរឿង ជីវិត​ដែល​​ព្រះអង្គបានបញ្ជាលើព្រះឈើឆ្កាង ជាជីវិតដែលព្រះអង្គបានទទួលពីព្រះបិតាក្នុងសិរីរុងរឿង នឹង​ឱ្យ​យើង​​ទទួលជីវិតនេះពីព្រះអង្គដែរ។

អស្ចារ្យមែន! ថ្ងៃនេះជាថ្ងៃពិសេសប្រហែលនៅក្នុងព្រះសហគមន៍នីមួយៗមានពិធីដង្ហែរ​ព្រះកាយ​ដើម្បី​បង្ហា​ញ​អំពីការគោរពស្រឡាញ់ព្រះកាយ និងព្រះលោហិតព្រះគ្រីស្តនៅក្នុងព្រះសហគមន៍កាតូលិក។ បង​ប្អូន​យើងមានកិត្តិយសមែនទែនដែលយើងបានទទួលអគ្គសញ្ញាព្រះកាយព្រះគ្រីស្ត មានន័យថា​យើង​ទ​ទួ​ល​​ព្រះគ្រីស្តនៅក្នុងជម្រៅចិត្តរបស់យើង ដែលនេះជាសេចក្តីពិតនៃព្រះបន្ទូលរបស់ព្រះអង្គ មិនមែន​មកពី​ចិត្ត​គំនិតយើង។  អ្នកណាមានជំនឿលើព្រះបន្ទូលរបស់ព្រះអង្គ អ្នកណា​បើកព្រះគម្ពីរហើយស្តាប់​ព្រះ​បន្ទូល​របស់ព្រះអង្គត្រូវតែជឿថា នេះគឺជារូបកាយរបស់ព្រះអង្គ។

សូមបងប្អូនក្រាបថ្វាយបង្គំគោរពអគ្គសញ្ញាព្រះកាយព្រះគ្រីស្ត ហើយរីកចម្រើននៅក្នុងសេចក្តី​ស្រឡា​ញ់​សម្រាប់អគ្គសញ្ញានេះដែលជួយចិញ្ចឹមជីវិតរបស់យើង។ សូមព្រះជាម្ចាស់ប្រទានពរប​ង​ប្អូ​ន៕