ថ្ងៃទី១៨ ខែមីនា ឆ្នាំ២០២៥ អត្ថបទគម្ពីរ ម៉ាថាយ (២៣,១-១២)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

ថ្ងៃអង្គារនេះព្រះបន្ទូលឱ្យយើងរិះគិតអំពីម៉ាថាយ(២៣,១-១២) ជំពូកទី២៣នេះ​ព្រះយេស៊ូតែ​ងតែរិះគន់​របៀបរបស់ពួកខាងផារ៉ាស៊ីដែលជាអ្នកដឹកនាំសាសនារបស់ជនជាតិយូដា (ធម្មវិន័យរបស់លោកម៉ូសេ) ដោយ​សារលោកម៉ូសេមានធម្មវិន័យច្រើន ហើយជួនកាលយើងអាចឃើញថា ប្រជាជនពិបាកយល់​។

ពួក​ផា​រ៉ាស៊ីតែងតែយកមកអនុវត្តន៍ដើម្បីបង្រៀនគេដើម្បីឱ្យធ្វើតាម ប៉ុន្តែយូរៗទៅការអនុវត្ត​នឹងមាន​គោល​បំណង​ដើម្បីខ្លួនឯង ផ្ទុយពីការលើកតម្កើងព្រះជាម្ចាស់តាមកិច្ចការដែលយើងគោរពធម្មវិន័យ និង​ស្រាយ​ព្រះគម្ពីរ។ ពួកខាងគណៈផារ៉ាស៊ីតែងតែធ្វើអ្វី? ទីមួយគឺតែងតែមានអំនួតថា​ខ្លួនជាអ្នកដែល​ស្រឡាញ់​ព្រះបន្ទូល ស្រឡាញ់ធម្មវិន័យរបស់ព្រះជាម្ចាស់ ហើយពួកគាត់តែងតែដើរអួតគេថា ខ្ញុំមាន​ព្រះគម្ពី​រ​ជាប់​ខ្លួន​។ ទីពីរ ចូលចិត្តឱ្យគេគោរពអោនកាយ ដើម្បីហៅគាត់ថាលោកគ្រូ ឬក៏អ្នកដែលមានចំណេះចេះដឹង។

សម្រាប់រឿងនេះយើងឃើញថា ធ្វើឱ្យពួកផារ៉ាស៊ីនឹងមានឋានៈធំជាង ឬខ្ពស់ជាងបងប្អូនឯទៀតៗ​ដោយ​សារ​គាត់ស្គាល់ព្រះគម្ពីរ តែគេ​កំពុងយកព្រះគម្ពីរជាឧបករណ៍ដើម្បីឱ្យអ្នកដទៃលើកតម្កើងខ្លួន។ របៀប​នេះព្រះយេស៊ូអត់គាំទ្រទេ! អ្វីក៏ដោយអំពីព្រះបន្ទូលរបស់ព្រះជា​ម្ចាស់​អំពីធម្មវិន័យ​របស់​ព្រះអង្គ​សំខាន់​ទីមួយ​យើងត្រូវព្យាយាមស្គាល់ ដឹងឱ្យច្បាស់តាមគោលបំណងនៃព្រះគម្ពីរ ឬក៏ព្រះបន្ទូល​របស់​ព្រះជា​ម្ចាស់​ប្រាប់យើងជារឿងអ្វី។ ទីពីរពេលណាយើងដឹងហើយ​យើងព្យាយាមអនុវត្តន៍តាម​ព្រះបន្ទូលនៃធម្មវិន័យ​នោះ ​ព្រះយេស៊ូឯកភាពនៃការអនុវត្តធ្វើតាមអ្វីដែលពួកផារ៉ាស៊ីបង្រៀន ប៉ុន្តែ កុំធ្វើតាម​ការប្រព្រឹត្ត​របស់​គេ​​មានន័យថាការប្រព្រឹត្តរបស់គេ​មានការគេងប្រវ័ញ្ញ (ពុតគ្រូកុំត្រាប់ ច្បាប់គ្រូឲ្យយក) ត្បិតសកម្មភាពដែល​ខាងផារ៉ាស៊ីធើ្វគឺជាសញ្ញាបង្ហាញថាគេធើ្វដើម្បីបង្អួតខ្លួន ដោយប្រើប្រាស់របៀបជាអ្នកចេះដឹង។

បាទបងប្អូនជាទីស្រឡាញ់! យើងបានស្តាប់ព្រះបន្ទូលថ្ងៃនេះហើយ សូមត្រឡប់ទៅ​មើលការយល់​ដឹងនៃ​ការអប់រំជំនឿរបស់យើង ឯកសារទាក់ទងនិងព្រះគម្ពីរយើងតិច ម្យ៉ាងសាសនាគ្រីស្តក៏មិន​មែនជា​ដើម​​កំណើតសាសនាយើង នេះជាការលំបាកក្នុងការស្វែងយល់ ប៉ុន្តែ ដើម្បីយល់​ច្បាស់​បងប្អូនត្រូវ​ទៅអភិ​បូជា​ជា​រៀងរាល់ថ្ងៃនារដូវ៤០ថ្ងៃនេះ។ បងប្អូនអាចឆ្លៀតទៅបូនីចរនៅកន្លែងផ្សេងៗដើម្បីឱ្យខ្លួនយើងពង្រឹង និងពង្រីកជំនឿរបស់យើងជាការអនុវត្តដើម្បីឱ្យយើងដឹងថា អ្វីដែលព្រះសហគមន៍បង្រៀន និងណែនាំ​យើងគឺយើងអនុវត្តន៍តាមបានយ៉ាងត្រឹមត្រូវ ជាពិសេសឱ្យស្របតាមព្រះគម្ពីរដែលព្រះយេស៊ូបាន​ណែ​នាំ​យើង។ សូមព្រះជាម្ចាស់ប្រទានពរឱ្យបងប្អូន និងសូមឱ្យជីវិតរបស់យើងទាំងការរស់នៅរបស់យើង​ឱ្យ​ស្រប​តាមធម្មវិន័យយ៉ាងពិតប្រាកដតាមព្រះបន្ទូលរបស់ព្រះជាម្ចាស់យ៉ាងពិតប្រាកដ ហើយអ្វីដែល​យើង​ទទួល​ពីព្រះអង្គគឺសុទ្ធតែល្អៗដែលយើងនឹងបានទទួលយ៉ាងអំណរសប្បាយ។ សូមព្រះជាម្ចាស់​ប្រទាន​ពរឱ្យអស់បងប្អូន៕