ថ្ងៃទី១៧ ខែមករា ឆ្នាំ២០២៥ អត្ថាធិប្បាយគម្ពីរ ម៉ាកុស ២,១-១២បកស្រាយដោយ៖ លោកបូជាចារ្យ ផាន បូរី

នៅក្នុងអត្ថបទព្រះគម្ពីរដំណឹងល្អនៅក្នុងថ្ងៃនេះ គឺព្រះយេស៊ូបង្រៀន​ប្រជាជននៅក្នុងធម្មសាលា​ដែលមាន​មនុស្ស​ច្រើនចោមរោមស្តាប់ព្រះអង្គ។ នៅខណៈនោះយើងឃើញមានជនពិការ​ម្នាក់ គាត់​ឮថា​ព្រះយេស៊ូ​គង់នៅក្នុងផ្ទះនោះ និងគាត់ចង់ទទួលបានការព្យាបាលពីព្រះយេស៊ូ ប៉ុន្តែគាត់​មិនអាចចូល​បាន​​ដោយ​សារ​មនុស្សច្រើនពេក ក្រោយមកមានមនុស្សបួននាក់បានសែងមនុស្សខ្វិន​នេះឡើងទៅ​លើ​ដំបូល​​ផ្ទះរួច​ចោះ​ដំបូល​ឱ្យគេចុះមកចំកន្លែងព្រះយេស៊ូគង់នៅ។ ហេតុនេះព្រះយេស៊ូមានព្រះបន្ទូលទៅគាត់ថា “កូនអើយខ្ញុំ​អត់​​ទោសឱ្យអ្នកបានរួចពីបាបហើយ”។

បងប្អូនជាទីស្រឡាញ់! អ្នកពិការម្នាក់នោះដូចជាមាន​បាបកម្មតាំងពីកំណើត គាត់មិនអាចដើរបាន​ដោយ​ខ្លួនឯង គាត់មិនអាចធ្វើអ្វីបានទេ ព្រោះគាត់​មានអំពើបាប ហេតុនេះព្រះយេស៊ូមានព្រះបន្ទូលតែមួយម៉ាត់ កូនអើយខ្ញុំអត់ទោសឱ្យ​អ្នកបានរួ​ចពី​បាប​ហើយ។ ព្រះបន្ទូលតែមួយម៉ាត់នេះនាំឱ្យអ្នកជំងឺ​ម្នាក់នេះបាន​ទទួល​ការសង្គ្រោះ នាំឱ្យអ្នកជំងឺម្នាក់នេះ​បាន​ជា​សះស្បើយពីជំងឺរបស់គាត់។

បងប្អូនជាទីស្រឡាញ់! ជាពិសេសគ្រីស្តបរិស័ទ​យើង​សុំឱ្យគ្រីស្តបរិស័ទយើង​ចេះ​​​ចាប់អារម្មណ៍​ចំពោះ​ជន​ពិការ ចាប់អារម្មណ៍អំពីរបៀប​ដែលយើងជួយ​ជនក្រីក្រ ចាប់អារម្មណ៍អំពីរ​បៀប​​ដែល​យើង​បដិបត្តិ​​ជំនឿ​របស់យើង។ ប្រសិនបើយើងចង់ទទួល​ការ​សង្គ្រោះពីព្រះយេស៊ូ​យើង​ត្រូវតែ​មានជំនឿទៅលើ​ព្រះអង្គនេះ​គឺ​ជាចំណុចទីមួយដែលទាក់ទងទៅនឹងជំនឿ។

ចំណុចទីពីរ! សុំឱ្យបងប្អូនគ្រីស្តបរិស័ទយើងចេះបើកភ្នែក បើកចិត្តគំនិតមើលអ្នកជំងឺ ឬអ្នកក្រីក្រ​ឱ្យ​យើង​ចេះ​ស្រឡាញ់អ្នកជំងឺ ឱ្យយើងចេះស្រឡាញ់អ្នកក្រីក្រដែលគេក្រីក្រជាងយើង ​​មានពេលខ្លះគេ​ត្រូវ​ការ​ជំនួយ​ពីយើង មានពេលខ្លះគេត្រូវការ ការលើកទឹកចិត្តពីយើង ឱ្យយើងចេះពោលពាក្យល្អៗ ដើម្បី​​លើកទឹក​ចិត្តបងប្អូនឯទៀតៗ ឱ្យយើងចេះផ្តល់ក្តីសង្ឃឹមដូចអ្នកជំងឺម្នាក់​នេះដែល​អត់មាន​សេចក្តី​សង្ឃឹម​សោះ ប៉ុន្តែ​ពេលគាត់ឮពីព្រះនាមព្រះយេស៊ូគាត់សង្ឃឹមថាព្រះអង្គនឹងព្យាបាលគាត់ឱ្យបានជាសះស្បើយ។

បងប្អូន​អស់​អ្វីៗ​​អស់​ទៅនៅក្នុងជិវិតរបស់យើង តែកុំឱ្យយើងអស់សង្ឃឹម! ចូរយើងមានសេចក្តី​សង្ឃឹម​នៅ​ក្នុ​ង​ជីវិតរបស់​យើង ដូចនៅក្នុងឆ្នាំមហាករុណាទិគុណនេះ​សម្តេចប៉ាបានកើនរំលឹកយើងឱ្យយើង​ត្រូវតែ​មាន​​សេចក្តីសង្ឃឹមនៅក្នុងជីវិត ទោះបីនៅក្នុងជីវិតរបស់យើង យើងជួបឧបសគ្គនេះ ឧសបគ្គនោះក៏ដោយ ប៉ុ​ន្តែ​ឱ្យ​យើង​មានសេចក្តី​សង្ឃឹម ហើយដើម្បីឱ្យមានសេចក្តីសង្ឃឹមនៅក្នុងជីវិតរបស់យើង យើងត្រូវ​តែ​នៅ​ជាប់​ជាមួយព្រះជាម្ចាស់ ត្បិតយើងសង្ឈឹមថា​ព្រះអង្គមិនបោះបង់យើងចោលទេ! ​ទោះបីខ្ញុំ​ជួបទុក្ខលំបាក​ទោះ​បីខ្ញុំជួបបញ្ហា ក៏​ព្រះអង្គ​​គង់នៅជាមួយយើង ព្រះអង្គនៅតែមានព្រះបន្ទូលលើកទឹក​ចិត្តយើង ​ឱ្យ​​យើង​មាន​កម្លាំង។

ចំណុចទីបី! សុំឱ្យបងប្អូនខិតខំប្រឹងប្រែងទៅព្រះវិហារដើម្បីទទួលវត្តមានរបស់ព្រះអង្គគឺព្រះកាយ និង​ព្រះលោហិតរបស់ព្រះគ្រីស្ត ទៅព្រះវិហារដើម្បីទទួលព្រះបន្ទូលរបស់​ព្រះអង្គដែលជា​អាហារចិញ្ចឹម​ជិវិត​ខាងវិញ្ញាណដែលជ្រៀបចូលនៅក្នុងជីវិតរបស់បងប្អូន ដើម្បីឱ្យបងប្អូនមានកម្លាំងធ្វើដំណើររួមជាមួយ​ព្រះអង្គ នឹងសុំឱ្យបងប្អូនមានជំនឿដូចមនុស្សខ្វិននោះ សូមឱ្យបងប្អូនចេះជួយគ្នា​ដូច​បុរស​បួន​នាក់​​ដែល​​ខិតខំជួយអ្នកជំងឺម្នាក់ឱ្យបានជួបព្រះយេស៊ូផងដែរ។

សូមឱ្យយើងម្នាក់​ចេះប្រកាស​ដំណឹងល្អអំពី​ព្រះយេស៊ូ​គ្រីស្តដែរ ហេតុនេះសុំឱ្យបងប្អូន​ចាំនៅព្រះបន្ទូល​មួយថា កូនអើយខ្ញុំបានអត់​ទោស​ឱ្យអ្នកបានរួចពីបាបហើយ៕ អាមែន