ថ្ងៃទី១៦ ខែមិថុនា ឆ្នាំ២០២៥ អត្ថបទគម្ពីរ ម៉ាថាយ (៥​,៣៨-៤២)អត្ថាធិប្បាយគម្ពីរដោយ៖ លោកបូជាចារ្យ វី សំណាង

ព្រះគម្ពីរដំណឹងល្អតាមសន្តម៉ាថាយ (៥​,៣៨-៤២) ថ្ងៃនេះគួរឱ្យចាប់អារម្មណ៍ ដើម្បីឱ្យយើងរិះគិ​ត​ជា​មួយ​​គ្នាតាម“ខ”នីមួយៗនៅក្នុង“ខ”​៣៨មានចែងថា ភ្នែកសងភ្នែក ធ្មេញសងធ្មេញ។ នៅ​ក្នុង​សម្ព័ន្ធ​មេត្រី​ចាស់​​តាមច្បាប់ជនជាតិយូដាច្បាប់ភ្នែកសងភ្នែក ធ្មេញសងធ្មេញនេះ​គឺជាច្បាប់​ដែល​ត្រូវបាន​ចង​ក្រងឡើង ដើម្បីទប់ស្កាត់ការផ្តទ្ទាទោស ឬការសងសឹងហួសកម្រឹតមានន័យថា យើងអាចផ្តន្ទាទោស ឬ​សង​សឹក​​នរណា​ម្នាក់ឱ្យបានសមរម្យ ឱ្យសមាមាត្រនឹងទោសកំហុសរបស់ម្នាក់នោះ ។

ប៉ុន្តែអ្វីដែលព្រះយេស៊ូចង់ឱ្យយើងធ្វើគឺកុំសងសឹកគ្នា! ទោះបីនៅក្នុងកម្រឹ​ត​មួយណាក៏ដោយ ផ្ទុយទៅវិញ​ឱ្យយើង​តបតដោយសេចក្តីស្រឡាញ់។ “ខ”៣៩ បើគេទះកំផ្លៀងស្តាំ​ចូលបែរឱ្យគេទះ​មួយ​ខាងទៀ​ត​ចុះ តាមទំនៀមទំលាប់ ឬរបៀបវិន័យរបស់ជនជាតិយូដា គឺមានរបៀបទះកំផ្លៀង ពេលដែលគេទះកំផ្លៀង​ជន​បរទេសដែលជាទាសកររបស់ខ្លួនគេប្រើ ខ្នងដៃ ជារបៀបមួយមើលងាយ រីឯជនជាតិយូដា គេទះដោយ​ប្រើ​បាតដៃ។ ដូច្នេះបើគេទះកំផ្លៀងយើងម្ខាងដោយប្រើខ្នងដៃ ព្រះយេស៊ូឱ្យ​យើងបែ​រម្ខាង​ទៀត​ឱ្យ​គេទះ​ដោយ​ប្រើ​បាតដៃវិញ! វាបង្ហាញពីសិទ្ធស្មើ​គ្នាក្នុងគោលបំណងបំបាត់ទេសភាពលែងជាទាសករទៀតហើយ គឺឱ្យ​យើង​មានសិទ្ធិស្មើគ្នា។

នៅ“ខ”៤០វិញបើគេប្តឹងចង់យកអាវក្នុងចូលឱ្យគេយកអាវធំថែមទៀតទៅ!  ដូច្នេះតាមច្បាប់របស់​លោក​​ម៉ូ​សេ អាវក្រៅ គឺជាទ្រព្យសម្បត្តិមូលដ្ឋានជាទ្រព្យមួយចាំបាច់សម្រាប់បុគ្គលម្នាក់ៗ គ្មា​ន​​​នរ​ណា​មាន​សិទ្ធិ​ទុក​អា​វធំនោះបញ្ចាំឆ្លងយប់បានទេ។ របៀបព្រះយេស៊ូចង់​ឱ្យយើងធ្វើអ្វី​មួយ​ដោយស្ម័គ្រចិត្ត​ដោយគ្មា​ន​លក្ខ​ខណ្ឌ​។ “ខ”៤១បើគេបង្ខំឱ្យអ្នកដើរមួយ​យោជន៍! ចូរទៅពីរយោជន៍ជាមួយគេទៅ! ក្រោយសម័យ​អា​ណា​​និគម​ទាហា​នរ៉ូមុំាង មានច្បាប់អនុញ្ញាតិឱ្យទាហានរ៉ូមុំាងអាចប្រើ​មនុស្សលីឥវ៉ាន់តែ​មួយយោជន៍ប៉ុ​ណ្ណោះ​​។ មួយ​យោជន៍នេះប្រហែលជា១.៦គីឡូម៉ែត្រ។

ព្រះយេស៊ូចង់ឱ្យយើងធ្វើ​អ្វីមួយ​ដោយ​ស្ម័គ្រចិត្តគំនិតធ្វើតាមច្បាប់ ដូច្នេះរាល់ដងពេលដែល​យើង​ចូល​រួម​អភិបូជា​ឱ្យយើងចូលរួមដោយ​ស្ម័គ្រ​ចិត្តដោយសេចក្តីស្រឡាញ់ កុំឱ្យយើងចូលរួមដោយខ្លា​ចក្រែង​ថា បើ​មិន​ចូលរួមអភិបូជា គឺមានបាប ហេតុ​នេះសុំឱ្យយើងចូលរួមអភិបូជាដោយចិត្តសន្ធា និងចិត្ត​ស្រឡា​ញ់​របស់​យើងចំពោះព្រះជាម្ចាស់កុំ​ឱ្យ​យើង​ធ្វើអ្វីមួយទៅតាមច្បាប់។

រីឯ“ខ”៤២វិញបានចែងថា កុំគេចមុខចេញពីអ្នកដែលចង់សុំខ្ចីអ្វីពីយើង ដូច្នេះការបរិច្ចាគសម្រាប់ជនជាតិ​យូដាជាកិច្ចការមានសក្ការៈខាងផ្លូវវិញ្ញាណដែលច្បាប់កំណត់។ ព្រះយេស៊ូចង់ឱ្យយើងធ្វើកិច្ចការធម៌មេត្តា​ករុណា​បរិច្ចាគ​ទានដោយចិត្តសន្ធាពោរពេញដោយសេចក្តីស្រឡាញ់ និងចិត្តមេត្តាករុណាចំពោះ​មនុស្ស​ទាំង​អស់ដោយមិនរើសមុខ។

ដូច្នេះជាអ្វីមួយដែលព្រះយេស៊ូចង់បំពេញអត្ថន័យទាំងអស់ដែលជនជាតិយូដាធ្លាប់ធ្វើ កុំឱ្យយើងធ្វើអ្វីមួយ​តាមតែច្បាប់តែប៉ុណ្ណឹង ប៉ុន្តែ​ឱ្យយើងទៅហួសច្បាប់ ដើម្បីឈានទៅដល់កិច្ចការមួយដែលល្អ កិច្ច​ការ​ដែ​ល​សុក្រឹត​។ អាម៉ែន៕