ថ្ងៃទី១១ ខែមីនា ឆ្នាំ២០២៥ អត្ថបទគម្ពីរ (ម៉ាថាយ ៦,៧-១៥)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

ជាព្រះបន្ទូលដែលជួយឱ្យបងប្អូនចេះរបៀបអធិដ្ឋាន។ បងប្អូនជាទីស្រឡាញ់យើងដឹងហើយថា កំឡុង​ពេល៤០ថ្ងៃយើងមានរបៀបក្នុងការអនុវត្តខ្លួន ឱ្យសមស្របជាមួយព្រះហឫទ័យរបស់ព្រះជាម្ចាស់​ដូចជា​ការតមអាហារ ការអធិដ្ឋាន និងការធ្វើបុណ្យធ្វើទានជួយអ្នកដទៃ។

ថ្ងៃនេះព្រះបន្ទូលកំពុងបញ្ជាក់អំពីរបៀបការអធិដ្ឋានដែលបងប្អូនអាចឃើញនៅក្នុងជីវិតរបស់អ្នក​ជឿ ​មិន​ថា​សាសនាណាក៏ដោយយើងមានរបៀបការអធិដ្ឋានផ្សេងគ្នា យើងមានរបៀបធ្វើពិធីបុណ្យនិង​របៀប​ទំនាក់ទំនងជាមួយព្រះជាម្ចាស់ច្រើនបែប តែជូនកាលអ្វីដែលយើងគិតឃើញ ឬរបៀបដែលយើង​ធ្វើ ​នឹង​គឺជារបៀបមិនត្រឹមត្រូវក្នុងការទងជាមួយព្រះជាម្ចាស់ អាចថាយើងចេះតែអធិដ្ឋានសុំអង្វរនឹងសុំទោស​ព្រះអង្គ​តែប៉ុណ្ណោះ។

ប៉ុន្តែថ្ងៃនេះព្រះយេស៊ូបានបង្រៀនយើងនៅធម៌មួយដ៏សំខានដែលព្រះសហគមន៍កាតូលិករបស់យើង និង​បងប្អូនគ្រីស្ទានផ្សេងៗទៀតដែលតែងតែអាសាអធិដ្ឋានគឺធម៌”ឱព្រះបិតា”។ តាមព្រះសហគមន៍សម្រាប់ បេក្ខជនត្រៀមទទួលពិធីជ្រមុជទឹក និងមានពិធីប្រគល់ធម៌ “ឱព្រះបិតា” ជាធម៌នាំឱ្យយើងនឹកដល់របៀប​ទាក់ទង​ជាមួយព្រះជាម្ចាស់ និងអ្នកដទៃ។

មាន៣រឿងដែលយើងអធិដ្ឋានសុំនៅក្នុងពេលនេះគឺ៖ សុំឱ្យព្រះហ​ឫទ័យរបស់ព្រះជាម្ចាស់បានសម្រេច ហើ​​យ​​​ក៏ជារបៀបដែលយើងអាចមានទំនាក់ទនងយ៉ាងជិតស្និទ្ធជាមួយគ្នា រួមនិងព្រះជាម្ចាស់​  ជាពិសេស​គឺ​”ព្រះបិតា”ដែលមានព្រះយេស៊ូជា​ស្ពាននាំយើងឲ្យស្គាល់ព្រះបិតា។ ​

ជាពិសេសអត្ថន័យធម៌នេះបង្ហាញថាយើងកំពុងធ្វើដំណើរជាមួយព្រះអង្គនៅក្នុងលោកនេះ “សូមឱ្យ​​តាម​​ព្រះហឫទ័យរបស់ព្រះជាម្ចាស់”។ មួយទៀតគឺការសុំអាហារដែលយើងខ្វះជារៀងរាល់ថ្ងៃ និងទី៣គឺ​សុំ​ឱ្យ​យើង​ចេះលើកលែងទោសនឹងបានរស់នៅជាមួយអ្នកដទៃយ៉ាងល្អ។

ពិតមែន! ជីវិតរបស់មនុស្សយើងមានសេចក្តីត្រូវការមួយចំនួន​សម្រាប់លោក​នេះ​ព្រះបិតាមិនភ្លេចយើង​ឡើ​យ។ អ្វីដែលធ្វើឱ្យយើងមានអំណរសប្បាយគឺទំនាក់ទំនងជាមួយអ្នកដទៃឲ្យល្អ ហេតុនេះ​ការ​លើក​លែ​ង​ទោស ការសុំឱ្យព្រះអង្គលើកលែងទោស​ជាកត្តាមួយនាំឱ្យយើង​មានអំណរសប្បាយ​នៃការរស់​នៅ​ក្នុង​លោក​នេះដោយសារយើងមានចិត្តធម៌ដូចព្រះបិតារបស់យើង។ ដូច្នេះពេលណាបងប្អូនអធិដ្ឋានធម៌នេះសូមនឹកឃើញទំនាក់ទំនងយើងរវាងព្រះជាម្ចាស់ និង​អ្នកដទៃ​ផង​ សូម​ឱ្យយើងមានកម្លាំង​រួមធ្វើដំណើរជាមួយ​ព្រះអង្គចាប់ពីលោកនេះ​រហូត​ដល់លោក​ខាងមុខ ​គឺជីវិត​អស់​កល្បជានិច្ច។ សូមឱ្យព្រះបិតាបង្ហាញជំនឿឱ្យយើង បង្ហាញព្រះយេស៊ូឱ្យយើង ហើយ​សុំឱ្យ​ព្រះយេស៊ូ​ជា​ស្ពាន​ចម្លងយើងទៅកាន់ព្រះបិតាផងដែរ។

សូមព្រះអម្ចាស់ប្រទានពរឱ្យបងប្អូន និងសូមឲ្យជីវិតរស់នៅរបស់បងប្អូនទទួលតែអំណរសប្បាយ និង​សេចក្តីសុខសាន្តរួមជាមួយព្រះបិតារបស់យើងទាំងអស់គ្នា ដែល​នាំឱ្យយើង​ជាគ្រួសារតែ​មួយជាមួយ​គ្នា​ផង។ អាម៉ែន៕