ថ្ងៃទី០៧ ខែមីនា ឆ្នាំ២០២៥អត្ថបទគម្ពីរ (ម៉ាថាយ ៩,១៤-១៥)អត្ថាធិប្បាយគម្ពីរដោយ៖ លោកបូជាចារ្យ ផាន បូរី

អត្ថបទព្រះគម្ពីរដំណឹងល្អថ្ងៃនេះយើងបានលឺថាពួកខាងគណៈផារ៉ាស៊ី និងសិស្ស​របស់​យ៉ូហាន​បាទី​ស្ត​បាន​សួរព្រះយេស៊ូពីរឿងតមអាហារ ព្រោះសិស្សរបស់ព្រះយេស៊ូអត់តមទេ ហេតុអ្វីមានលក្ខណៈខុសគ្នា? ព្រះយេស៊ូមានព្រះបន្ទូលថា ធម្មតាពេលណាកូនកំលោះនៅ​ជាមួយយើងអត់​តមអាហារទេ! យើង​តែង​តែ​ជប់លៀង សប្បាយរីករាយជួបជុំគ្នាហូបបាយ ឬធ្វើសកម្មភាពផ្សេងៗដែលនាំឱ្យយើងសប្បាយ។ ប៉ុន្តែ​ពេល​កូនកំលោះលាចាកលោកទៅ ឬកូនកំលោះទទួលមរណ​ភាពទើប​យើងតមអាហារ​ដោយ​សារយើង​កាន់ទុ​ក្ខ​។

​ត្រង់នេះខ្ញុំមានបីចំណុចដែលចង់ចែក ចំណុចទីមួយគឺលក្ខណៈនៃកូនកម្លោះ​អ្នកណាជា​កូនកម្លោះ​ដ៏​ពិត​ប្រាកដ? គឺព្រះយេស៊ូ រីឯព្រះសហគមន៍គឺជាកូនក្រមុំ ហេតុនេះយើងឃើញថាកូនកម្លោះ និងកូនក្រមុំ​រស់​នៅ​​ជាមួយគ្នាគឺជារឿងល្អសប្បាយត្រូវ បង្ហាញសេចក្តីស្រឡាញ់ចំពោះគ្នាទៅវិញទៅមក ហេតុនេះអត់ត្រូ​វ​ការតមអាហារទេ ត្បិតព្រះយេស៊ូគឺជាកូនកម្លោះដែលកំពុងតែផ្តល់សុភមង្គលឱ្យកូនក្រមុំ កំពុងដឹក​ដៃ​កូនក្រ​មុំ​ឱ្យដើរលើមាគ៌ាដ៏ល្អប្រណិតនៅក្នុងសង្គមយើងសព្វថ្ងៃ គឺព្រះយេស៊ូជា​កូនកម្លោះដែលនាំ​ឱ្យកូន​ក្រមុំ​រ​កបានសុភមង្គលដ៏ពិតប្រាកដ។

ហេតុនេះយើងអត់ត្រូវការតមអាហារពេលព្រះអង្គនៅជាមួយយើង ផ្ទុយទៅវិញយើងជាកូនក្រមុំយើង​ត្រូ​វ​តែលើកសិរីរុងរឿងរបស់ព្រះជាម្ចាស់ឱ្យអស់ពីចិត្តគំនិតរបស់យើង អស់ពីកម្លាំងកាយរបស់យើង ហើយ​យើង​នាំគ្នាកោតសរសើរលើកតម្កើងព្រះអង្គ។ ហេតុនេះយើងត្រូវតែសប្បាយរីករាយជាមួយកូនកម្លោះ។ ចំណុចទីពីរ បន្តិចទៀតគេនឹងចាប់កូនកម្លោះយកទៅ​ ឯយើងជាកូនក្រមុំមានតួនាទីតមអាហារ អធិដ្ឋាន នឹង​រកមធ្យោបាយផ្សេងៗដើម្បីនៅជិត និងមានភាព​​ជិត​ស្និទ្ធជាមួយកូនកម្លោះ។

បងប្អូនជាទីស្រឡាញ់! ពេលណាយើងនិយាយពីការតមអាហារជួនកាលយើងនិយាយពីម្ហូបអាហារ​ដែល​យើង​​ញាំ ប្រសិនបើយើងតមតែអាហារ ប៉ុន្តែយើងអត់បានតមចិត្តគំនិតយើង យើងអត់បានតមពាក្យសម្តី យើងអត់បានធ្វើសេចក្តីល្អនៅក្នុងសង្គមរបស់យើង យើងអត់បានតមអ្វីដែលនាំឱ្យ​រូបកាយរបស់​យើង​ដូច​ជា​​មានតណ្ហា ហេតុនេះយើងត្រូវតែតម? រួមជាមួយព្រះយេស៊ូ ការ​តមអា​ហា​រលុះត្រាតែ​យើង​ចេះ​ដាក់​ខ្លួន​ឱ្យ​បានត្រឹមត្រូវ ឱ្យបានល្អ ឱ្យបានគាប់ប្រសើរ ហើយព្យាយាមធ្វើតាមព្រះបន្ទូលរបស់ព្រះជាម្ចាស់។

ហេតុនេះសូមឱ្យបងប្អូនតមពាក្យសម្តីរបស់បងប្អូន តមចិត្តរបស់បងប្អូនកុំឱ្យច្រណែនឈ្លានីស តម​កាយ​វិការ​របស់បងប្អូនកុំឱ្យមានអំពើហឹង្សាកើតមានឡើង។ ចំណុចទីបីគឺខិត​ខំប្រឹងប្រែង​ស្តាប់ព្រះ​បន្ទូល​របស់​ព្រះជាម្ចាស់ ព្រះបន្ទូលរបស់ព្រះយេស៊ូ។ ធ្វើយ៉ាងណាយក​ព្រះបន្ទូលរបស់ព្រះ​យេស៊ូ​ជា​ទីពឹ​ង​ ដើម្បី​យើងធ្វើដំណើររួមជាមួយគ្នានៅក្នុងរដូវ៤០ថ្ងៃនេះ​។ ពិតមែនឱ្យយើងចេះកែប្រែចិត្តគំនិតដ៏ពិត​ប្រាកដ​ពេល​​នោះយើងនឹងចេះតមអាហារ៕