ថ្ងៃទី០៧ខែឧសភាឆ្នាំ២០២៥ អត្ថបទគម្ពីរ យ៉ូហាន (៦,៣៥-៤០)អត្ថាធិប្បាយគម្ពីរដោយ៖ លោកបូជាចារ្យ រ៉ាជេត ហាសាពូទី

ជម្រាបសួរទាំងអស់គ្នា ថ្ងៃនេះយើងរួបរួមគ្នារិះគិតពិចារណាព្រះបន្ទូលដំណឹងល្អតាមយ៉ូហាន (៦,៣៥-៤០) អត្ថបទនេះព្រះយេស៊ូបង្ហាញព្រះអង្គ​ឱ្យបណ្តាជនស្គាល់យ៉ាងច្បាស់។ ព្រះយេស៊ូ​មាន​ព្រះ​បន្ទូល​ថា ព្រះអង្គជាអាហារដែលផ្តល់ជីវិត អ្នកណាមករកព្រះអង្គលែងឃ្លានទៀតហើយ អ្នកណាជឿ​លើ​ព្រះអង្គ​ក៏លែងស្រេកទៀតដែរ។ ព្រះអង្គមិនបោះបង់អ្នកដែលមករកព្រះអង្គជាដាច់ខាត ត្បិតព្រះអង្គចុះ​ពីស្ថា​ន​បរមសុខមកដើម្បីធ្វើតាមព្រះហឫទ័យរបស់ព្រះបិតាដែលបានចាត់ព្រះអង្គឱ្យមក។

បងប្អូនជាទីគោរព! ព្រះយេស៊ូមានព្រះបន្ទូលណែនាំបណ្តាជន និងគ្រីស្តបរិស័ទថា ព្រះយេស៊ូ​មិនមែន​ជា​ព្រះអង្គដែលប្រោសប្រទាននំប៉័ង និងម្ហូបអាហារឱ្យបណ្តាជនបរិស័ទបរិភោគប៉ុណ្ណោះ​ទេ! គឺព្រះអង្គ​ជា​អាហារតែម្តងអាហារដែលផ្តល់ជីវិត។ ព្រះយេស៊ូមិនត្រឹមជាអាហារដែលចិញ្ចឹមរូបកាយរបស់​មនុស្សតែ​ប៉ុណ្ណោះ តែជាអាហារដែលផ្តល់វិញ្ញាណដល់មនុស្សយើង ដូច្នេះអាហារដែលព្រះអង្គប្រោសប្រទានឱ្យ​គឺជារូបកាយព្រះគ្រីស្ត ហើយភេស្ជៈដែលព្រះអង្គប្រោសប្រទានឱ្យគឺជាព្រះលោហិតរបស់ព្រះអង្គផ្ទាល់។

ដូច​ព្រះយេស៊ូមានព្រះបន្ទូលនៅថ្ងៃនេះដែលព្រះអង្គលាងជើងឱ្យក្រុមសាវ័ក និងជប់លៀង​ជា​មួយពួក​គេ​ដោយព្រះអង្គមានព្រះបន្ទូលថា នេះជារូបកាយខ្ញុំ នេះជាលោហិតខ្ញុំ។ នៅវេលាដែលព្រះយេស៊ូបង្កើត​អគ្គ​សញ្ញា​គោរព​ព្រះអរព្រះគុណ​ព្រះជាអម្ចាស់ ហើយមានព្រះបន្ទូលថា សូមអ្នករាល់គ្នាធ្វើដូច្នេះដើម្បីនឹក​រ​ឮក​ដល់ខ្ញុំ។ ដូច្នេះពេលណា​ពួកយើងអញ្ជើញចូលរួមនៅក្នុងអភិបូជាពួកយើងនឹករំលឹកដល់ព្រះយេស៊ូ​ដែល​បូជាព្រះជន្មនៅលើឈើឆ្កាង។

យើងនឹករំលឹកដល់ព្រះយេស៊ូដែលប្រោសប្រទានរូបកាយ និងលោហិតរបស់ព្រះអង្គផ្ទាល់! ​អភិបូជា​ជាពេលមួយ​ដ៏ពិសេសបំផុតនៅក្នុងជីវិតរបស់យើងជាគ្រីស្តបរិស័ទ។ នៅក្នុងអភិបូជាព្រះយេស៊ូ​ប្រោស​ប្រទានព្រះជន្មផ្ទាល់របស់ព្រះអង្គឱ្យដល់ពួកយើង តាមរយៈការចូលរួម ការស្តាប់​ព្រះបន្ទូល​របស់​ព្រះអង្គ និង​ការទទួលព្រះកាយ និងព្រះលោហិតព្រះគ្រីស្ត។ ព្រះយេស៊ូជាមហាបូជាចារ្យ និ​ង​យញ្ញ​បូជា​ដែរ ព្រះអង្គបានបូជាព្រះជន្មផ្ទាល់់របស់ព្រះអង្គ ព្រះអង្គគឺជាកូនចៀមដែលដកបាបនៃពិភពលោក។

ទីបញ្ចប់ព្រះយេស៊ូមានព្រះបន្ទូលថា ព្រះបិតារបស់ខ្ញុំសព្វព្រះហឫទ័យឱ្យ​អស់អ្នកដែលបានឃើញ​ព្រះ​បុត្រា ហើយជឿលើព្រះអង្គមានជីវិតអស់កល្បជានិច្ច។ ខ្ញុំនឹងប្រោសអ្នកនោះឱ្យមាន​ជីវិត​រស់​ឡើង​វិញ​នៅ​ថ្ងៃ​ចុងក្រោយបំផុត។ ព្រះយេស៊ូនឹងប្រោសពួកយើងឱ្យមានជីវិតរស់​ឡើងវិញជាមិនខាននៅថ្ងៃចុង​ក្រោយ​បំផុត។ សូមព្រះជាអម្ចាស់ប្រទានពរយើង៕