ថ្ងៃទី០៣ ខែមេសា ឆ្នាំ២០២៥អត្ថបទគម្ពីរ (យ៉ូហាន៥,១៧-៣០)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

បងប្អូនជាទីស្រឡាញ់! នៅថ្ងៃនេះយើងជិតដល់បុណ្យចម្លងគឺជាថ្ងៃដែលព្រះយេស៊ូនឹងរងទុក្ខលំបាក ហើយ​​សោយទិវង្គត់ រួចមានព្រះជន្មរស់ឡើងវិញ ហើយថ្ងៃនេះសូមបងប្អូនរិះគិតថា  ហេតុអ្វីបា​នជា​គេបា​ន​សម្លាប់ព្រះយេស៊ូ?

អត្ថបទនៅថ្ងៃនេះជនជាតិយូដាខឹងព្រះយេស៊ូ គេចោទប្រកាន់ព្រះអង្គ តាមច្បាប់​ធម្មវិ​ន័យ​របស់លោក​ម៉ូសេ​ព្រះអង្គមានសិទ្ធិហៅសាក្សីពីរ ឬបីនាក់ដើម្បីជួយការពារ។ ដូច្នេះព្រះយេស៊ូ មានលោកយ៉ូហាន​បាទី​ស្ត​​​ដែល​បញ្ជាក់​ថាព្រះអង្គជាព្រះមេស្ស៊ី ប៉ុន្តែ​គេមិន​ព្រមជឿឡើយ ព្រោះ​គេ​មិន​ស្គាល់​​ព្រះបិតា​​របស់​ព្រះយេ​ស៊ូ និងមានសាក្សីពីរទៀតគឺកិច្ចការដែលទ្រង់បានធើ្វ និងព្រះគម្ពីរ។  ព្រះយេស៊ូមា​នព្រះបន្ទូល​អំពី​កិច្ច​ការ​ដែល​ព្រះអង្គប្រព្រឹត្ត។ ព្រះយេស៊ូប្រព្រឹត្ត​ការ​ណ៍ជាច្រើនដែលបញ្ជាក់ថាព្រះអង្គគឺជាព្រះមេស្ស៊ី។

ព្រះអង្គប្រោសអ្នកជំងឺជាច្រើនឱ្យបានជាពិសេសប្រោសមនុស្សខ្វាក់ពីកំណើតឱ្យបានភ្លឺ និង​ប្រោស​លោក​ឡាសាឱ្យរស់ឡើងវិញ។ ដូច្នេះកិច្ចការទាំងប៉ុន្មានដែលព្រះយេស៊ូបាន​ប្រព្រឹត្តបញ្ជាក់ច្បាស់ដូច​ជាសាក្សី​ដែលបញ្ជាក់ថាព្រះយេស៊ូជាព្រះមេស្ស៊ីដែលជនជាតិយូដាទន្ទឹងរង់ចាំ និងសាក្សីមួយទៀតគឺព្រះគម្ពីរ។ ពេល​ដែលយើងអានព្រះគម្ពីរសម្ពន្ធមេត្រីចាស់យើងអាចយល់ថា ព្រះយេស៊ូគឺជាអ្នកបម្រើ​ដែលបាន​រង​ទុ​ក្ខ​លំបាកជាព្រះមេស្ស៊ីដែលជនជាតិយូដាទន្ទឹងរង់ចាំប្រសិនបើយើងចេះអានព្រះគម្ពីរដោយយកចិត្តទុកដាក់ ដែលមានព្រះវិញ្ញាណដ៏វិសុទ្ធជួយបំភ្លឺនោះពួកគេនឹងយល់ពីសេចក្តីទាំងនោះ។

ប៉ុន្តែព្រះយេស៊ូដឹងច្បាស់ថា ពួកគណៈផារ៉ាស៊ីទាំងអស់មិនព្រមជឿលើព្រះអង្គ ទោះបីគេមើលឃើញ​ច្បាស់​អំ​ពីកិច្ចការដែលព្រះយេស៊ូប្រព្រឹត្ត ទោះបីគេស្គាល់ព្រះគម្ពីរសម័្ធន្តមេត្រីចាស់ច្បាស់ ក៏គេមិនព្រមជឿ ដោយ​​សារគេមានចិត្តរឹងរួសជាដាច់ខាត។ សម្រាប់យើងប្រហែលពេល​ខ្លះយើងដូច​ពួក​គណៈ​ផា​រ៉ាស៊ី យើង​មិនព្រមជឿមិនព្រមកែប្រែចិត្តគំនិតដាច់ខាត មិនព្រមស្រឡាញ់ព្រះជាម្ចាស់ មិនព្រមជួយអ្នកដទៃ។

អត្ថបទដំណឹងល្អនៅថ្ងៃនេះរំលឹកថាប្រសិនជាបើកចិត្តឱ្យទូលាយទុកឱកាសឱ្យព្រះយេស៊ូដើម្បីឱ្យយើងជឿ ឱ្យយើងកែប្រែចិត្តគំនិត ចាប់ផ្តើមស្រឡាញ់ចាប់ផ្តើមជួយអ្នកដទៃ ពេលនោះ​ព្រះយេស៊ូ​នឹង​បញ្ជាក់​ជំនឿ​របស់​យើង និងជួយពង្រឹងជំនឿរបស់យើង កិច្ចការដែលយើងប្រព្រឹត្ត​ក្នុងជីវិត​ដោយមាន​ព្រះ​បន្ទូល​ជួយ​បញ្ជាក់​អ្វីដែលយើងជឿ និងមានសាក្សីដូចលោកយូហានបាទីស្ត និងគ្រីស្តបរិស័ទផ្សេង​ទៀតដែ​លជួយ​ឱ្យ​យើង​មានជំនឿកាន់តែរឹងមាំ។

ប៉ុន្តែអ្វីដែលសំខាន់នោះយើងត្រូវតែជឿ បើកចិត្តឱ្យទូលាយ នោះព្រះជាម្ចាស់នឹងប្រោសប្រទានទីសម្គាល់ និងជួយពង្រឹងជំនឿរបស់យើងកុំឱ្យយើងធ្វើដូចជនជាតិយូដាទៀត។ សូមជូនពរប​ងប្អូនឱ្យ​មា​នសុខ​ភាព​ល្អ និងជូនពរឱ្យមានជំនឿរឹងមាំដើម្បីធ្វើជាសាក្សីយ៉ា​ងពិតប្រាកដរបស់ព្រះយេស៊ូ​ចំពោះ​មុខអ្ន​ក​ដ​ទៃ៕