ថ្ងៃទី០២ ខែមេសា ឆ្នាំ២០២៥អត្ថបទគម្ពីរ យ៉ូហាន (៥,១៧-៣០)អត្ថាធិប្បាយគម្ពីរដោយ៖ លោកបូជាចារ្យ រ៉ាជេត ហាសាពូទី

បងប្អូនជាទីគោរពអត្ថបទថ្ងៃនេះតាមលោកយ៉ូហាន (៥,១៧-៣០) និយាយអំពីទំនាក់ទំនង និង​បេសក​កម្ម​របស់ព្រះបិតា និងព្រះយេស៊ូ។ ព្រះយេស៊ូមានព្រះបន្ទូលថា ព្រះបិតារបស់ខ្ញុំធ្វើ​ការរហូត​មក​ដល់​សព្វថ្ងៃ ខ្ញុំក៏ដូចព្រះអង្គដែរ។ អត្ថបទនេះបញ្ជាក់ថា ការទំនាក់ទំនងរវាងព្រះជា​អម្ចាស់​ជាមួយ​ព្រះយេស៊ូ គឺជាព្រះបិតា និងព្រះបុត្រា។

ព្រះយេស៊ូមានព្រះបន្ទូលជាក់ស្តែងថា ព្រះជា​អម្ចាស់ជា​ព្រះបិតារបស់ព្រះយេស៊ូ គឺព្រះយេស៊ូជាព្រះ​បុត្រា​របស់​ព្រះជាអម្ចាស់នេះ​ជាអត្តសញ្ញាណពិតប្រាកដរបស់ព្រះយេស៊ូ។ បងប្អូនជាទីគោរព! ព្រះយេស៊ូពិតជា​ព្រះបុត្រា​របស់​ព្រះជាអម្ចាស់មែន ដូច្នេះដូចព្រះបិតារបស់ព្រះយេស៊ូធ្វើការរហូតមកទល់សព្វថ្ងៃ ព្រះយេ​ស៊ូ​ក៏ធ្វើការដូចព្រះអង្គដែរ។ ព្រះបិតា និងព្រះបុត្រាទាំងពីរអង្គបានសម្តែងសេចក្តីស្រឡាញ់ និងធម៌​មេត្តា​​ករុណា​ចំពោះ​មនុស្សយើង។

ទាំងពីរអង្គខិតខំធ្វើការសង្គ្រោះ រំដោះមនុស្សយើង​ឱ្យ​រួច​ពីអំពើបាប និងអំពើអាក្រក់គ្រប់បែ​ប​យ៉ាង។ កាល​ឮព្រះយេស៊ូនិយាយអំពីសេចក្តីពិតគឺព្រះជាអម្ចាស់ជាព្រះបិតារបស់ព្រះអង្គ ជនជាតិយូដា​ធ្វើគត់​ព្រះអង្គ​ខ្លាំង​ឡើងៗ។ បងប្អូនជាទីគោរពអត្ថបទនេះបញ្ជាក់ថា កាលណានិយាយសេចក្តីពិត កាល​នោះ​ពួក​យើង​ជួប​ប្រទះឧបសគ្គ និងទុកលំបាកខ្លះៗជាមិនខាន ប៉ុន្តែពួកយើងត្រូវតែនិយាយសេចក្តីពិត​អត្ថ​ប​ទនេះ​បញ្ជាក់ថា ព្រះបិតា និងព្រះយេស៊ូមានទំនាក់ទំនងយ៉ាងជិតស្និទ្ធ។

ព្រះបិតាសព្វ​ព្រះហឫទ័យ​ស្រឡាញ់ព្រះយេស៊ូជាព្រះបុត្រារបស់ព្រះអង្គ។ ​ព្រះយេស៊ូក៏សព្វ​ព្រះហឫទ័យ​ស្រឡាញ់​ព្រះជាអម្ចាស់ជាព្រះបិតាដែរ ព្រះទាំងពីរអង្គមានការទំនាក់​ទំនង​នៃ​សេចក្តីស្រឡាញ់។ ព្រះបិតា និងព្រះបុត្រាមានបេសកកម្មតែមួយ ហើយព្រះយេស៊ូយាងកនៅ​ក្នុង​លោក​នេះ ដើម្បីចែករម្លែក​បេស​ក​កម្ម​របស់ព្រះជាអម្ចាស់ជាព្រះបិតា។ ព្រះយេស៊ូមានព្រះបន្ទូលថា “ខ្ញុំសូមប្រាប់ឱ្យ​អ្នក​រាល់គ្នាដឹងច្បាស់ថា ព្រះ​បុត្រា​ពុំអាចធ្វើអ្វីដោយព្រះអង្គផ្ទាល់បានឡើងគឺព្រះបុត្រាធ្វើ​តែកិច្ចការណា​ដែលទ្រង់បានឃើញ​ព្រះបិតា​ធ្វើប៉ុណ្ណោះ”។

កិច្ចការអ្វីដែលព្រះបិតាធ្វើ ព្រះបុត្រាក៏ធ្វើកិច្ចការនោះដែរ។ បងប្អូនជាទីគោរព! ព្រះយេស៊ូប្រឹងប្រែង ណែ នាំជនជាតិយូដាថា ព្រះយេស៊ូជាព្រះបុត្រារបស់ព្រះជាអម្ចាស់ ព្រះជាអម្ចាស់ចាត់​ព្រះបុត្រា​ដើម្បី​បំពេញ កិច្ចការដែលព្រះអង្គមានព្រះហឫទ័យធ្វើការ។ ព្រះយេស៊ូធ្វើអ្វីទាំងអស់តាមការបញ្ជា​របស់​ព្រះអង្គ ដូច្នេះ ព្រះជាអម្ចស់ប្រោសប្រទានអំណាចវិនិច្ឆ័យមនុស្សលោក និងក្លាយជា​ប្រភពនៃ​ជីវិត​ដល់​ព្រះបុត្រា។ បង ប្អូនជាទីគោរព! អត្ថបទថ្ងៃនេះប្រៀបប្រដៅគ្រីស្តបរិស័ទថា ព្រះយេស៊ូជាព្រះបុត្រា​របស់​ព្រះជាអម្ចាស់ ព្រះអង្គទទួលគ្រប់អំណាចពីព្រះបិតា ព្រះអង្គមិនប្រាថ្នាធ្វើតាមបំណងព្រះអង្គឡើយ​គឺ​ធ្វើតាមព្រះ ហឫ​ទ័យ​របស់ព្រះជាអម្ចាស់ដែលបានចាត់ព្រះអង្គឱ្យមក។

ប្រសិនបើពួកយើងស្តាប់ព្រះបន្ទូលរបស់ព្រះអង្គ​ និងជឿលើព្រះអង្គទាំងស្រុងពួកយើង និងមាន​ជីវិត​អស់​កល្បជានិច្ច ផ្ទុយទៅវិញបើពួកយើងមិនស្តាប់ព្រះបន្ទូល និងមិនជឿលើព្រះអង្គពួកយើងនឹង​ទទួលទោស​ជា​មិនខាន។ បងប្អូនជាទីស្រឡាញ់! សូមអត្ថបទនេះជួយយើងកែប្រែចិត្តគំនិត នឹងពង្រឹងជំនឿរបស់​​យើង សូមអត្ថបទនេះជួយយើងស្វែងយល់អត្តសញ្ញាណរបស់ព្រះយេស៊ូ គឺព្រះ​យេស៊ូជាព្រះបុត្រា​របស់​ព្រះជាអម្ចាស់ ហើយជឿលើព្រះអង្គទាំងស្រុង។ សូមព្រះជាអម្ចាស់ប្រទានពរយើង៕