ថ្ងៃទី០១ ខែកក្កដា ឆ្នាំ២០២៥ អត្ថបទគម្ពីរ (ម៉ាថាយ ៨,២៣-២៧)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

នៅពេលព្រះយេស៊ូ និងក្រុមសាវ័កកំពុងតែឆ្លងទៅត្រើយម្ខាង​ ក៏បានជួបខ្យល់ព្យុះ! ខណៈនោះព្រះយេ​ស៊ូ​កំពុ​ង​តែដេកលក់នៅ​កន្សែងទូក។ បងប្អូនយើងដឹងហើយថាពួកសាវ័កក៏ជាមនុស្សទោះបីពួកគាត់​ដឹងថា​ព្រះយេ​ស៊ូ​មានឫទ្ធានុភាពមានអំណាច តែពួកគាត់នៅតែ​ភ័យខ្លាចចំពោះ​ហេតុការណ៍ដែល​កំពុង​តែបាន​កើត​ឡើង​នៅ​ជុំវិញខ្លួន។

នេះ​​ជាចរិតមួយរបស់យើងដែលជាគ្រីស្តបរិស័ទ ទោះបីយើងមានជំនឿលើព្រះយេស៊ូ ទោះបីយើងមាន​ជំនឿ​​​លើព្រះជាម្ចាស់​ តែជូនកាលយើងក៏មានការភ័យខ្លាចនៅស្ថានភាពជុំវិញ មានការព្រួយបារម្ភនៅក្នុង​បរិយា​កាស​​មិនអំណោយផល។ នៅពេលដែលយើងជួបការបៀតបៀន ឬជួបគ្រោះថ្នាក់អ្វីមួយ ឬ​កំពុង​ជួបមហន្ត​រាយណា​មួយ ពិតមែន! បងប្អូនមានអារម្មណ៍ប្រាប់ថាយើងកំពុងតែជួបបញ្ហា ឬកំពុងតែជួប​រឿង​ដែលធ្វើឱ្យយើង​ប៉ះពាល់ដល់អាយុជីវិត។

ភាពភ័យខ្លាចរបៀបនេះ គឺជារឿងធម្មតាទេ! ភាពភ័យខ្លាច​ធ្វើឱ្យ​យើង​រក​មធ្យោ​បាយ​ការពារខ្លួន ដើម្បី​គេចផុ​តពីគ្រោះថ្នាក់ ប៉ុន្តែសម្រាប់អ្នកជឿយើងមានព្រះយេស៊ូគ្រីស្ត នៅ​ពេល​​ដែលដៃរបស់យើងកំពុង​តែ​ដោះ​ស្រាយ ឬជើងរបស់យើងកំពុងតែរត់គេចចេញ ពេលនោះយើងក៏មាន​ជំនឿ​បានដែរ ជំនឿរបស់យើង គឺ​ធ្វើយ៉ាងម៉េចដើម្បីឱ្យយើងផុតពីគ្រោះកាចបាន។

យើងដឹងថា​ថ្ងៃ​​នេះក្រុ​មសាវ័កបានទៅហៅព្រះអង្គឱ្យជួយ ហើយព្រះអង្គក៏បានបញ្ឈប់ខ្យល់ ពេលនោះ​ពួក​គាត់​​បាន​ជឿ​ថា ព្រះអង្គមានឫទ្ធានុភាពមែន។ ដូច្នេះពេលមនុស្សមានជំនឿ និងមនុស្សអត់មាន​ជំនឿ​ជួប​បញ្ហាដែលខុសគ្នា គឺមនុស្សដែលគ្មានជំនឿព្យាយាមដោះស្រាយបញ្ហាដោយខ្លួនឯង តែសម្រាប់អ្នកជឿ​​បញ្ហា​ដែល​យើងកំពុងតែប្រឈម គឺអាចដោះស្រាយបានត្បិតមានកម្លាំងពីព្រះជាម្ចាស់​ថែមទៀត ​​មាន​​ន័យ​ថា យើងអាចឆ្លងកាត់ភាពគ្រោះថ្នាក់នេះបានដោយមានភាពកក់ក្តៅ ទោះបីនៅគ្រាដែល​​យើង​កំពុង​​ពិបាក យើងដឹងថាយើងមិនអាចរួចផុតគ្រោះថ្នាក់​បាន ក៏យើងអាចទទួលយក​​បញ្ហាដែល​កំពុង​​តែ​កើត​ឡើង​នេះ​បានដែរ៕