ក្នុង១៨០ប្រទេសដែលមានទំនាក់ទំនងពាណិជ្ជកម្មជាមួយនឹងសហរដ្ឋអាមេរិកគ្មានប្រទេសណាមួយអាចរួចខ្លួនឡើយពីគោលនយោបាយកំណត់ពន្ធថ្មីចេញថ្ងៃទី០២ ខែមេសា ឆ្នាំ២០២៥ គ្រាន់តែថា កម្ពុជាជាប់កំណត់ពន្ធខ្ពស់បំផុតគឺដល់ទៅ៤៩ភាគរយ។
អ្វីដែលអាមេរិកសម្រេចនេះ គឺដោយសារតែកម្ពុជានិងអាមេរិកមានអតុល្យភាពពាណិជ្ជកម្មខ្លាំងពេក ប៉ុន្តែធ្វើម៉េចទើបកម្ពុជានិងប្រជាជាតិតតិយលោកផ្សេងទៀតអាចឲ្យមានតុល្យភាពជាមួយនឹងអាមេរិកបាន ដោយរបៀបណា ខណៈដែលកម្ពុជាមានទីផ្សារតែ ១៧ លាននាក់ ហើយអាមេរិកមានរហូតដល់ទៅជាង ៣៤០ លាននាក់។
បើនិយាយអំពីភាពសមរម្យ គឺពិតជាពិបាករក្សាឲ្យមានតុល្យភាពពាណិជ្ជកម្មនេះមែន ហើយសម្រាប់ប្រទេសក្រីក្រឯទៀតក៏មិនខុសពីកម្ពុជាដែរ ករណីដូចជាឡាវ មីយ៉ាន់ម៉ា ជាដើម។
ការកំណត់ពន្ធ៤៩ភាគរយរបស់សហរដ្ឋអាមេរិកនេះគឺចង់ឬមិនចង់ មូលដ្ឋានផលិតកម្មកម្ពុជាដើម្បីនាំចេញទៅអាមេរិក ប្រមាណជា ៣៧ ភាគរយ នៃទំហំនាំចេញសរុប ជាង ២៦,៦ ពាន់លានដុល្លារ ប្រាកដជានឹងប៉ះពាល់។
នៅពេលដែលទីផ្សារនាំចេញ៣៧ភាគរយរងផលប៉ះពាល់នោះមានន័យថា រោងចក្រ៣៧ភាគរយដែលមាននៅកម្ពុជា ហើយផលិតផលិតផលដើម្បីនាំចេញទៅកាន់ទីផ្សារនៅអាមេរិកនឹងមានបញ្ហា ហើយនៅពេលនោះ កម្មករនិងកម្មការនីនៅតាមរោងចក្រទាំងនោះក៏នឹងមានបញ្ហាបន្ត។
នៅពេលដែលកម្មករនិងកម្មការិនីទាំងនោះមានបញ្ហាការងារនោះ អ្នកដែលប៉ះពាល់ដោយប្រយោលនោះគឺ អ្នកជួលផ្ទះ អ្នកលក់ដូផ្សេងៗ។ ហើយសង្ឃឹមថា រាជរដ្ឋាភិបាលនឹងមិនទុកឲ្យវាអាក្រក់បែបនេះទេ។
សូមរង់ចាំមើលចំណាត់ការនិងការដោះស្រាយបញ្ហានេះរបស់រដ្ឋាភិបាល អ្វីដែលយើងត្រូវធ្វើនៅពេលនេះ គឺបន្តកិច្ចខិតខំប្រឹងប្រែងបំពេញការងារជំរុញផលិតផលតាមតួនាទីនិងភារកិច្ចរៀងៗខ្លួន ហើយទុកឲ្យការងារប្រឈមមុខនឹងបញ្ហាថ្នាក់ជាតិបែបនេះទុកជូនអ្នកជំនាញរបស់រាជរដ្ឋាភិបាល។
រាជរដ្ឋាភិបាលជ្រាបរឿងនេះច្បាស់ជាងយើងឆ្ងាយណាស់ ដូច្នេះលោកនឹងសិក្សារកវិធីសាស្រ្តទប់ទល់។ តាមការបកស្រាយរបស់មន្ត្រីជំនាញក្នុងប្រទេសកម្ពុជា បង្ហាញថា ក្រៅពីនាំផលិតផលទៅកាន់សហរដ្ឋអាមេរិក កម្ពុជានៅមានទីផ្សារផ្សេងៗទៀតដែរ ក្រុមប្រទេសដែលជាសមាជិកនៃកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ដែលហៅថា RCEP នៅមានអាស៊ាន ចិន និង សហគមន៍អឺរ៉ុប។
សរុបទៅ យើងនៅតែសង្ឃឹមថា រដ្ឋាភិបាលកម្ពុជាអាចរកវិធីចរចារដើម្បីបន្ធូរបន្ថយពន្ធជាមួយអាមេរិកនៅក្នុងកាលៈទេសៈនេះ ជាពិសេសប្រើភាពវៃឆ្លាតរបស់ខ្លួននិងសក្កានុពលដោយសន្តិវិធីនិងគិតលើប្រយោជន៍រួមសម្រាប់អ្នកក្រីក្រក្នុងប្រទេស៕
Daily Program
