អ្នក​បើក​ប​រនិងលក់ដូរ ​សូម​ចៀស​ចំណតរថយន្តក្រុង

ចំណេះដឹងដែលត្រូវយល់និងជ្រួតជ្រាបមួយគឺថា ចំណតរថយន្តក្រុងនានានៅគ្រប់ទីកន្លែងមិនមែនជាកន្លែងចំណតរថយន្តធម្មតាចូលចត​ហើយក៏មិនមែនជាកន្លែងដែលបងប្អូនប្រជាពលរដ្ឋយកទៅប្រកបរបររកស៊ីចិញ្ចឹមជីវិតឡើយ។

គ្រប់ចំណតទាំងអស់គឺមិនមែនជាកម្មសិទ្ធិរបស់នរណាម្នាក់ឡើយ ហើយក៏មិនមែនជាកន្លែងចំណតសម្រាប់នរណាម្នាក់ដែរ ប៉ុន្តែគឺជាកន្លែងដែលរថយន្តក្រុងកំពុងផ្តល់សេវាដឹកជញ្ជូនសាធារណៈចូលចតដាក់អ្នកដំណើរចុះ និង ទទួលអ្នកដំណើរឡើង។

នៅទីនោះកន្លែងខ្លះគឺគេមានគូសគំនូសពណ៌លឿងព័ទ្ធជុំវិញជារាងចតុកោណ ហើយសរសេរអក្សរនៅក្នុងប្រអប់នោះថែមទៀត ប៉ុន្តែនៅតែមានអ្នកបំពាន​ដោយអ្នកបើកបរខ្វះការយល់ដឹង មួយចំនួន​យកទៅនោះទៅចតរថយន្ត ចតម៉ូតូ ហើយមានទាំងអ្នកចតម៉ូតូកង់បីឥណ្ឌា រង់ចាំម៉ូតថែមទៀតដោយមិនខ្វល់ថា សកម្មភាពបែបនោះវាធ្វើឲ្យរាំងស្ទះសេវាដឹកជញ្ជូនសាធារណៈឡើយ។​

ក្រៅពីចំណតនៅលើផ្លូវចេញ នៅតាមទីកន្លែងចំណតខ្លះគឺនៅខាងលើចិញ្ចើម អាជ្ញាធរបានសាងសង់ដំបូលនិងដាក់កៅអីដើម្បីអោយអ្នកដំណើរអង្គុយចាំរថយន្តក្រុង ប៉ុន្តែមិនដូច្នេះទេ បងប្អូនយើងខ្លះគឺបានទៅចាប់កន្លែងនោះដើម្បីប្រកបរបរចិញ្ចឹមជីវិតទៅវិញ។​

បងប្អូនដែលចត ឫ ក៏បងប្អូនដែលប្រើប្រាស់ចំណតនៅលើចិញ្ចើមផ្លូវដើម្បីរកចំណូលផ្ទាល់ខ្លួនគួរតែបញ្ឈប់សកម្មភាពនេះ ហើយសូមទុកទីនោះគឺជាកន្លែងសាធារណៈមិនមែនជាកន្លែងឯកជនដែលប្អូនអាចធ្វើបែបនោះបានឡើយ។

ក្រៅពីចំណុចអសកម្មទាំងនេះ​ចំណុចមួយដែលយើងគួរដឹងដែរនោះគឺថា នៅចំណតរថយន្តក្រុងឈប់ ក្នុងទីប្រជុំជន អ្នកបើកបរយានជំនិះគ្រប់ប្រភេទត្រូវបន្ថយល្បឿន ហើយបើចាំបាច់ត្រូវឈប់ ដើម្បីទុកឱ្យរថយន្ដក្រុង ចេញ-ចូល ឬ ឈប់បានដោយងាយស្រួល។

ការ​ឈប់​ ឬ​ចត​យាន​ជំនិះ​ ត្រូវ​ទុក​ចន្លោះ​យ៉ាង​តិច​ ១០ម៉ែត្រ​ ពីចំណតរងចាំរថយន្ត​ក្រុង​ឈប់​ ដើម្បីធ្វើយ៉ាងណាសម្រួលដល់អ្នកដំណើរដែលប្រើសេវាកម្មដឹកជញ្ជូននេះ​ហើយក៏ជាចំណុចងាយស្រួលនៅក្នុងការរក្សាសណ្តាប់ធ្នាប់។

សរុបមកវិញចូលជួយស្វែងយល់ចំណុចទាំងនេះ ហើយដើម្បីចូលរួមលើកកំពស់សេវាកម្មរថយន្តក្រុង គឺសូមអស់លោកៈលោកស្រីយល់និងចូលរួមអនុវត្តដើម្បីធ្វើយ៉ាងណារក្សាប្រយោជន៍សាធារណជន​​និងយើងទាំងអស់គ្នា។​