អ្នកពូកែសន្សំលុយអាចសល់ច្រើន ជាងអ្នកដែលពូកែរក !

មនុស្សទាំងបុរសនិងស្រ្តីប្រសិនបើពូកែរកហើយក៏ពូកែសន្សំនោះស្ថានភាពជីវភាពនឹង​ប្រសើរជាលំដាប់ ប៉ុន្តែជាទូទៅកម្រមានអ្នកដែលមានលក្ខណៈសម្បត្តិទាំងពីរនេះទាំងព្រមណាស់។

សម្រាប់អ្នកដែលមានលក្ខណៈសម្បត្តិទាំងពីរនេះ ជីវិតនឹងជួបតែភាពភ្លឺស្វាង ហើយអាចសល់លុយសល់កាក់គ្រប់គ្រាន់ផ្គត់ផ្គង់និងទ្រទ្រង់ជីវភាព​វ័យ​សក្តានុពលការងារធ្លាក់ចុះ  ហើយចំណាយកើនឡើង។

សព្វថ្ងៃនេះ គឺសំបូរអ្នកដែលពូកែរកលុយ ហើយ​ចាយ​លុយទៅវិញ​ក៏​​ច្រើនដែរ។ ធម្មជាតិមិនអាចនៅចាំមនុស្សបានទេ ដរាបណាថ្ងៃនេះយើងរកបានច្រើនយើងក៏ចាយច្រើន ដូច្នេះ​រហូតដល់ពេលដែលយើងឈានចូលដល់វ័យមួយដែលសក្តានុពលការងារថមថយ កម្រិតនៃការរកលុយក៏កាន់ តែធ្លាក់ចុះ ហើយប្រសិនបើមានជំងឺថែមទៀតនោះ ជីវិតគឺដឹងតែវេទនា។

ដើម្បីគេចចេញពីវិបត្តិនិងភាពវេទនានៅពេលអនាគត អ្នកដែលពូកែរកលុយគួរតែរៀនសន្សំលុយទុក​ផង បើមិនដូច្នេះទេ ចុងក្រោយជីវិតយើង​គឺគ្មានអ្វីសល់នឹងគេឡើយ។

សម្រាប់អ្នកដែលពូកែ​សន្សំលុយ ជាទូទៅទោះបីជា​រកលុយបានតិចក៏ពិតមែន ប៉ុន្តែចំនួនលុយដែល​មានគឺកើនឡើងរហូត ប៉ុន្តែទោះបីជាយ៉ាងណាក៏ដោយកុំសន្សំខ្លាំងពេក។ ជីវិតគួរតែមានពេលមានវេលា​ស្វែងរកសេចក្តីសុខខ្លះសម្រាប់ខ្លួនយើង​ និងគ្រួសារ​។ ប្រសិន​បើ​យើងគិតតែសន្សំ ហូបចុកមិនគ្រប់គ្រាន់វាអាចឲ្យយើងប្រឈមមុខនឹងការស្លាប់មុនអាយុ ពោលគឺមិនបានចាយលុយ។

សរុបទៅជីវិត​ល្អ​ប្រសើ​រ​ គឺ​ត្រូវ​ចេះ​ថ្លឹង​ថ្លែង សមាមាត្រ​ការងារ​និង​សុខភាព​។ សម្រាប់អ្នកដែលពូកែរកនិងសន្សំ នៅពេល​ដល់ចំនួនកំណត់គួរតែចេះចែករំលែកចេះធ្វើកុសលឬធ្វើទាន។ ចេះធ្វើកម្មវិធីមនុស្សធម៌ ជួយយក អាសារអ្នកដទៃ នោះយើងកាន់តែបានកុសល និង កាន់តែមានការទទួលស្គាល់។ ហើយសម្រាប់អ្នកដែលពូកែរកលុយគួរតែរៀនសន្សំ ខ្លះកុំរកបាន ១០០ ចាយទាំង១០០ ហើយពេលខ្លះចាយដល់ ១៥០ ដោយអាងថា លុយគង់តែរកបាននៅពេលក្រោយទៀត។ យើង​អាចរកបាន១០០ គួរលៃលកសន្សំទុក៣០ ទៅ​៤០ ភាគរយផងទៅ។ រីឯអ្នកដែលពូកែសន្សំ កុំគិតតែសន្សំអត់របេះ​ឲ្យសោះ។ សូមគិតពីសុខភាព និង លៃលករកការចំណាយខ្លះ ដើម្បីបំពេញសេចក្តីសុខនិងបំប៉នសុខភាពខ្លួនឯង​៕