អ្នកចង់ទៅលេងផ្លូវថ្មើជើង គួរកុំប្រើប្រាស់មធ្យោបាយផ្ទាល់ខ្លួនទៅអី!

នៅពេលនេះប្រជាប្រិយភាពនៃផ្លូវថ្មើជើង ដែលអាជ្ញាធរបានរៀបចំ តាមបណ្តោយមាត់ទន្លេចាប់មុខប្រៃសណីយ៍កម្ពុជា រហូតដល់មុខព្រះបរមរាជវាំងតាំងពី ថ្ងៃទី០១ ខែកុម្ភៈ ឆ្នាំ២០២៥មកនោះ គឺកាន់តែមានការគាំទ្រ ហើយពលរដ្ឋកាន់តែចាប់អារម្មណ៍ ។​

ទន្ទឹមនឹងការគាំទ្រមានការកើនឡើងបែបនេះ នៅរៀងរាល់ល្ងាច ថ្ងៃសៅរ៍ និងថ្ងៃអាទិត្យចាប់ពីម៉ោង៦ល្ងាច ដល់ម៉ោង១១យប់មានមនុស្សម្នាជាច្រើនបានទៅទីនោះដើរលេង និងធ្វើសកម្មភាពកំសាន្តនានាតាមបំណងប្រាថ្នារៀងៗខ្លួន ប៉ុន្តែទន្ទឹមនឹងនោះក៏មានបាតុភាពអសកម្មខ្លះៗបានកើតមានឡើង ។

បាតុភាពអសកម្មទាំងនេះ គឺបញ្ហានៃមធ្យោបាយធ្វើដំណើររបស់បងប្អូនមួយចំនួន​ដែលគាត់ធ្វើដំណើរទៅទីនោះ តាមមធ្យោបាយផ្ទាល់ខ្លួន​ជាម៉ូតូ ជារថយន្ត ជាហេតុនាំឲ្យមានបញ្ហារញ៉េរញ៉ៃខ្លះៗដូចជាការកកស្ទះចរាចរណ៍នៅកន្លែងច្រកចូល​ទៅក្នុងតំបន់ ។

ក្រៅពីនោះគឺមានករណីដណ្តើមម៉ូយផ្ញើយានយន្តដែលប្រជាពលរដ្ឋមួយចំនួនឆ្លៀតឱកាសប្រកបរបរផទទួលផ្ញើរយានយន្តដើម្បីបានកម្រៃដោះស្រាយជីវភាពនិងចិញ្ចឹមជីវិតនេះ ហើយដោយសារតែវាច្រើនក្រុមក៏មានបាតុភាពដូចជារញ៉េរញ៉ៃអាក្រក់ភ្នែក និង ការតវ៉ាជេគ្នាស្រគាត្រចៀកបន្តិច ។​

ក្រៅពីនោះក៏មានលេចឭព័ត៌មានថា មានករណីបាត់ម៉ូតូ​ផងដែរ ហើយដល់ពេលបាត់គឺរកមុខអ្នកដែលទទួលខុសត្រូវមិនឃើញ ។ ម្យ៉ាងវិញទៀតដែរ នៅកន្លែងចង្អៀតក៏ប្រជាពលរដ្ឋបានលើកឡើងអំពីករណីចោរឆក់ ចោរលួច និង ក្រុមឆ្លៀតឱកាសមួយចំនួនផងដែរ ។​​

ទាំងនេះគឺសុទ្ធសឹងតែជាចំណុចអសកម្មដែលបានកើតមាន ហើយយើងខ្ញុំជឿជាក់ថា អាជ្ញាធរក៏លោកបានមើលឃើញចំណុចនេះ ហើយកំពុងតែរិះរកមធ្យោបាយដើម្បីសម្រួលនិងឈានទៅគ្រប់គ្រងស្ថានការណ៍ ។

ដើម្បីកាត់បន្ថយបញ្ហាប្រជាពលរដ្ឋដែលចង់ទៅដើរលេងកំសាន្តនៅតំបន់នោះគួរកុំប្រើប្រាស់មធ្យោបាយផ្ទាល់ខ្លួន​ ពីព្រោះបញ្ហា ចំណតសមរម្យនៅម្តុំបរិវេណជុំវិញតំបន់នោះមិនសូវសំបូរឡើយ ។ យើងខ្ញុំសូមលើកទឹកចិត្តឲ្យបងប្អូនអ្នកចាប់អារម្មណ៍ងាកមកប្រើប្រាស់មធ្យោបាយដឹកជញ្ជូនសាធារណៈ ជារថយន្តក្រុងសាធារណៈ ហើយចុះដើរមក និង សេវាកម្មដឹកជញ្ជូនសាធារណៈផ្សេងៗទៀត ។

ករណីផ្សេងៗដោយសារតែជាបរិវេណចំហរ រឿងសន្តិសុខសុវត្ថិភាពជាពិសេសគឺទ្រព្យសម្បត្តិក៏ជារឿងពិបាកឲ្យសមត្ថកិច្ចជួយបានដែរ ។ បញ្ហានេះវាមិនមែនកើតមានតែនៅកម្ពុជានោះទេ នៅថៃ នៅហ្វីលីពីន​នៅវៀតណាម ជាដើម កន្លែងណាដែលមានមនុស្សច្រើន គឺតែងតែមានក្រុមឆ្លៀតឱកាសហើយ ។

សរុបមក ដើម្បីលុបបំបាត់ភាពអសកម្មទាំងនេះយើងទាំងអស់គ្នាគួរកុំប្រើប្រាស់មធ្យោបាយធ្វើដំណើរផ្ទាល់ខ្លួនទៀតទៅ  ហើយពេលដែលដើងលេងក៏មិនត្រូវធ្វេសប្រហែសដែរ ។ ដើម្បីសុវត្ថិភាពពេលដែលចង់ទៅលេងទីនោះកុំយកទ្រព្យសម្បត្តិឫវត្ថុមានតម្លៃតាមខ្លួនច្រើនពេក វាគ្រោះថ្នាក់បាត់មិនដឹងមុខ ។