សុភមង្គលជីវិតគឺត្រូវតស៊ូនិងសង្ឃឹម
![](/sites/default/files/styles/max_width_770px/public/2024-03/vicaarnnkthaa_151.jpg?itok=l1eEQWm_)
រូបភាពនៃការយំ សើច សប្បាយកើតទុក្ខ គឺមានគ្រប់គ្នាមិនថាអ្នកមាន ឬអ្នកក្រឡើយ ដូច្នេះសូមកុំច្រណែនគេ ហើយប្រឹងប្រែងដើម្បីភាពរីកចម្រើននៃគ្រួសារយើងទាំងអស់គ្នា។
មកដល់ពេលនេះនៅលើបណ្តាញសង្គមគឺមានចម្រុះ ប៉ុន្តែនិន្នាការបង្អួតពីភាពហ៊ឺហារ សប្បាយរីករាយគឺកាន់តែមានច្រើន ដែលនាំអោយអ្នកខ្លះអាចនឹងទោមនស្សខ្លះ ប៉ុន្តែទោះបីជាយ៉ាងណាក៏ដោយសូមកុំទោមនស្ស។
ការយំ ការសើច ការសប្បាយ និងការកើតទុក្ខនេះគឺជាសច្ចៈភាពនៃជីវិតហើយគ្រប់គ្នាគឺសុទ្ធតែមានដូចគ្នាគ្រាន់តែរូបភាពនិងបញ្ហាដែលបង្កឲ្យយំ អោយសើច អោយកើតទុក្ខឲ្យសប្បាយគឺវាខុសៗគ្នា។
អ្នកខ្លះឃើញផុសនិងចែករំលែករូបភាពសប្បាយហ៊ឺហារ ឡូយឆាយប៉ុន្តែធាតុពិតនៅក្នុងចិត្តមិនដឹងថា ពួកគេកំពុងតែកើតទុក្ខរឿងអ្វីផងក៏មាន។ ហើយចំណែកអ្នកខ្លះឃើញកើតទុក្ខក៏កុំភ្លេចថាគេក៏មានរឿងសប្បាយនិងរីករាយដែលគេមិនបង្ហាញក៏មានដែរ។ ជីវិតគឺបែបនេះ ប្រសិនបើយើងឃើញគេសប្បាយហើយច្រណែនក្តៅក្រហាយគេ គេងមិនលក់បក់មិនល្ហើយនោះហើយទើបជាបញ្ហា។
មកដល់ពេលនេះអ្នកមានក៏ហូបបាយមួយចំអែត ហើយអ្នកក្រក៏មួយចំអែត ពោលគឺគ្មាននរណាអាចទទួលទានពីរចំអែតបានទេ។ ដោយឡែកផឹកស្រាសបិទដោយខ្លួនយើងក៏ស្រវឹង ហើយអ្នកផឹកស្រាបារាំងនាំចូលមានតម្លៃថ្លៃក៏ស្រវឹងដូចតែគ្នាប៉ុណ្ណោះ។
នៅពេលដែលយើងមានអារម្មណ៍ស្មុគស្មាញនៅក្នុងចិត្តយំចុះ កើតទុក្ខចុះ ប៉ុន្តែកុំបោះបង់ក្តីសង្ឃឹម ហើយសូមកុំទម្លាក់ដៃពីការខំប្រឹងប្រែង។ យើងអាចយំបាននៅថ្ងៃនេះតែត្រូវតែខំប្រឹងដើម្បីស្នាម ញញឹមហើយរីករាយនៅថ្ងៃស្អែកខានស្អែក។
ជីវិតរស់នៅគឺបែបនេះ សូមរស់តាមសមាជីវោរៀងៗខ្លួន ប៉ុន្តែគ្រប់គ្នាត្រូវតែខំប្រឹងប្រែងតាមការទទួលខុសត្រូវដោយស្មើភាព។ គ្មានស្នាមញញឹមនិងសប្បាយរីករាយណាដែលអាចទទួលល្អបំផុតដោយចេញពីការខិតខំនិងបង្កើតឡើងដោយដៃរបស់យើងទាំងទ្វេរនោះទេ ។ សូមកុំដេកច្រណែនគេ ពីព្រោះការច្រណែន គ្មានចំណេញឡើយ ហើយចុងក្រោយអ្នកដែលឈឺបំផុតគឺយើងជាអ្នកច្រណែនគេនេះឯង៕
Daily Program
![Livesteam thumbnail](/sites/default/files/inline-images/live-stream-thumb.jpg)