ពលរដ្ឋយើងគួរតែកាត់បន្ថយ ឬជៀសវាងអាហារឆៅ
![](/sites/default/files/styles/max_width_770px/public/2024-05/vicaarnnkthaa_35.jpg?itok=d8m1HsfW)
តាំងពីដើមរៀងមក មុខម្ហូបឆៅនៅក្នុងសង្គមខ្មែរគឺមាន ប៉ុន្តែមិនសូវសំបូរដូចជាសម័យបច្ចុប្បន្ននេះឡើយហើយមុខម្ហូប ដែលឆៅនេះគឺត្រូវឆ្លងកាត់វិធីសម្លាប់មេរោគ និងលាងសម្អាតជាច្រើនដែលល្មមនឹងអាចជម្រុះ មេរោគ និងបាក់តេរីបានច្រើន។
ម្ហូបឆៅដែលមាននៅក្នុងសង្គមខ្មែរយើងគឺមានពីពពួកត្រី ក្តាម និងបន្លែស្រស់ៗដែលនេសាទនិងបេះថ្មីស្រស់ៗ នៅតាមប្រភពដែលចាត់ទុកថា មានបរិយាកាសស្អាតមិនបំពុល ឡើយ ហើយវិធីសាស្រ្តនៃការធ្វើទៀតសោតគឺឆ្លងកាត់ការបុក ការច្របាច់ ការលាងយ៉ាងសម្រិតសម្រាំង ដែលអាចធានាថា ពពួកបាក់តេរី ឫមេរោគអាចជម្រុះបានច្រើន ប៉ុន្តែឥឡូវនេះមិនដឹងជាស្អីទេ គឺឃើញគ្រប់យ៉ាង តាំងពីមឹក បង្គា ត្រី សាច់គោ ហើយប្លែកៗជាច្រើន។
អាហារឆៅទាំងនេះត្រូវបានផ្សព្វផ្សាយហើយអន្ទងតាមគ្នានៅលើបណ្តាញសង្គម ហើយក៏មានហាងដែលបម្រើអាហារទាំងនេះបើកឡើងព្រោងព្រាត ដូច្នេះសូមលើកកំពស់ការប្រុងប្រយ័ត្នផង។
ជាទូទៅការទទួលទានអាហារឆៅវាមិនមែនមិនល្អនោះទេ ដូចជាករណីអាហាររបស់ជនជាតិ ជប៉ុនជាដើមគឺមានឆៅជាច្រើន ប៉ុន្តែយើងមើលប្រភពនៃត្រី ការត្រួតពិនិត្យ ការពង្រឹង ការគ្រប់គ្រងស្តង់ដាអនាម័យរបស់អាហារគេ កន្លែងគេរៀបចំម្ហូបទៅដឹងហើយ។ អាហារទាំងនេះ ងាយស្រួលនឹងពពួកបាក់តេរីនិងមេរោគជ្រៀតចូលណាស់ ប្រសិនបើដំណើរការនៃការរៀបចំ អាហារទាំងនេះគ្មានស្តង់ដាបច្ចេកទេស និងបទដ្ឋានច្បាស់លាស់ទេនោះ។
អាហារឆៅតម្រូងឲ្យគេគ្រប់គ្រងតាំងពីស្តង់សីតុណ្ហភាព អនាម័យកាំបិទ ជ្រុញ កែវចាន ក្រណាត់ និងសំភារៈគ្រប់យ៉ាង ដែលប្រើប្រាស់ ប៉ុន្តែងាកមកតាមហាងនិងកន្លែងដែលបម្រើសេវាកម្មអាហារមួយចំនួននៅក្នុងសង្គមយើងនៅពេលនេះភាគច្រើននៅមិនទាន់បំពេញតាមស្តង់ដាគ្រប់គ្រាន់ទេ ហើយប្រភពនៃអាហារទាំងនេះក៏មិនដឹងច្បាស់ដែរ ។
ឃើញទេបងប្អូន សាច់បង្កកគ្មានអនាម័យ គ្រឿងសមុទ្រមានសារធាតុគីមី ទិដ្ឋភាពនៅកន្លែងលក់ រូបភាពនៃការដឹកជញ្ជូន ដំណើរការវេចខ្ខប់អាហារ គឺសុទ្ធសឹងតែមានចំណុចដែលខ្វះខាត ដែលយើងមិនគួរប្រថុយប្រថាននៅក្នុងការយកខ្លួន និងសុខភាពយើងទៅសាកល្បងឡើយ ។
បងប្អូនកាត់បន្ថយបានគួរតែកាត់ទៅ ហើយប្រសិនបើយកល្អគួរណាស់តែជ្រើសរើសពពួកអាហារទាំងនេះដែលចំអិន ពីព្រោះវាគឺជាវិធីសាស្រ្តតែមួយដែលមានសុវត្ថិភាពសម្រាប់ធានា សុខភាពយើងទាំងអស់គ្នា៕
Daily Program
![Livesteam thumbnail](/sites/default/files/inline-images/live-stream-thumb.jpg)