តើយើងរស់ជាមួយចំណីអាហារពុលដល់ពេលណា?
![](/sites/default/files/styles/max_width_770px/public/2024-02/vicaarnnkthaa_126_0.jpg?itok=-BaA3rIY)
បញ្ហានិងការរកឃើញសារធាតុដែលពុលនៅក្នុងចំណីអាហារនៅស្រុកយើងត្រូវបានគេកំណត់រកឃើញពីមួយទៅមួយជាបន្តបន្ទាប់ ដូច្នេះមិនដឹងថា តើពេលនេះបានពលរដ្ឋកម្ពុជាលែងរស់នៅក្នុងភាពភ័យខ្លាចនៃបញ្ហានេះឡើយ ។
ពីមុនៗមកជំនាញបានរកឃើញសារធាតុបំពុលនៅលើគ្រឿងសមុទ្រ ក្រោយមកបន្លែ ហើយក៏មាននៅលើសាច់ គ្រឿងបន្លាក់ គុយទាវ ក្រោយមកទៀតនៅលើខ្ញី ប៉ុន្តែថ្មីៗនេះជំនាញគឺបានរកឃើញនៅលើពពុះសណ្តែកថែមទៀត ។
ហ៊ឺតើនៅពេលណាទើបសង្គមកម្ពុជាយើងអាចរំដោះខ្លួនចេញពីការភ័យខ្លាចនៃការបំពុលចំណីអាហារទាំងនេះអស់ទៅ ?
តាមសេចក្តីរាយការណ៍របស់ជំនាញកាលពីថ្ងៃទី ៣០ ខែមករា ឆ្នាំ២០២៤ មន្រ្តីសាខា អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និង បង្រ្កាបការក្លែងបន្លំ ខេត្តត្បូងឃ្មុំ កំពង់ស្ពឺ ព្រះសីហនុ និងរាជធានីភ្នំពេញ បានចុះត្រួតពិនិត្យផលិតផលទំនិញនៅតាមបណ្តាផ្ទះលក់ទំនិញ និងទីផ្សារនានា ដោយបានធ្វើតេស្តបឋមលើទំនិញហូបចុក និងត្រួតពិនិត្យយ៉ាងហ្មត់ច៉ត់លើទំនិញចម្រុះគ្រប់ប្រភេទ។
ជាលទ្ធផល តាមរយៈការធ្វើតេស្តបឋម មន្ត្រីជំនាញបានរកឃើញ ពពុះសណ្តែក ផ្ទុកសារធាតុគីមីបូរ៉ាក់ (Borax) ចំនួន ៩គីឡូក្រាម ទំនិញចម្រុះរួមមាន គ្រាប់ពូជចំរុះ ឡេ យិនសិន ហួសអាយុកាលប្រើប្រាស់និងពុំអនុលោមតាមបទដ្ឋានព័ត៌មានអ្នកប្រើប្រាស់ចំនួន ៣២,៤៥គីឡូក្រាម និង ទំនិញរំលោភបំពានសិទ្ធិផ្តាច់មុខចំនួន ២០៨,២២គីឡូគ្រាម។ ទំនិញដែលពុំមានមិនអនុលោមភាព ត្រូវបានមន្ត្រីយើងដកហូត យកមករក្សាទុកនៅស្នាក់ការសាខា ដើម្បីបន្តនីតិវិធី។
ពាក់ព័ន្ធនឹងបញ្ហានេះ មន្រ្តីមិនបានលំអិតថា ពពុះសណ្តែក ដែលផ្ទុកសារធាតុគីមីបូរ៉ាក់នេះគឺរកឃើញនៅខេត្តណានោះទេ ប៉ុន្តែគេដឹងថា ម្សៅនេះជាសារធាតុគីមីដែលគ្រោះថ្នាក់ចំពោះសុខភាព ហើយក៏អាចសម្លាប់មនុស្សបានដែរប្រសិនបើដាក់នៅក្នុងកម្រិតហូសបរិមាណដែលរាងកាយទ្រទ្រង់បាន ។
បូរ៉ាក់នេះ ត្រូវបានគេហៅម្យ៉ាងទៀតថា ជាទឹកបន្សារ ដែលមានសណ្ឋានជាក្រាមម្សៅសៗ ហើយគេប្រើប្រាស់វាធ្វើជាថ្នាំសំលាប់សត្វល្អិត គ្រឿងសំអាង ហើយក៏ត្រូវបានគេធ្លាប់ប្រើនៅក្នុង ផលិតកម្មចំណីអាហារ ដើម្បីជាជំនួយអាហារឱ្យមានសភាពស្វិត និងរឹងល្អ ដូចជាប្រើក្នុងល្បាយសាច់បាត់តេ ប្រហិត ឬល្បាយម្សៅ គុយទាវ មី ហើយ លើសពីនេះទៅទៀត បូរ៉ាក់ក៏ជួយឲ្យជាតិម្សៅឡើងស្រួយល្អពេលគេយកនំនិងចំណីទៅបំពង ក្នុងនោះមាន សាច់មាន់ បង្គារ ឆៃយ៉ ជាដើម ក្រៅពីនេះ វាក៏ជាសារធាតុដែលអាច ប្រឆាំងនឹងពពួកបាក់តេរី និងពពួកផ្សិត ដែលអាចអោយអាហាររក្សាទុកបានយូ តែវាគ្រោះថ្នាក់ប្រសិនបើប្រាស់ខុសបច្ចេកទេស ។
ការប្រើបរ៉ាក់ ហួសកំរិតនឹងបង្កឱ្យមានបញ្ហា តំរងនោម ឈឺក្បាល រលាកប្រព័ន្ធរំលាយអាហារ ក្រពះ ពោះវៀន ថ្លើម រមាស់ស្បែក និងអាចដល់អាយុជីវិតក៏មាន។ អង្គការសុខភាពពិភពបានកំណត់ស្តង់ដារនៃការប្រើប្រាស់សារធាតុនេះ ក្នុងកំរិត ០,១៦មីល្លីក្រាមក្នុងមួយគីឡូក្រាមនៃម៉ាសមាឌមនុស្ស។ មនុស្សធំពេញវ័យ អាចនឹងស្លាប់បាន ប្រសិនបើទទួលទានអាហារដែលមានសារធាតុបូរ៉ាក់ចូលក្នុងខ្លួនក្នុងកំរិត៧ទៅ៣៥ក្រាម ប៉ុន្តែកុមារគឺគ្រោះថ្នាក់ភ្លាមប្រសិនបើពួកគេទទួលទានអាហារដែលមានសារធាតនេះត្រឹមតែ៥ក្រាម ដោយពូកគេ អាចបង្កឱ្យជួយគ្រោះក្អួតធ្លាក់ឈាម និងស្លាប់បាន។
សរុបសេចក្តីទៅ សូមលើកកំពស់និងនាំគ្នាចូលរួមលុបបំបាត់ករណីនេះ ហើយបើចង់ឲ្យជាក់ស្តែងជនល្មើសគឺគួរតែត្រូវផ្តន្ទាទោសដោយច្បាប់ ខណៈដែលមកដល់ពេលនេះដូចជានៅមិនទាន់ឃើញករណីផ្តន្ទាទោសណាមួយកើតឡើងនៅឡើយទេទាក់ទងនឹងបញ្ហានេះ ។
Daily Program
![Livesteam thumbnail](/sites/default/files/inline-images/live-stream-thumb.jpg)