ចង់អោយប្រទេសយើងស្អាត! គឺអាចសម្រេចបានដោយសារយើងទាំងអស់គ្នា

សម្រស់ធម្មជាតិ និងបេតិកភណ្ឌវប្បធម៌ដ៏សម្បូរបែបរបស់ប្រទេសកម្ពុជា គឺជាប្រភពនៃមោទនភាពសម្រាប់ប្រជាជនរបស់ខ្លួន ប៉ុន្តែបញ្ហាសំរាមដែលកំពុងកើនឡើងបានកំពុងតែធ្វើឲ្យប្រឡាក់ប្រឡូសដល់រតនៈសម្បត្តិទាំងនេះ ។

ពាក្យស្លោក "កម្ពុជាស្អាត ខ្មែរអាចធ្វើបាន" បង្កប់នូវសារដ៏មានថាមពលនៃក្តីសង្ឃឹម និងការទទួលខុសត្រូវ នៅពេលដែលយើងរិះគិតនិងចូលរួម ទិវាសម្អាតពិភពលោក។ យុទ្ធនាការ​នេះ​មិន​មែន​គ្រាន់​តែ​ជា​ការ​រើស​សំរាម​ក្នុង​មួយ​ថ្ងៃ​ប៉ុណ្ណោះ​ទេ វាគឺជាយុទ្ធនាការដែលនិយាយ អំពីការលើកកម្ពស់វប្បធម៌អនាម័យ និងការថែរក្សាបរិស្ថាននៅពេញមួយជីវិតរបស់យើងទាំងអស់គ្នា ។

ការ​គ្រប់​គ្រង​កាក​សំណល់​នៅ​កម្ពុជានៅពេលនេះនៅតែបន្ត​ប្រឈម​មុខ​នឹង​បញ្ហា​ធំៗជាច្រើន ។ នៅតាមផ្លូវនិងទីលានសាធារណៈនានាគឺនៅតែបន្តនៅសេសសល់ សំរាម ខណៈដែលប្រភពទឹកនានា កំពុងតែរងគ្រោះដោយការទន្រ្តានចូលដោយ ផ្លាស្ទិច ។ ទាំងនេះគឺជាទិដ្ឋភាពអកុសលដែលមើលទៅដូចជា ធម្មតាប៉ុន្តែ បញ្ហាទាំងនេះមិនត្រឹមតែធ្វើឱ្យខូចមុខមាត់ប្រទេសប៉ុណ្ណោះទេ ថែមទាំងបង្កគ្រោះថ្នាក់ដល់សុខភាព និងបរិស្ថានធ្ងន់ធ្ងរទៀតផង។ ការអនុវត្តការចោលកាកសំណល់មិនត្រឹមត្រូវបានកំពុងតែ នាំឱ្យមានការបំពុលទឹក ការបំពុលបរិយាកាស និងការរីករាលដាលនៃជម្ងឺ ដែលប៉ះពាល់ដល់ជីវិតរបស់យើង និងជីវិតរបស់មនុស្សជំនាន់ក្រោយ។

ទិវាសម្អាតពិភពលោកផ្តល់ឱកាសដ៏ល្អដើម្បីឆ្លុះបញ្ចាំងពីទម្លាប់របស់យើង និងធ្វើការផ្លាស់ប្តូរប្រកបដោយអត្ថន័យ។ ប្រសិនបើប្រជាជនកម្ពុជាគ្រប់រូបទទួលខុសត្រូវផ្ទាល់ខ្លួនក្នុងការកាត់បន្ថយកាកសំណល់ និងការចោលសំរាមឱ្យបានត្រឹមត្រូវនោះ យើងអាចសម្រេចបានប្រទេសជាតិស្អាត និងមានសុខភាពល្អ។ យើងទាំងអស់គ្នាអាចចូលរួមបាន តាមសកម្មភាពសាមញ្ញៗដូចជាការប្រើថង់ដែលអាចប្រើឡើងវិញបាន ការទុកដាក់វត្ថុដែលអាចកែច្នៃឡើងវិញបានត្រឹមត្រូវ និងការចោលកាកសំណល់នៅកន្លែងដែលមានសុវត្ថិភាព ។

ក្រៅពីនេះសាលារៀន និងអ្នកដឹកនាំសហគមន៍គួរតែដើរតួនាទីយ៉ាងសកម្មក្នុងការអប់រំសាធារណៈជនអំពីសារៈសំខាន់នៃអនាម័យ និងការគ្រប់គ្រងសំណល់ប្រកបដោយនិរន្តរភាព។

"កម្ពុជាស្អាត ខ្មែរអាចធ្វើបាន" លើសពីពាក្យស្លោក; វាជាការអំពាវនាវឱ្យធ្វើសកម្មភាពនិងចូលរួមទាំងអស់គ្នា។ តាមរយៈការទទួលយកផ្នត់គំនិតនេះ យើងអាចប្រែក្លាយប្រទេសដ៏ស្រស់ស្អាតរបស់យើងទៅជាកន្លែងស្អាត និងមានសុខភាពល្អសម្រាប់ទាំងអស់គ្នា។ ចូរយើងធ្វើការជាមួយគ្នា មិនមែនត្រឹមតែទិវាសម្អាតពិភពលោកប៉ុណ្ណោះទេ ប៉ុន្តែជារៀងរាល់ថ្ងៃ ដើម្បីកសាងអនាគតប្រកបដោយនិរន្តរភាព។ អំណាច​នៃ​ការ​ផ្លាស់​ប្តូរ​គឺ​ស្ថិត​នៅ​ក្នុង​ដៃ​របស់​យើងទាំងអស់គ្នា ។