សូមប្រុងប្រយ័ត្នខ្ពស់ និងចូលរួមបង្ការជំងឺគ្រុនឈាមទាំងអស់គ្នាបន្តទៀត ស្របពេលដែលមានសារមួយរំលឹកផង និងជាการព្រមានផងពាក់ព័ន្ធនឹងភាពងាយរងគ្រោះរបស់ស្ត្រីមានផ្ទៃពោះ។ នាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាលកាលពីចុងខែកក្កដាកន្លងទៅនេះ បានចេញសារនៅលើបណ្តាញសង្គមថា ជំងឺគ្រុនឈាមបង្កដោយមូសខ្លាខាំភាគច្រើននៅចន្លោះពេលព្រឹក និងពេលល្ងាច ដែលអាចបង្កគ្រោះថ្នាក់ធ្ងន់ធ្ងរដល់សុខភាពម្តាយ និងទារក។ ប្រភពដដែលបានអះអាងថា ជំងឺនេះវាអាចឆ្លងដល់ទារកក្នុងផ្ទៃ ជាពិសេសស្ត្រីមានផ្ទៃពោះនៅត្រីមាសចុងក្រោយ។
កុំប្រហែសឱ្យសោះ សូមស្ត្រីមានផ្ទៃពោះទាំងអស់ប្រញាប់ទៅមណ្ឌលសុខភាព និងមន្ទីរពេទ្យដែលនៅជិតអ្នកបំផុត ប្រសិនបើមានរោគសញ្ញាមួយចំនួន ដែលរួមមាន៖ ក្តៅខ្លួនខ្លាំង (មានកំដៅលើសពី ៣៨°C) ឈឺក្បាល ឈឺសាច់ដុំ ឡើងកន្ទួលក្រហមលើស្បែក និងក្អួតចង្អោរជាដើម។
ជំងឺប្រភេទនេះមិនអាចប្រហែសបានទេ ហើយតាមសេចក្តីរាយការណ៍ដោយសារព័ត៌មាននានា បានឱ្យដឹងថា នៅក្នុងខែមិថុនា ឆ្នាំ២០២៦ គ្រាន់តែមន្ទីរពេទ្យគន្ធបុប្ផាមួយគឺបានពិនិត្យ និងព្យាបាលកុមារ និងស្ត្រីចំនួន ១០៧,៣១១នាក់ ក្នុងនោះកុមារមានជំងឺគ្រុនឈាមមានចំនួន ១,៨៩២នាក់។ ដោយឡែក ក្រសួងសុខាភិបាលកម្ពុជាបានឱ្យដឹងថា ដោយគិតត្រឹមដើមខែមិថុនា ឆ្នាំ២០២៦ កម្ពុជាមានអ្នកឆ្លងជំងឺគ្រុនឈាមប្រមាណ ១២,០០០ករណី។
នៅក្នុងស្ថានភាពនេះ ក្រសួងសុខាភិបាលកំពុងតែឃ្លាំមើល និងយកចិត្តទុកដាក់ដោយធ្វើសកម្មភាពជាបន្តបន្ទាប់ ប៉ុន្តែទោះបីជាយ៉ាងណាក៏ដោយ យើងជាប្រជាពលរដ្ឋគ្រប់គ្នាក៏គួរតែយកចិត្តទុកដាក់ចូលរួមក្នុងការប្រុងប្រយ័ត្ន បង្ការ និងការពារខ្លួនទាំងអស់គ្នា។ សូមកុំប្រហែស គួរចូលរួមសកម្មភាពនានានៅក្នុងគ្រួសារ សហគមន៍ សូម្បីសង្គមទាំងមូល ដើម្បីរួមគ្នាប្រយុទ្ធប្រឆាំងនឹងជំងឺដ៏កាចសាហាវនេះឱ្យកាន់តែសកម្ម។
នៅក្នុងករណីដែលយើងចូលរួមបង្ការ និងការពារជំងឺនេះ និងជំងឺផ្សេងទៀតបាន សង្គមរបស់យើងក៏នឹងប្រសើរ ហើយសុខភាពរបស់យើងក៏កាន់តែល្អ នោះសុខមាលភាពជារួមរបស់ប្រជាពលរដ្ឋយើងក៏កាន់តែប្រសើរ ដែលជាបច្ច័យមួយរួមចំណែកដល់ការកែលម្អនូវគុណភាពជីវិត និងជីវភាពពលរដ្ឋយើងទាំងអស់គ្នាបន្តទៀត។
សរុបទៅ ជំងឺគ្រុនឈាមនៅតែជាបញ្ហាសុខាភិបាលសាធារណៈដ៏គួរឱ្យព្រួយបារម្ភ ជាពិសេសចំពោះស្ត្រីមានផ្ទៃពោះ និងកុមារ ដែលអាចប្រឈមនឹងផលវិបាកធ្ងន់ធ្ងរ។ ទោះបីជាក្រសួងសុខាភិបាល និងស្ថាប័នពាក់ព័ន្ធកំពុងអនុវត្តវិធានការទប់ស្កាត់ និងតាមដានជាបន្តបន្ទាប់ក៏ដោយ ការចូលរួមពីប្រជាពលរដ្ឋគ្រប់រូបនៅតែមានសារៈសំខាន់។ ការលុបបំបាត់កន្លែងបង្កាត់មូសខ្លា ការការពារខ្លួនពីការខាំរបស់មូស និងការប្រញាប់ទៅពិនិត្យព្យាបាលនៅមណ្ឌលសុខភាព ឬមន្ទីរពេទ្យនៅពេលមានរោគសញ្ញា គឺជាវិធានការចាំបាច់ដើម្បីកាត់បន្ថយហានិភ័យ និងការពារអាយុជីវិត។ ការសហការរបស់គ្រួសារ សហគមន៍ និងសង្គមទាំងមូល នឹងរួមចំណែកកាត់បន្ថយការរីករាលដាលនៃជំងឺគ្រុនឈាម និងលើកកម្ពស់សុខមាលភាព និងគុណភាពជីវិតរបស់ប្រជាពលរដ្ឋកម្ពុជាឱ្យកាន់តែប្រសើរឡើង។
Daily Program
