ជាការពិតវិស័យសុខាភិបាលនៅតែមានបញ្ហារឿងក្រមសីលធម៌ដោយសារតែពាក្យសម្ដី និង ឥរិយាបទនៅសេសសល់របស់ក្រុមគ្រូពេទ្យនិងវេជ្ជបណ្ឌិតខ្លះ ប៉ុន្តែនិន្នាការនៃការកែប្រែគឺមាន ទន្ទឹមនឹងនោះអ្វីដែលគួរឲ្យគាំទ្រនិងកោតសរសើរឃើញថា មានច្រើននៅក្នុងឆ្នាំ ២០២៤ ដូចជាការពង្រឹងសេវាកម្មព្យាបាលតំាងពីកម្រិតមណ្ឌលសុខភាព សំដីសំដៅនិងឥរិយាបទរបស់ក្រុមគ្រួពេទ្យជាដើម ។ល។
យោងទៅតាមសមិទ្ធផលដែលក្រសួងនេះបានលើកឡើង គឺមានចំណុចវិជ្ជមានច្រើន ហើយចំណុចដែលគួរឲ្យកត់សម្គាល់ខ្លាំងបំផុតគឺពាក់ព័ន្ធនឹងកម្មវិធីផ្តល់សេវា ឬបញ្ចូលសេវាព្យាបាលជំងឺមិនឆ្លងចម្បងៗទៅក្នុងមូលដ្ឋានសុខភាពសាធារណៈនៅតាមមន្ទីរពេទ្យនានាមានការកើនឡើងជាលំដាប់ ។
ក្រសួងសុខាភិបាលបានប្រកាសថា ការប្រើប្រាស់សេវាជំងឺមិនឆ្លងកំពុងតែកើនឡើង ដែលមានដូចជា សេវាព្យាបាលជំងឺទឹកនោមផ្អែម កើនឡើង៥៩ភាគរយ ជំងឺឡើងសំពាធឈាមកើនឡើង ២១ភាគរយ រីឯបញ្ហាសុខភាពផ្លូវចិត្តក៏មានការកើនឡើងដែរ។
ក្រៅពីនោះទៀត ក្រសួងក៏បានអះអាងពីការរក្សាកំណើននៃការចំណាយនៃប្រព័ន្ធគាំពារសុខភាពសង្គមរបស់រាជរដ្ឋាភិបាលដើម្បីជួយដល់គ្រួសារក្រីក្រ គ្រួសារងាយរងគ្រោះ និងក្រុមប្រជាជនគោលដៅផ្សេងៗ ឲ្យទទួលបានសេវាថែទាំងសុខភាពកាន់តែមានសមធម៌។
ក្រសួងក៏បានអះអាងពីសន្ទស្សន៍នៃការគ្របដណ្តប់សេវាសុខាភិបាលជាសាកលដែលបានកើនឡើងពី ៥៨ នៅឆ្នាំ២០២១ ដល់ ៦០ ភាគរយនៅក្នុងឆ្នាំ២០២៤។
ផ្អែកតាមរបាយការណ៍យើងឃើញថា វិស័យសុខាភិបាលពិតជាកែប្រែឆ្ពោះទៅរកភាពប្រសើរ ហើយពលរដ្ឋក៏មានទំនុកចិត្តខ្លះៗហើយ ទើបធ្វើឲ្យការប្រើប្រាស់សេវាសាធារណៈកើនឡើងដូច្នេះ។ ប៉ុន្តែ វាក៏ជាការព្រួយបារម្ភផងដែរ ចំពោះការកើនឡើងនេះ ព្រោះយើងមិនទាន់ដឹងច្បាស់ថា តើកន្លងមកពលរដ្ឋកើតជំងឺមិនឆ្លងនេះច្រើន ឬជំងឺនេះ កើនឡើងក្នុងពេលប៉ុន្មានឆ្នាំនេះដែលធ្វើឲ្យពលរដ្ឋសម្រុកទៅប្រើសេវាកម្មរបស់រដ្ឋនោះឡើយ។
ប្រជាពលរដ្ឋប្រើប្រាស់សេវាកម្មរដ្ឋ គឺល្អប្រសើរហើយ ប៉ុន្តែក្រសួងសាម៉ី និងរដ្ឋាភិបាល គួរតែរកវិធីសាស្ត្រ ដើម្បីបំបាត់ភាពអសកម្មរបស់ខ្លួន និងបំបាត់ជំងឺមិនឆ្លងទាំងនេះក្នុងស្រទាប់ពលរដ្ឋផងដែរ។
សរុបទៅប្រសិនបើយើងពិតជាមានភាពស៊ីគ្នារវាងតថភាពជាក់ស្តែងនិងសមិទ្ធផលដូចនៅក្នុងរបាយការណ៍យើងពិតជារីករាយស្វាគមន៍។ យើងខ្ញុំជាប្រជារាស្រ្តពិតជាចង់ឃើញថា សមត្ថភាព និង ក្រមសីលធម៌ ក៏ដូចជាវិជ្ជាជីវៈរបស់ក្រុមគ្រូពេទ្យយើងមានការកែលំអរ ហើយសង្ឃឹមថានិន្នាការល្អនេះនឹងបន្តពង្រីកបន្ថែមទៀត។ ចំណុចខ្វះខាតគួរតែបំពេញបន្ថែម តែចំណុចដែលរឹងមាំគួរតែថែរក្សា នោះវិស័យសុខាភិបាលយើងទៅមុខហើយ៕
Daily Program
