កុំសប្បាយហួស គួរសន្សំទ្រព្យ សម្រាប់ពាក់កណ្ដាលជីវិតទៀត
![](/sites/default/files/styles/max_width_770px/public/2024-06/vicaarnnkthaa_23.jpg?itok=hS-v0XW2)
សប្បាយ កំសាន្ត ហូបចុក ផឹកស៊ី គឺជាបង្អែមនៃជីវិត ប៉ុន្តែមិនមែនជាប្រភពចំបងនៃអាហារសម្រាប់បំប៉នជីវិតជីវភាពនៃជីវិតរស់នៅប្រចាំថ្ងៃរបស់យើងទាំងអស់គ្នាឡើយ ។
យើងទាំងអស់គ្នាពេលហត់នឿយពីការងារ ពីអាជីវកម្ម ក៏ដូចជារបររកស៊ីនានា អាចស្វែងរកឱកាសនៅក្នុងការសប្បាយ ការកំសាន្ត ការហូបចុក ការផឹកស៊ី ខ្លះៗបាន ប៉ុន្តែកុំជោគជាំនឹង ចំណុចទាំងនេះ ។
សប្បាយ កំសាន្ត ហូបចុក ក៏ដូចជាការផឹកស៊ី ម្តងម្កាលបាន ប៉ុន្តែអ្វីដែលសំខាន់គឺការទទួលខុសត្រូវការងារ សន្សំសំចៃ និង ប្រើប្រាស់ពេលវេលាដើម្បីប្រមូលផលប្រកបដោយផ្លែផ្កា សម្រាប់ជីវិត ។
មនុស្សយើងពេលចេញពីផ្ទៃម្តាយមកដល់អាយុ ១២ទៅ១៣ ឆ្នាំគឺជាវ័យដែលសប្បាយមិនចាំបាច់កើតទុក ឈឺក្បាលអ្វីទាំងអស់ ប៉ុន្តែចាប់ពីវ័យ១៣ ទៅដល់ ១៨ គឺជាវ័យពង្រឹងការអប់រំការរៀនសូត្រ ហើយពីវ័យ ១៩ ដល់ ២២ ឯ ២៣ ជាវ័យសម្លឹងរករបរ រកជំនូញអាជីវកម្ម ឬការងារជំនាញ ហើយចាប់ពី២៤ ដល់ជាង៥០ ឆ្នាំគឺជាវ័យដែលត្រូវសន្សំផង វិនិយោគផល ពោលគឺធ្វើយ៉ាងណាបង្កើនទ្រព្យបង្កើនមុខរបរ ពីព្រោះមនុស្សនៅក្នុងវ័យនេះគឺអាចមានទាំងបទពិសោធន៍និងសមត្ថភាព រីឯកម្លាំងនិងបញ្ញាក៏បរិបូរណ៍ផងដែរ ប៉ុន្តែចាប់ពីវ័យជាង ៥០ ឡើងជាវ័យវេទនា ឬដេកស៊ីសំណាង។
ដើម្បីឲ្យជីវិតយើងនៅវ័យចាប់ពីជាង៥០ ឆ្នាំឡើងគេងលើសំណាងមិនវេទនា គួរតែខិតខំប្រឹងប្រែងឲ្យខ្លាំងក្លាយ ហើយប្រើកម្លាំងទាំងសតិ បញ្ញ ផ្លូវចិត្ត ផ្លូវកាយ ទាំងអស់ ហើយពួតដៃគ្នាជាមួយនឹងគ្រួសារឲ្យស្វាហាប់ ប៉ុន្តែចាប់ពី ជាង ៥០ ឡើងលើ អ្វីៗវាអាចដល់ពេលចាប់ផ្តើមថយថយសក្តានុពលហើយ ។
វ័យចាប់ពី៥០ ឡើយ គឺទាំងសតិក៏ចុះខ្សោយបញ្ញាក៏ស្រអាប់ កម្លាំងក៏ធ្លាក់ចុះ ដូច្នេះការដែលយើងទាំងអស់គ្នាមកដល់វ័យ៥០ ហើយ មិនមានអ្វីនៅក្នុងដៃជីវិតគេចមិនផុតពីភាពហេងហាង មិនខាន។
ពាក្យចាស់បុរាណតែងតែដំណាលជាបន្តបន្តាប់ថា ទាន់ខ្លួននៅក្មេងសូមខំរៀនខំរក តែដល់វ័យជរាជំងឺព្យាធិនិងមក ហើយកម្លាំងកាយពលក៏ទុន ដូច្នេះសូមខំ ហើយកុំគិតតែសប្បាយភ្លេចខ្លួនចាយវាយខ្ជះខ្ជាញគ្មានគំនិតនៅពេលដែលយើងនៅក្មេង រកលុយបាន។
សប្បាយ កំសាន្ត ហូបចុក ផឹកស៊ី គឺជារឿងដែលអត់មិនបានមែនសម្រាប់ជីវិត ប៉ុន្តែកុំជ្រុលគឺគួរតែមានពេលមានវេលាត្រឹមត្រូវ ហើយក៏កុំខ្ជះខ្ជាយ៕
Daily Program
![Livesteam thumbnail](/sites/default/files/inline-images/live-stream-thumb.jpg)