ព្រះសហគមន៍កាតូលិកតំបន់កំពត នៃភូមិភាគភ្នំពេញ បានរៀបចំពិធីសំណេះសំណាល អបអរសាទរបុណ្យព្រះយេស៊ូប្រសូតជាលក្ខណៈសាសនា ជាមួយជនជាប់ឃុំចំនួន ៩៧៤ នាក់នៅពន្ធនាគារខេត្តកំពត នាព្រឹកថ្ងៃទី៩ ខែមករា ឆ្នាំ ២០២០ ក្រោមអធិបតីភាពរបស់លោកអូលីវីយេ អភិបាលព្រះសហគមន៍កាតូលិកភូមិភាគភ្នំពេញ ព្រះគ្រូធម្មចរិយាមុនី ចាន់ សុវណ្ណ ព្រះមេគុណគណៈធម្មយុត្តិនិកាយខេត្តកំពត លោកប្រធានគណៈអ៊ីម៉ាំខេត្ត ព្រះសង្ឃ លោកបូជាចារ្យ លោកគ្រូគង្វាល និងបរិស័ទនៃសាសនាទាំងអស់យ៉ាងច្រើនកុះករ។
មានមតិស្វាគមន៍ក្នុងពិធីសំណេះសំណាលនេះ លោក តាវ៉ូឡា យ៉ាំងលូកា បូជាចារ្យទទួលខុសត្រូវមណ្ឌលសកម្មភាពកំពតបានមានប្រសាសន៍ថា ព្រះសហគមន៍មានអំណរសប្បាយ ទទួលស្វាគមន៍បងប្អូនគ្រប់សាសនា មកសួរសុខទុក្ខ បងប្អូនជាប់ឃុំ ដើម្បីអបអរសាទរបុណ្យព្រះយេស៊ូប្រសូត និងដើម្បីចែករំលែកអំណរសប្បាយ សេចក្តីស្រលាញ់ ដែលមកពីព្រះយេស៊ូ និងមកពីព្រះជាម្ចាស់។ លោកបន្តថា វត្តមានរបស់បងប្អូនទាំងអស់ ពិសេសណាស់ ដើម្បីរួមគ្នា កសាង សុខសន្តិភាព ខិតខំកាន់ដៃរួមជាមួយគ្នា ដើម្បីសេចក្តីសុខ សុខដុមរមនា រស់នៅប្រកបដោយសេចក្តីស្រលាញ់ សន្តិភាព សេចក្តីសុខសាន្ត និងរួបរួមគ្នាជាធ្លុងតែមួយ។
ព្រះសហគមន៍កាតូលិកខេត្តកំពតបានរៀបចំចូលសួរសុខទុក្ខបងប្អូនជាប់ឃុំក្នុងពន្ធនាគារខេត្ត ក្នុងឱកាសបុណ្យព្រះយេស៊ូ តាំងពីឆ្នាំ២០០៤ មកម្ល៉េះ ផ្តើមគំនិតដោយលោកបូជាចារ្យអូលីវីយេ។ ក្នុងឆ្នាំ ២០១០ បានរៀបចំពិធីសំណេះសំណាល ជាលក្ខណៈអន្តរសាសនា ដោយលោកបូជាចារ្យអ៊ុន សុន ។ រហូតមកដល់ពេលនេះ មានចំនួន ១៦ លើកហើយ។
តាមរយៈរបាយការណ៍របស់លោក វរៈអគ្គានុរក្សថ្នាក់លេខ១ អ៊ិន រៀម អនុប្រធានពន្ធនាគារខេត្តកំពតបានឲ្យដឹងថា អ្នកជាប់ឃុំទាំងអស់មានចំនួន ៩៧៤នាក់ ក្នុងនោះស្តី្រមានចំនួន ៣៨ នាក់ មានជនបរទេស ចំនួន ២០នាក់ និងមានអ្នកកាន់សាសនាឥស្លាមចំនួន ៣៥នាក់។
ក្នុងពិធីដ៏មានអត្ថន័យនេះ ព្រះគ្រូ ធម្មចរិយាមុនី ចាន់ សុវណ្ណ ព្រះមេគុណគណៈធម្មយុត្តិនិកាយខេត្តកំពត មានសង្ឃដីការលើកទឹកចិត្ត និងរំលឹកដល់បងប្អូនជាប់ឃុំទាំងអស់ អំពីសីល៥ក្នុងព្រះពុទ្ធសាសនា ដែលជាការអប់រំរបស់ព្រះពុទ្ធសម្រាប់មនុស្ស អាចរស់នៅប្រកបដោយសេចក្តីសុខ មានដូចជា៖ បាណាតិបាតា គឺវៀរចាកការសម្លាប់ជីវិត។ អទិន្ទានា គឺវៀរចាកការលួចទ្រព្យ។ កាមេសុមិច្ឆាចារា គឺវៀរចាកកាមកិច្ចខុសបវេណី។ មុសាវាទា គឺវៀរចាកការភូតកុហក។ សុរាមេរយៈ គឺវៀរចាកការសេពសុរា ឬទឹកស្រវឹងផ្សេងៗ ។ លោកថា ប្រសិនបើបងប្អូនខិតខំប្រព្រឹត្តនូវចំណុចទាំងប្រាំនេះបាន គឺបងប្អូនមិនមានទុក្ខនោះទេ ជាពិសេស គឺ «ត្រូវជៀសឲ្យឆ្ងាយពីគ្រឿងញៀន»។ ព្រះគ្រូបានសម្តែងនូវទឹកចិត្តសង្ឃឹមជានិច្ចថាបងប្អូន
ជាប់ឃុំទាំងអស់និង ខិតខំកែប្រែខ្លួន ដើម្បីក្លាយជាពលរដ្ឋល្អ ពេលចេញទៅវិញ។
ចំណែកលោក ប្រធានគណៈអ៊ីម៉ាំខេត្តកំពតមានប្រសាសន៍ថា មនុស្សម្នាក់ៗរស់ក្នុងលោកនេះ គឺមានបំណងរស់នៅដោយសុខសន្តិភាព សិទ្ធិសេរីភាព និងសុភមង្គល ។ លោកបន្តថា សិទ្ធិសេរីភាព សុភមង្គល អាស្រ័យលើបុគ្គលម្នាក់ៗជាអ្នកកសាងឡើង ដូចអល់ឡោះបានបញ្ជាក់ ក្នុងគូរអានថាឥរិយាបទរបស់មនុស្សអល់ឡោះមិនកែប្រែទេ ដរាបណាតែមនុស្សកែប្រែឥរិយាបទទៅតាមការទូន្មាន របស់ច្បាប់នៃសង្គមជាតិឬសាសនាដោយខ្លួនឯង។
លោកអ៊ីម៉ាំបញ្ជាក់ថា តាមគោលការណ៍សាសនាឥស្លាម បើអ្នកទាំងឡាយណាបានធ្វើរាល់កំហុសឆ្គងដោយចេតនាឬអចេតនា ទោះបីកំហុសធំប៉ុណ្ណាក៏ដោយឲ្យតែបុគ្គលនោះព្រមទទួលនិងកែប្រែមកធ្វើល្អវិញពិតណាស់ អល់ឡោះលើកលែងរាល់កំហុសឆ្គងឬបាបដែលបានធ្វើកន្លងមកនោះ ហើយសង្គមក៏ដូច្នេះដែរ។ មហាម៉ាត់បានមានប្រសាសន៍ថាពេលណាមនុស្សម្នាក់ស្លាប់ ហើយការចូលរួមដង្ហែសពទៅស្មសាន មាន៣ក្រុម ដែលរួមដំណើរទៅជាមួយ មានដូចជា ក្រុមគ្រួសារសាច់ញាតិនៃសព ។ ទ្រព្យសម្បត្តិ និងផលបុណ្យដែលល្អនិងអាក្រក់។ ក្រោយពេលបញ្ចុះសពរួចមាន ២ក្រុមដែលវិលត្រឡប់មកវិញគឺ ក្រុមគ្រួសារសាច់ញាតិនៃសព និង ទ្រព្យសម្បត្តិ រីឯក្រុមដែលទៅជាមួយសពគឺផលបុណ្យនិងផលបាបតែប៉ុណ្ណោះ។ លោកបានក៏ជំរុញលើកទឹកចិត្តឲ្យបងប្អូនជាប់ឃុំគិតពិចារណា កសាងខ្លួនរកផ្លូវធ្វើល្អឡើងវិញ។
ក្នុងពិធីដ៏មានសារៈសំខាន់ និងមានអត្ថន័យនេះលោកអូលីវី អភិបាលព្រះសហគមន៍កាតូលិកមានប្រសាសន៍សំណេះសំណាលជាមួយបងប្អូនទាំងអស់ថា ព្រះជាម្ចាស់បានបង្កើតមនុស្ស ប្រុស និងមនុស្សស្រី ដែលជាកំពូលនៃស្នាព្រះហស្តរបស់ព្រះអង្គ ហើយព្រះអង្គបានបង្កើតអ្វីៗទាំងអស់លើផែនដីនេះទាំងផ្ទៃមេឃ សត្វដើម្បីឲ្យមានសេចក្តីសុខ សុភមង្គល និងសុខដុមរមនា។ មនុស្សចូលក្នុងគំរោងការនេះ ដើម្បីរស់នៅក្នុងសេចក្តីសុខ ដើម្បីរស់នៅក្នុងសុខដុមរនា។
លោកបានរំលឹកដល់បងប្អូនថា សូមគិតពិចារណា ដែលគ្រប់គ្នាមានពេលវេលា ដើម្បីគិត ផ្ទាល់ខ្លួនថា ខ្ញុំចូលក្នុងគំរោងការនៃការបង្កើតពិភពលោក ខ្ញុំជាបុរស ខ្ញុំជាស្ត្រី គិតពិចារណា ដើម្បីខ្ញុំប្រើសេរីភាពរបស់ខ្ញុំក្នុងរបៀបត្រឹមត្រូវ។ លោកក៏បានលើកយកសុភាសិតខ្មែរមួយ «ខ្លួនទីពឹងខ្លួន» ហើយតាមភាសាបារាំង «ខ្លួនជួយខ្លួនឯង ព្រះជាម្ចាស់នឹងជួយតាមក្រោយ»។ លោកបន្តថា យើងមិនត្រឹមតែពឹងលើខ្លួនឯងប៉ុណ្ណោះទេ។ ពឹងខ្លួនឯង មានព្រំដែនក្នុងសេរីភាពរបស់យើង។ ដូចខ្លែងឯក ដែលមានខ្សែពឹងឲ្យហោះឡើងខ្ពស់។ បើដាច់ខ្សែ គឺខ្លែងនឹងធ្លាក់។ លោកបញ្ជាក់ថា ជីវិតយើងសំខាន់ សេរីភាព ត្រូវតែពឹងលើ សីល៥ ។ ពឹងលើធម្មវិន័យ ចេះស្រលាញ់គ្នាទៅវិញទៅមក ដូចស្រលាញ់ខ្លួនឯង ព្រោះព្រះជាម្ចាស់ស្រលាញ់យើង។ ពឹងលើបងប្អូនឯទៀតៗ។ ពឹងលើសង្គម ដើម្បីរស់នៅដោយជួយគ្នាទៅវិញទៅមក។ ទាំងនេះណែនាំឲ្យយើងរកឃើញសេចក្តីសុខ។
លោកអភិបាលបានជូនពរបងប្អូនទាំងអស់បានចម្រើនក្នុងព្រះពរ ចម្រើនក្នុងសីលធម៌ ចម្រើនក្នុងសេចក្តីថ្លៃថ្នូរ សេចក្តីសុខ នឹកឃើញជីវិតមានតម្លៃ ដែលបងប្អូនត្រូវទទួលខុសត្រូវ គ្រប់គ្រងគ្រួសារ គ្រប់គ្រងសង្គម គ្រប់គ្រងធម្មជាតិ និងសូមឲ្យបងប្អូនមានកំលាំងថែមទៀតក្នុងការតស៊ូ កែប្រែចិត្តគំនិត។
បន្ទាប់ពិធីសំណេះសំណាលរួចមក គណៈប្រតិភូទាំងអស់ មានលោកអភិបាល ព្រះគ្រូមេគុណខេត្ត ព្រះសង្ឃ ប្រធានគណៈអ៊ីម៉ាំខេត្ត គ្រូគង្វាល និងលោកបូជាចារ្យបានធ្វើពិធីប្រោះព្រំ និងអធិដ្ឋានសម្រាប់បងប្អូនទាំងអស់ឲ្យមានកំលាំងតស៊ូ និង មានសុខភាពល្អ។ រួចមកក៏បានចែកម្ហូបអាហារ តាមបន្ទប់ឃុំឃាំងនីមួយៗដល់បងប្អូនទាំងអស់។
ក្រោយពីពិធីសំណេះសំណាល និងចែករំលែកសេចក្តីស្រលាញ់ដល់បងប្អូនជាប់ឃុំរួចមក ប្រតិភូរួមជាមួយព្រះសង្ឃ បាននិមន្តនិងអញ្ជើញ ឆាន់ និងទទួលអាហារសាមគ្គីនៅព្រះសហគមន៍កាតូលិកខេត្តកំពត៕
Daily Program
