កាលពីថ្ងៃអាទិត្យ ទី៥ ខែមករា ឆ្នាំ២០២៥ អ៊ុយក្រែនបានចាប់ផ្តើមការវាយប្រហារថ្មីនៅក្នុងតំបន់គូស្ក៍របស់រុស្ស៊ី។ ទីក្រុងគៀវហាក់បីដូចជាបានសម្រេចចិត្តចេញទៅដណ្តើមយកមួយផ្នែកទៀតនៃទឹកដីរុស្ស៊ីនៅតំបន់ព្រំដែនជាប់ខេត្តស៊ូមីរបស់អ៊ុយក្រែន។ លោកហ៊ូសេអ៊ីន អាលីយ៉េវ អ្នកឯកទេសនៃសង្រ្គាមអ៊ុយក្រែននៅសកលវិទ្យាហ្គ្លាហ្គូវ ប្រទេសស្កុតឡែនដ៍ បានធ្វើការកត់សម្គាល់ថា ៖ “វាមិនអាចទៅរួចទេដែលនិយាយនៅពេលនេះថា អ៊ុយក្រែនចល័តកម្លាំងប៉ុន្មាននាក់សម្រាប់ការវាយប្រហារនេះ ដោយសារតែមិនមានប្រព័ន្ធទំនាក់ទំនងផ្លូវការពីទីក្រុងគៀវ។”
អាជ្ញាធរអ៊ុយក្រែនសប្បាយចិត្តនឹងបញ្ជាក់ថា ពួកគេបានទទួលព័ត៌មានល្អពីតំបន់គូស្ក៍ និងថា រុស្ស៊ីបានទទួលនូវអ្វីដែលពួកគេសមនឹងទទួល។ ភាគច្រើននៃសេចក្តីលំអិតអំពីប្រតិបត្តិការមានប្រភពពីប្លុកព័ត៌មានយោធា គឺក្រុមអ្នកអធិប្បាយយោធារុស្ស៊ីដែលសកម្មខ្លាំងនៅលើបណ្តាញសង្គម។ បើតាមពួកគេ ការវាយប្រហារបានដាក់សំពាធខ្លាំងមកលើទីតាំងការពាររបស់រុស្ស៊ី។ ពួកគេបានបង្ហាញអំពីវត្តមានរថក្រោះ រថពាសដែក កាំភ្លើងធំផ្លោង ក៏ដូចជាប្រព័ន្ធសង្រ្គាមអេឡិចត្រូនិកដើម្បីប្រយុទ្ធប្រឆាំងនឹងដ្រូនរបស់ទាហានរុស្ស៊ី។
នៅពេលនេះ វាមានការលំបាកនឹងដឹងនូវអ្វីដែលកើតមានឡើងពិតប្រាកដ។ លោកវីល ឃីងស្តុន ខក ដែលជាអ្នកឯកទេសអំពីរុស្ស៊ីនៅក្រុមអន្តរជាតិសម្រាប់ការសិក្សាសន្តិសុខ វ៉េរូណា បានធ្វើការលំអិតថា ៖ “អ្វីដែលគេអាចនិយាយគឺថា កងកម្លាំងអ៊ុយក្រែនបានរុលទៅមុខចេញពីទិសដៅជាច្រើន និងធ្វើដំណើរឆ្ពោះទៅកាន់ទីក្រុង បូលចូ សូលដាតស្កូ។ ទីក្រុងនេះ ស្ថិតនៅហួសពីតំបន់ដែលអ៊ុយក្រែនបានទទួលជោគជ័យដណ្តើមយកបន្ទាប់ពីការវាយប្រហារចូលទឹកដីរុស្ស៊ីកាលពីខែសីហា ឆ្នាំ២០២៤។
ប៉ុន្តែរឿងមួយដែលច្បាស់គឺថា ការវាយប្រហាររបស់អ៊ុយក្រែននៅក្នុងដែនដីរុស្ស៊ី គឺធ្វើឲ្យទាំងអស់គ្នាភ្ញាក់ផ្អើល។ ចាប់ផ្តើមពីទីក្រុងមូស្គូ អាជ្ញាធររុស្ស៊ីមិនរំពឹងថា អ៊ុយក្រែនចេញមកប្រយុទ្ធនៅក្នុងតំបន់ដែលពួកគេមានការលំបាក់នឹងការពារទីតាំងដែលដណ្តើមកាលពីឆ្នាំ២០២៤។
ការវាយប្រហាររបស់អ៊ុយក្រែនកាលពីខែសីហា ឆ្នាំ២០២៤ នៅលើទឹកដីរុស្ស៊ី បានបន្សល់ទុកនូវការចងចាំអំពីការប្រថុយប្រថាន ដែលមិនបានឈានទៅសម្រេចបានគ្រប់គោលដៅ។ គោលដៅមួយក្នុងចំណោមគោលដៅសំខាន់ៗ នៃប្រតិបត្តិការនេះ គឺទាញរុស្ស៊ីឲ្យយកទាហានសកម្មរបស់ខ្លួនចេញពីតំបន់ដុនបាសមកការពារគូស្ក៍ និងដើម្បីឲ្យអ៊ុយក្រែនងាយការពារខ្លួននៅតំបន់ដុនបាសវិញ។ លោកវីល ឃីងស្តុន ខក បញ្ជាក់ថា ៖ “នេះមិនមែនជាអ្វីដែលកើតមានឡើងទេ។ ប្រទេសរុស្ស៊ីបានទុកចិត្តលើការពង្រឹងកម្លាំងពីកូរ៉េខាងជើង និងអ្នកជំនាញការឆេតឆិនដើម្បីវាយរុញច្រានអ៊ុយក្រែនវិញ។”
អីចឹង ហេតុដូចម្តេចបានវាយប្រហារលើកនេះទៀត? ជាដំបូង លោកវីល ឃីងស្តុន ខក អះអាងថា ៖ “នេះគឺល្អសម្រាប់ការលើកទឹកចិត្តកងទ័ព និងសាធារណមតិជាតិដោយការចាប់ផ្តើមឆ្នាំថ្មីដោយការវាយប្រហារដែលយ៉ាងហោចណាស់សម្រាប់ពេលនេះ បានទទួលជោគជ័យខ្លះៗ។ នេះជាសម្លេងស្វាគមន៍ឆ្នាំថ្មី សម្រាប់ប្រជាជនជាជាងទម្លាប់មួយរយៈចុងក្រោយនេះដែលរស់នៅឮតែពីសត្រូវរុស្ស៊ីដែលកកេរដីតំបន់ដុនបាស។
ហើយសញ្ញាដែលបញ្ជូនចេញដោយទីក្រុងគៀវ មិនសំដៅតែមកលើប្រជាជនខ្លួនទេ។ លោកហ៊ូសេអ៊ីន អាលីយ៉េវ ពន្យល់ថា ៖ “អ៊ុយក្រែនទើបតែទទួលការផ្គត់ផ្គង់ចុងក្រោយនូវយុទ្ធោបករណ៍ដែលអនុញ្ញាតដោយលោកចូ បាយឌិន មុននឹងការប្រែប្រួលនៅសហរដ្ឋអាម៉េរិក។ នេះគឺជារបៀបដែលបង្ហាញឲ្យឃើញច្បាស់ថា ការគាំទ្រសព្វាវុធនឹងផ្តល់ឥទ្ធិពលពិតប្រាកដនៅលើសមរភូមិ”។
Daily Program
