អ៊ីស្រាអែល​នឹង​រក្សា​កងទ័ព​នៅ​ព្រំដែន​ហ្គាហ្សា-អេហ្ស៊ីប

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) និយាយថា កងកម្លាំងយោធាអ៊ីស្រាអែលនឹងបន្តរក្សាវត្តមាននៅជាប់ព្រំដែនរវាងតំបន់ហ្គាហ្សា និងអេហ្ស៊ីប។

លោក បេនចាមីន ណេតាន់យ៉ាហ៊ូ បាននិយាយយ៉ាងច្បាស់ថា លោកនឹងមិនដកកងកម្លាំងយោធាចេញពីព្រំដែនហ្គាហ្សានិងអេស៊ីបឡើយ។

លោក បេនចាមីន ណេតាន់យ៉ាហ៊ូ បាន​បដិសេធ​ថា លោក​មិន​បាន​យល់​ព្រម​ដក​កង​កម្លាំង​យោធា​ចេញ​ពី​ព្រំដែន​ជា​ផ្នែក​​នៃ​កិច្ច​ព្រមព្រៀង​បទ​ឈប់​បាញ់​ដែល​អាច​កើត​មាន​ជាមួយ​ក្រុម​ហាម៉ាស។ លោក​បាន​ពណ៌នា​របាយការណ៍​ប្រព័ន្ធ​ផ្សព្វផ្សាយ​ថា​មិន​ត្រឹមត្រូវ ហើយ​បាន​គូស​បញ្ជាក់​ថា​អ៊ីស្រាអែល​មិន​បាន​យល់ព្រម​បោះបង់​ការ​គ្រប់គ្រង​លើ​តំបន់​នោះ​ទេ។

លោក បេនចាមីន ណេតាន់យ៉ាហ៊ូ ក៏បានពិភាក្សាជាមួយប្រធានាធិបតីអាមេរិក ចូ បៃដិន ដើម្បីពិភាក្សាអំពីការជំរុញកិច្ចព្រមព្រៀងបទឈប់បាញ់ ប៉ុន្តែមិនមានព័ត៌មានលម្អិតនៃការសន្ទនាត្រូវបានផ្សព្វផ្សាយជាសាធារណៈឡើយ។

នៅកន្លែងផ្សេងទៀត រដ្ឋមន្ត្រីការពារជាតិអ៊ីស្រាអែល លោក យូអាវ ហ្គាឡេន ( Yoav Gallant) បានអះអាងថា កងពលរ៉ាហ្វាស ( Rafah )របស់ក្រុមហាម៉ាស នៅតំបន់ហ្គាហ្សា ត្រូវបានបរាជ័យ ហើយបង្ហាញថា យោធាកំពុងបង្វែរការផ្តោតអារម្មណ៍របស់ខ្លួន ទៅលើការប្រយុទ្ធជាមួយក្រុមហេសបូឡា នៅតាមបណ្តោយព្រំដែនអ៊ីស្រាអែល-លីបង់។

កាល​ពី​ព្រឹក​ថ្ងៃ​ពុធ ក្រុម​ហេសបូឡាហ៍​បាន​បាញ់​រ៉ុក្កែត​រាប់​សិប​គ្រាប់​ទៅតំបន់ ហ្គោឡេន ហាយ ( Golan Heights) ដែល​បាន​កាន់កាប់​បន្ទាប់​ពី​យន្តហោះ​អ៊ីស្រាអែល​បាន​វាយប្រហារ​នៅ​ក្នុង​ប្រទេស​លីបង់។ អាជ្ញាធរ​លីបង់​បាន​និយាយ​ថា មនុស្ស​ម្នាក់​បាន​ស្លាប់ និង ៣០ នាក់​ផ្សេង​ទៀត​រង​របួស។