អំពើហិង្សាលើទឹកដីដ៏​វិសុទ្ធកំពុងឈានដល់ 'ចំណុចគ្មានបញ្ចប់ '

អគ្គលេខាធិការអង្គការសហប្រជាជាតិ លោក អេនតូនីញ៉ូ ហ្គោតេរ៉េស បានព្រមានថា អំពើហិង្សានៅហ្គាហ្សាកំពុងខិតជិតដល់ "ចំណុចដែលគ្មានការបញ្ចប់ "។

អគ្គលេខាធិការអង្គការសហប្រជាជាតិ ក៏បានស្នើថា ដំណោះស្រាយរដ្ឋពីរចំពោះ​ជម្លោះ​អ៊ីស្រាអែល និងប៉ាឡេស្ទីន ជិតដួលរលំហើយ ដោយលើកឡើងពីការពង្រីកការតាំងទីលំនៅ​របស់​អ៊ីស្រាអែល និង ការផ្លាស់ទីលំនៅដោយបង្ខំ របស់ពលរដ្ឋស៊ីវិលរាប់ពាន់នាក់។

លោក​បាននិយាយថា វដ្តនៃអំពើហិង្សា រួមទាំងការវាយប្រហារពីសំណាក់​អ្នកតាំងទីលំនៅជ្រុល​និយម បានពង្រឹងការកាន់កាប់ដោយខុសច្បាប់របស់អ៊ីស្រាអែល ហើយបានរុញច្រានតំបន់នេះ យ៉ាងគ្រោះថ្នាក់​ដល់ចំណុចដែលមិនអាចវិលត្រឡប់មកវិញ។

លោកបានថ្កោលទោសចំពោះការសម្រេចរបស់អ៊ីស្រាអែល ក្នុងការសាងសង់នៅក្នុងតំបន់ E1 ​មិន​មែន​គ្រាន់​តែ​ជា​បញ្ហា​នយោបាយ​នោះ​ទេ វា​គឺ​ជា​ការ​រំលោភ​ច្បាប់​អន្តរជាតិ​យ៉ាង​ធ្ងន់ធ្ងរ។

តំបន់ E1 គឺជាគម្រោងការតាំងទីលំនៅរបស់អ៊ីស្រាអែលដែលមានភាពចម្រូងចម្រាសខ្លាំង និងមានអាយុច្រើនទសវត្សរ៍ដើម្បីសាងសង់លំនៅដ្ឋានរាប់ពាន់ខ្នងនៅតំបន់ West Bank។ តំបន់នេះមានទំហំប្រហែល ១២ គីឡូម៉ែត្រការ៉េ ស្ថិតនៅចន្លោះក្រុងយេរូសាឡឹមខាងកើត ដែល​កាន់កាប់ និងជា​ទីលំនៅដ៏ធំរបស់តំបន់ជន​​អ៊ីស្រាអែលដែល​ហៅ​ថា ម៉ាអាល់ អាឌូមីម (Ma'ale Adumim)។

លោកអន់តូនីញ៉ូ​ បាន​អំពាវនាវ​សុំ​ឲ្យ​មាន​សន្តិភាព ដោយ​លើក​ឡើង​ថា ​សន្តិភាព​ដ៏​ត្រឹមត្រូវ និង​យូរអង្វែង​នឹង​មិន​ត្រូវ​បាន​បង្កើត​ឡើង​តាមរយៈ​អំពើ​ហិង្សា​បន្ថែម​ទៀត​នោះ​ទេ​។ វាទាមទារឱ្យមានការប្តេជ្ញា​ចិត្តរួម តាមយន្តការ ការទូត ច្បាប់អន្តរជាតិ ដើម្បីសេចក្តីថ្លៃថ្នូររបស់មនុស្សជាតិទាំងអស់៕