អភិបាលព្រះសហគមន៍​កូរ៉េ​ខាង​ត្បូង៖ ច្បាប់អាជ្ញាសឹក​ជា​ការ​បំផ្លាញ​លទ្ធិប្រជាធិបតេយ្យ​

ក្រុមលោកអភិបាលនៃព្រះសហគមន៍កាតូលិកនៅប្រទេសកូរ៉េខាងត្បូងបានរិះគន់ការប្រកាសច្បាប់អាជ្ញាសឹកនាពេលថ្មីៗនេះដោយលោក ប្រធានាធិបតី យូន ស៊ូក យល ហើយបាន ជំរុញឱ្យលោកទទួលខុសត្រូវចំពោះអ្វីដែលក្រុមលោកអភិបាលបានពិពណ៌នាថាជាការសម្រេចចិត្ត «មិនស្របច្បាប់»។

នៅក្នុងសេចក្តីថ្លែងការណ៍ដែលបានចេញកាលពីចុងសប្តាហ៍កន្លងទៅក្រុមលោកអភិបាលព្រះសហគមន៍័កាតូលិកកូរ៉េបានសង្កត់ធ្ងន់លើសារៈសំខាន់នៃការការពារលទ្ធិប្រជាធិបតេយ្យ ហើយបានអំពាវនាវឱ្យមានការពន្យល់ និងសុំទោសពីប្រធានាធិបតី ចំពោះការប្រកាសច្បាប់អាជ្ញាសឹកនេះ។

សេចក្តីថ្លែងការណ៍បានសរសេរថា "ការដាក់ប្រទេសក្នុងភាពអាសន្នកាលពីយប់ថ្ងៃអង្គារ៍ បានធ្វើឱ្យប្រជាជនកូរ៉េជាច្រើនភ្ញាក់ផ្អើល។ ច្បាប់នេះគួរតែប្រើនៅពេលដែល មាន​តម្រូវការ​បន្ទាន់ប៉ុណ្ណោះ។  រដ្ឋាភិបាល និង​នីតិ​រដ្ឋបាល​របស់​រដ្ឋគួរតែអនុវត្តដោយប្រុងប្រយ័ត្ន »។

ការប្រកាស ដែលមិនធ្លាប់មានពីមុនមកដោយលោកប្រធានាធិបតីត្រូវបានប្រកាសផ្សាយផ្ទាល់តាមកញ្ចក់ទូរទស្សន៍នៅម៉ោង ១០យប់នៅថ្ងៃទី ៣ ខែធ្នូ។ លោកបានប្រកាសច្បាប់អាជ្ញាសឹកដោយលើកឡើងពីតម្រូ​វការដើម្បី «លុបបំបាត់កងកម្លាំងដែលគាំទ្រកូរ៉េខាងជើង និងការពារបទបញ្ជារដ្ឋធម្មនុញ្ញតាមបែបប្រជាធិបតេយ្យ»។

ក្រុមលោកអភិបាលព្រះសហគមន៍​បាន​លើក​ឡើង​ពី​ការ​ព្រួយ​បារម្ភ​អំពី​យុត្តិកម្ម និង​ភាព​បន្ទាន់​នៃ​ការ​ប្រកាស​ច្បាប់អាជ្ញាសឹក ដោយ​កត់សម្គាល់​ពី​ការ​ខ្វះខាត​ការ​គំរាមកំហែង​ពី​ខាង​ក្រៅ ឬ​ក្នុង​សម័យ​សង្គ្រាម។

ក្រុមលោកអភិបាលបានសរសេរថា ៖ «លទ្ធិប្រជាធិបតេយ្យរបស់យើងត្រូវបានកសាងឡើងដោយការលះបង់ដ៏អស្ចារ្យ។ ព្រះសហគមន៍ កាតូលិកនៅប្រទេសកូរ៉េគាំទ្រយ៉ាងសកម្ម និងឈរក្នុងសាមគ្គីភាពជាមួយប្រជាជនកូរ៉េដើម្បីការពារលទ្ធិប្រជាធិបតេយ្យរបស់យើង»៕