អតីតប្រធានាធិបតីប្រេស៊ីលត្រូវបានចោទប្រកាន់ពីបទប៉ុនប៉ងធ្វើរដ្ឋប្រហារ

អាជ្ញាធរប្រេស៊ីលបានចោទប្រកាន់ជាផ្លូវការលើអតីតប្រធានាធិបតី ហ្សាអ៊ៀ បូលសូណារ៉ូ ( Jair Bolsonaro) ពីបទប៉ុនប៉ងធ្វើរដ្ឋប្រហារផ្តួលរំលំកាលពីឆ្នាំ២០២២។​

នៅក្នុងរបាយការណ៍ដែលមានកម្រាស់ ២៧២ ទំព័រ អគ្គរាជអាជ្ញារបស់ប្រទេសប្រេស៊ីល លោក  ប៉ូឡូ ហ្គូណេត (Paulo Gonet )បានបញ្ជាក់ថា លោកបានដាក់ការចោទប្រកាន់នៅតុលាការកំពូលរបស់ប្រទេសប្រឆាំងនឹងអតីតប្រធានាធិបតីរូបនេះនិងមនុស្ស៣៣នាក់ផ្សេងទៀត ពីបទប៉ុនប៉ងធ្វើការផ្តួលរំលំរដ្ឋប្រជាធិបតេយ្យដោយហិង្សា"។

ក្នុង​ចំណោម​មន្ត្រី​ល្បីៗ​ដែល​ត្រូវ​បាន​គេ​ចោទ​ប្រកាន់​មាន អតីត​រដ្ឋមន្ត្រី​ក្រសួង​ការពារជាតិ អតីតទីប្រឹក្សាសន្តិសុខជាតិ និងអតីតរដ្ឋមន្ត្រីយុត្តិធម៌ របស់ប្រេស៊ីល ។

លោក បូលសូណារ៉ូ គឺជាប្រធានាធិបតីប្រេស៊ីលចន្លោះឆ្នាំ២០១៩ ដល់ ឆ្នាំ២០២២ ។ ការវិវឌ្ឍន៍ចុងក្រោយបង្អស់ទាំងនេះគឺជាលទ្ធផលនៃការស៊ើបអង្កេតដ៏ទូលំទូលាយរយៈពេលពីរឆ្នាំដោយប៉ូលីសសហព័ន្ធប្រេស៊ីល។

ដំណើរការស្រាវជ្រាវនេះ វាកើតចេញពីកុបកម្មរីករាលដាលនៅក្នុងរដ្ឋធានី ក្នុងអំឡុងពេលមួយសប្តាហ៍បន្ទាប់ពីពិធីសម្ពោធប្រធានាធិបតីថ្មីថ្ងៃទី ១ ខែមករា ឆ្នាំ ២០២៣ របស់លោក ល្វីស អ៊ីណាសូ លូឡា ឌូឡា ដា ស៊ីលវ៉ា (  Luiz Inacio Lula Da Silva) ។ កុប្បកម្ម​បាន​សម្រុក​ចូល​វិមាន​ប្រធានាធិបតី សភា និង​តុលាការ​កំពូល។

អតីតប្រធានាធីបតី និងជនជាប់ចោទម្នាក់ទៀតបានបដិសេធរាល់ការចោទប្រកាន់ទាំងអស់ ដោយអះអាងថា ជាការស្វែងរកលាភសក្ការៈ និង របៀបវារៈនយោបាយ។

ឥឡូវនេះ តុលាការកំពូលរបស់ប្រទេសប្រេស៊ីលត្រូវតែសម្រេចថាតើមានភស្តុតាងគ្រប់គ្រាន់ និងហេតុផលគ្រប់គ្រាន់ដើម្បីកាត់ទោសពួកគេដែរឬទេ។