អង្គការការីតាសកម្ពុជា ផ្តល់ជំនួយមនុស្សធម៌ដល់ជនភៀសសឹកនៅតាមបណ្តោយព្រំដែន

កាលពីថ្ងៃទី២៥ និង២៦ ខែសីហា ឆ្នាំ២០២៥ អង្គការការីតាសកម្ពុជា តាមរយៈគម្រោង «ឆ្លើយតបនឹងគ្រោះមហន្តរាយដែលបណ្តាលមកពី ការប៉ះទង្គិចនៅតាមព្រំដែនកម្ពុជា-ថៃ» បានផ្តល់ជំនួយមនុស្សធម៌បន្ទាន់ដល់ជនភៀសខ្លួនកម្ពុជាដែលរងផលប៉ះពាល់ដោយការប៉ះទង្គិចប្រដាប់អាវុធនៅតាមបណ្តោយព្រំដែនកម្ពុជា-ថៃ។ ជំនួយនេះត្រូវបានផ្តល់ជូនដល់គ្រួសារសរុបចំនួន ៤៥១៤គ្រួសារ ដែលបានជ្រកកោននៅក្នុងជំរំជនភៀសខ្លួនស្ថិតក្នុងខេត្តព្រះវិហារ សៀមរាប និងឧត្តរមានជ័យ។

ពិធីប្រគល់ជំនួយនេះមានការអញ្ជើញចូលរួមដោយផ្ទាល់ពីសំណាក់ លោកអភិបាល អេរីគេ ហ្វីការេដូ (ទេព ច័ន្ទពិសិដ្ឋ) អភិបាលព្រះសហគមន៍ភូមិភាគបាត់ដំបង និងជាប្រធានក្រុមប្រឹក្សាភិបាលអង្គការការីតាសកម្ពុជា និង លោក គីម រតនា នាយកប្រតិបត្តិអង្គការការីតាសកម្ពុជា។ លោក អភិបាល ទេព ច័ន្ទពិសិដ្ឋ បានមានប្រសាសន៍ថា បងប្អូនដែលកំពុងរស់នៅយ៉ាងលំបាក តាមជំរកតង់ក្នុងជំរំ គឺពឹងផ្អែកលើបងប្អូនឯទៀត និងអង្គការមនុស្សធម៌។ អង្គការការីតាស យើងព្យាយាមការពារងបងប្អូនឲ្យមានជីវិតដ៏ថ្លៃថ្នូរ ការពារមនុស្សចាស់ ស្ត្រីមានផ្ទៃពោះ ជនមានពិការភាព និងកុមារ។

ក្នុងពេលសំណេះសំណាលជាមួយបងប្អូនភៀសសឹក លោកអភិបាល បានលើកទឹកចិត្តបងប្អូនឲ្យ មានទំនាក់ទំនងល្អរវាងគ្នានឹងគ្នា ចេញជួយគ្នាទៅវិញទៅមក មានពាក្យសម្តីល្អដាក់គ្នា ចេះលើកទឹកចិត្តគ្នា ចេះសាមគ្គីគ្នា។ មួយទៀត ជួយការពារ ថែរក្សាបរិស្ថាន និងមានអនាម័យស្អាតក្នុងជំរំ ដែលខ្លួនកំពុងរស់នៅ កុំឲ្យមានជំងឺ រង់ចាំពេលត្រលប់ទៅផ្ទះវិញ ជំរំគ្រាន់តែជាកន្លែងរស់នៅបណ្តោះអាសន្នប៉ុណ្ណោះ។ មួយទៀតលោកជំរុញឲ្យបងប្អូនទាំងអស់ដែលមានកូនត្រូវចូលរៀន គឺត្រូវជួយជំរុញកូនបានចូលរៀនរាល់ថ្ងៃ តាមតង់កុមារមេត្រី ដែលអង្គការការីតាសបានរៀបចំ ដើម្បីជួយកុមារឲ្យចេះអាន សរសេរ និងជួយផ្លូវចិត្តកុមារផងដែរ ក្នុងពេលគេរស់នៅក្នុងជំរំ។

 ការប៉ះទង្គិចប្រដាប់អាវុធ រវាងកម្ពុជា-ថៃបានកើតឡើង ពីថ្ងៃទី ២៤-២៨ ខែកក្កដា ឆ្នាំ២០២៥ បានបង្ករឲ្យប្រជាជនរាប់ម៉ឺនគ្រួសារត្រូវជម្លៀសចេញរកកន្លែងសុវត្ថិភាព។ ក្រោយកិច្ចព្រមព្រៀងឈប់បាញ់ជាស្ថាពរថ្ងៃទី ២៩ ខែកក្កដា ឆ្នាំ២០២៥ ប្រជាជនជាច្រើនបានត្រលប់ទៅផ្ទះវិញ នៅសល់ប្រជាជនមួយចំនួនដែលមានភូមិជាប់នៅជើងភ្នំដងរែក ជាសមរភូមិប្រយុទ្ធមិនទាន់ត្រលប់ទៅវិញឡើយ ដែលត្រូវការគាំពារ និងទំនុកបម្រុងបន្ត។

 តាមលោក គីម រតនា នាយកប្រតិបត្តិអង្គការការីតាសកម្ពុជាបានឲ្យដឹងថា ជំនួយដែលបានផ្ដល់ជូនក្នុងដំណាក់កាលបន្ទាន់នេះបានផ្តោតលើតម្រូវការចាំបាច់បំផុតរបស់ជនភៀសខ្លួន រួមមាន៖ ការផ្តល់ជម្រក បណ្តោះអាសន្ន ដើម្បីធានាបាននូវសុវត្ថិភាព និងភាពកក់ក្តៅដល់គ្រួសារដែលត្រូវផ្លាស់ទីលំនៅ។ ការដំឡើងសម្ភារៈផ្គត់ផ្គង់ទឹកស្អាត និងអនាម័យ ដើម្បីបង្ការជំងឺ និងធានាសុខភាពសាធារណៈនៅក្នុងជំរំ។ ការការពារ ដែលរាប់បញ្ចូលទាំងការផ្តល់នូវសម្ភារៈ និងការគាំទ្រផ្លូវចិត្តដើម្បីធានាសុវត្ថិភាព និងសុខុមាលភាពផ្លូវចិត្តរបស់ជនភៀសសឹក ពិសេសកុមារ និងស្ត្រី។

ការផ្តល់ជំនួយនេះបង្ហាញពីការយកចិត្តទុកដាក់ខ្ពស់របស់អង្គការការីតាសកម្ពុជាក្នុងការឆ្លើយតបយ៉ាងឆាប់រហ័សចំពោះវិបត្តិនានា និងបានរួមចំណែកយ៉ាងសំខាន់ក្នុងការសម្រាលទុក្ខលំបាករបស់ប្រជាពលរដ្ឋដែលកំពុងជួបប្រទះនឹងគ្រោះមហន្តរាយដោយសារការប៉ះទង្គិចនៅតាមព្រំដែន។

 កម្ពុជាត្រូវការសន្តិភាព មិនត្រូវការសង្គ្រាមឡើយ។ លោកអភិបាល ទេព ច័ន្ទពិសិដ្ឋ បានអំពាវនាវ ឲ្យគ្រីស្តបរិស័ទអស់ចូលរួម យើងជាបុត្រធីតារបស់ព្រះជាម្ចាស់ ត្រូវអធិដ្ឋាន ដើម្បីសន្តិភាព ។ លោកបន្តថា ត្រូវឈប់និយាយ អំពីគេ និង យើង ព្រោះយើងទាំងអស់គ្នាបងប្អូន។ យើងត្រូវសន្តិភាព សន្តិភាពក្នុងពិភពលោក និងប្រទេសកម្ពុជា ប្រទេសថៃ។

លោកអភិបាលប្រធានក្រុមប្រឹក្សាអង្គការការីតាស ក៏បានអំពាវនាវ ចំពោះបងប្អូនទាំងអស់ដែលមានលទ្ធភាព សូមជួយអង្គការការីតាស សូមជួយព្រះសហគមន៍ ដើម្បីមានមធ្យោបាយជួយដល់បងប្អូនដែលរស់នៅក្នុងជំរំ។ ទោះបីបន្តិចបន្តួច ជួយព្រះសហគមន៍ តាមរយៈការីតាស ដើម្បីឲ្យមានលទ្ធភាពច្រើនជួយបងប្អូនក្នុងជំរំ ព្រោះមិនដឹងពេលថាបងប្អូនភៀសសឹក នឹងស្នាក់នៅក្នុងបណ្ដលប៉ុន្មាន ថ្ងៃ ប៉ុន្មានខែទៀតនោះឡើយ។ សូមជួយជាថវិកា សម្ភារៈ អង្ករ ថ្នាំ តាមលទ្ធភាពបងប្អូនមាន ។ អង្គការការីតាសប្តេជ្ញាបន្តការងារមនុស្សធម៌របស់ខ្លួនដើម្បីជួយដល់ជនរងគ្រោះ និងងាយរងគ្រោះបំផុតនៅក្នុងសង្គម ស្របតាមបេសកកម្មរបស់អង្គការដែលផ្តោតលើការផ្តល់ក្តីសង្ឃឹម និងសេចក្តីថ្លៃថ្នូរដល់ជនគ្រប់រូប។