លោក វូឡូឌីមៀ ហ្សេឡេនស្គី និង លោក កាឌីណាល់ ព្យែត្រូ ផារ៉ូលីន បានផ្លាស់ប្តូរការពិភាក្សាគ្នាតាមទូរស័ព្ទអំពីផែនការសន្តិភាពនិងបានអធិដ្ឋានសូមឲ្យសុខភាពសម្តេចប៉ាបហ្រ្វង់ស៊ីស្កូមានស្ថានភាពប្រសើរឡើង។
លោក ហ្សេឡេនស្គី ប្រធានាធិបតីអ៊ុយក្រែនបានសរសេរនៅលើបណ្តាញសង្គម X របស់លោក ថា លោកបានជួបសន្ទនាតាមទូរស័ព្ទជាមួយលោកកាឌីណាល់ ព្យែត្រូ ផារ៉ូលីន កាលពីថ្ងៃសុក្រទី ១៤ ខែ មីនា ឆ្នាំ២០២៥។
ក្នុងអំឡុងការអំពាវនាវសុំសន្តិភាព លោកហ្សេឡេនស្គី បានបង្ហាញពីបំណងល្អរបស់លោក និងអធិដ្ឋានសុំឲ្យសុខភាពសម្តេចប៉ាបមានស្ថានភាពប្រសើរឡើង ហើយបានសម្តែងការអរគុណចំពោះការរិះគិតរបស់ទ្រង់ និង ការគាំទ្ររបស់សន្តអាសនៈដល់ប្រជាជនអ៊ុយក្រែន និងបានទទួលស្គាល់នូវរាល់កិច្ចខិតខំប្រឹងប្រែងរបស់សន្តអាសនៈដែលបានសម្របសម្រួលការវិលត្រឡប់របស់កុមារ "ដែលត្រូវបាននិរទេសដោយខុសច្បាប់ និងផ្លាស់ទៅដោយប្រទេសរុស្ស៊ី។
លោកបានបន្តថា ភាគីទាំងពីរក៏បានផ្លាស់ប្តូរទស្សនៈអំពី សំណើសម្រុះសម្រួលដោយសហរដ្ឋអាមេរិកសម្រាប់បទឈប់បាញ់រយៈពេល ៣០ ថ្ងៃរវាងទីក្រុង គៀវ និងទីក្រុងម៉ូស្គូ។
លោក ហ្សេឡេនស្គី ក៏បានសង្កត់ធ្ងន់ថា «សំឡេងសន្តអាសនៈ គឺមានសារៈសំខាន់ខ្លាំងណាស់ក្នុងផ្លូវឆ្ពោះទៅរកសន្តិភាព»។
លោកបានបន្ថែមថា យើងពឹងផ្អែកលើការគាំទ្ររបស់សន្តអាសនៈសម្រាប់ការដោះលែងពលរដ្ឋអ៊ុយក្រែន ដោយគូសបញ្ជាក់ថា ការដោះដូរអ្នកទោស និងបទឈប់បាញ់រយៈពេល ៣០ ថ្ងៃនឹងជា “ជំហានជាក់ស្តែងដំបូងគេ” ឆ្ពោះទៅរកការសម្រេចបាននូវ “សន្តិភាពដ៏ត្រឹមត្រូវ និងស្ថិតស្ថិរ”។
លោកបានបញ្ជាក់ថា “អ៊ុយក្រែនត្រៀមខ្លួនជាស្រេចក្នុងការចាត់វិធានការទាំងនេះ ព្រោះប្រជាជនអ៊ុយក្រែនប្រាថ្នាសន្តិភាពជាងអ្នកដទៃ”៕
Daily Program
