ស្ថានភាពសុខភាពសម្តេចប៉ាបម្សិលមិញរាងប្រសើរបន្តិច

ការិយាល័យព័ត៌មានសន្តអសនៈបានផ្តល់នូវបច្ចុប្បន្នភាពនៃព័ត៌មាន អំពីសុខភាពរបស់សម្តេចប៉ាបថា ទ្រង់មានស្ថានភាពប្រសើរបន្តិចកាលពីម្សិលមិញ ។  នេះបើតាមសេចក្តីរាយការណ៍របស់វ៉ាទីកង់ញូវ ។​

ប្រភពដដែលបានអះអាងថា កាលពីម្សិលមិញទ្រង់មិនមានរោគសញ្ញានៃបញ្ហាផ្លូវដង្ហើមដូចជំងឺហឺតទៀតឡើយ។

លទ្ធផលនៃការធ្វើរោគវិនិច្ឆ័យ បានបង្ហាញថា លំហូរអុកស៊ីសែនហាក់នៅមានបញ្ហាបន្តិច ប៉ុន្តែលទ្ធផលតេស្តបង្ហាញថាប្រសើរឡើង រីឯរោគសញ្ញានៃបញ្ហា ខ្សោយក្រលៀនកម្រិតស្រាលរបស់ទ្រង់មិនមែនជាមូលហេតុសម្រាប់ការព្រួយបារម្ភនោះទេ។

ប្រភពដដែលបានបន្តថា នៅពេលដែលស្ថានភាពសុខភាពរាងប្រសើរបន្តិច សម្តេច​ប៉ាប បាន​ចាប់​ផ្តើម​ធ្វើ​ការ​ឡើង​វិញ ហើយ​នៅ​ពេល​ល្ងាចថ្ងៃច័ន្ទទ្រង់​បាន​ទំនាក់ទំនងទៅព្រះ​សហគមន៍​កាតូលិក​នៅ​ហ្គាហ្សា។

ប្រភពដដែលបានបន្តថា នៅពេលនេះសម្តេចប៉ាបនៅតែបន្តទទួលការបំពាក់ អុកស៊ីសែនបន្តនៅឡើយ ហើយក្រុមគ្រួពេទ្យនៅតែបន្តតាមដានសុខភាពទ្រង់ដោយប្រយ័ត្នប្រយែងបំផុត ។

សម្តេចប៉ាបបានយាងចូលមន្ទីរពេទ្យនៅក្នុងទីក្រុងរ៉ូមតាំងពីថ្ងៃសុក្រទី ១៤ ខែកុម្ភៈ ឆ្នាំ២០២៥ មកម្ល៉េះ ។