កាលពីថ្ងៃទី២ ខែវិច្ឆិកានេះ សាលាអប់រំជំនឿសន្តយ៉ូស្ទីន របស់ភូមិភាគភ្នំពេញ បានបើកដំណើរការឡើងវិញក្រោយពីកូវីដ១៩សម្រាប់ជំនាន់ទីបួន ដែលរៀបចំឡើងក្រោមអធិបតីភាពរបស់លោកអភិបាលអូលីវីយ៉េ ជ្មីតហស្លេ ដែលមានសិស្សចំនួនហុកសិបនាក់ចូលរួមពីព្រះសហគមន៍ផ្សេងៗក្នុងភូមិភាគភ្នំពេញ និងមានបូជាចារ្យនិងគ្រូបង្រៀនចំនួនជិត១០នាក់ផងដែរ។
លោកអភិបាលអូលីវីយ៉េ មានប្រសាសន៍ថា សាលានេះជួយឲ្យគ្រីស្តបរិស័ទរបស់យើងអាចចូលយ៉ាងជ្រៅនៅក្នុងជំនឿផ្ទាល់ខ្លួនដើម្បីស្រឡាញ់ព្រះសហគមន៍និងបម្រើព្រះសហគមន៍។ លោកបន្តថា កន្លងមកព្រះសហគមន៍បានទទួលផលផ្លែជាច្រើនក្រោយពេលបញ្ចប់ការសិក្សា «មានអ្នកខ្លះ គេទៅប្រកាសដំណឹងល្អជាគ្រូអប់រំជំនឿបានផ្តល់សក្ខីភាពផ្ទាល់ខ្លួនយ៉ាងច្បាស់អំពីជំនឿ ដល់បងប្អូនឯទៀតៗ»។
ក្នុងឆ្នាំសិក្សាថ្មីជំនាន់ទី៤នេះ មានអ្នកចូលរៀន៦០នាក់ ហើយមានអាយុចាប់ពី១៨ឆ្នាំដល់៨០ឆ្នាំ។ លោកអភិបាលអូលីវីយ៉េ បន្ថែមថា ទន្ទឹមនេះយើងឃើញថា មានគេចូលច្រើនមានន័យថា គឺជាសេចក្ដីត្រូវការរបស់គ្រីស្តបរិស័ទផ្ទាល់ និងរបស់ព្រះសហគមន៍ផងដែរ។
«នេះគឺជាកម្លាំងដែលឲ្យព្រះសហគមន៍បន្តទៅមុខទៀតក្នុងការអប់រំ ការណែនាំ ការប្រកាសដំណឹងល្អ បន្ទាប់ពីព្រះយេស៊ូគ្រីស្តនិងក្រុមគ្រីស្តទូត» លោកអភិបាលបន្ថែម។
សាលាអប់រំជំនឿសន្តយ៉ូស្ទីនត្រូវបានបង្កើតឡើងក្នុងឆ្នាំ២០១២ ដែលត្រូវបង្កើតឡើងដោយលោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ បានដាក់ឲ្យសិក្សារៀងរាល់ចុងសប្តាហ៍ក្នុងរយៈពេល២ឆ្នាំសម្រាប់មួយជំនាន់ ក្នុងគោលបំណងឲ្យគ្រីស្តបរិស័ទឈ្វេងយល់អំពីជំនឿរបស់ខ្លួនបានយ៉ាងទូលំទូលាយ និងអាចប្រកាសដំណឹងល្អដល់អ្នកទៃបានក្នុងនាមជាគ្រីស្តបរិស័ទកាតូលិក។
កម្មវិធីសិក្សានេះ នឹងធ្វើនៅមជ្ឈមណ្ឌលព្រះសហគមន៍កាតូលិកភូមិភាគភ្នំពេញ ដោយមានមុខវិជ្ជាដូចជា ទេវវិទ្យា គម្ពីរវិទ្យា សីលធម៌គ្រីស្តបរិស័ទ ប្រវត្តិសាស្ត្រព្រះសហគមន៍សកលនិងក្នុងប្រទេស ការអប់រំជំនឿ ពិធីបុណ្យរបស់គ្រីស្តសាសនា និងផ្លូវវិញ្ញាណ។
គិតចាប់ពីបើកដំណើរការ សាលាអប់រំជំនឿសន្តយ៉ូស្ទីន បានបណ្តុះបណ្តាលគ្រីស្តបរិស័ទបានប្រមាណជាង១០០នាក់រួចមកហើយ៕
ដោយកែវ កញ្ញា
Daily Program
