សវនាការលើសំណុំរឿងព្រហ្មទណ្ឌ ប្តឹងជំទាស់របស់លោកកឹម សុខា នឹងបន្តធ្វើនៅថ្ងៃទី​៦ ខែមិថុនាខាងមុខទៀត

លោក ផែង ហេង មេធាវីការពារ​ក្តី​លោក កឹម សុខា បានប្រាប់ឱ្យដឹងថា សវនាការ​លើសំណុំរឿងព្រហ្មទណ្ឌ ប្តឹងជំទាស់របស់លោកកឹម សុខា  អតីតប្រធានគណបក្សសង្គ្រោះជាតិ នឹង​បន្ត​ធ្វើ​ឡើងនៅ​ថ្ងៃទី​៦ ខែមិថុនា ឆ្នាំ​២០២៤ ដែលជាសវនាការលើកទី១០​របស់លោកកឹម សុខាផងដែរ​។

លោកបានថ្លែងថា ៖ «ឯកឧត្តមកឹម សុខា នៅតែប្រកាន់គោលការណ៍ថាគាត់មិនបានក្បត់ជាតិ មិនបាននាំបរទេសមកឈ្លានពាន ឬកាត់ដី​ឱ្យបរទេស ឬ​ផ្តល់ជាមធ្យោបាយដែលជាសព្វាវុធ ឬជាព័ត៌មានចារកម្មឱ្យទៅបរទេសទេ»។

លោក ផែង ហេង បានបន្តថា ៖ «គាត់ជាអ្នកស្រលាញ់ជាតិ ស្រលាញ់​ប្រទេសកម្ពុជា ស្រលាញ់ព្រះមហាក្សត្រ និង​ផលប្រយោជន៍ខ្មែរ​ ហើយគាត់តែងតែថាគាត់ចង់ឃើញការដឹកនាំមួយ​ដែលមានការគោរព​សិទ្ធិមនុស្ស ស្របតាមរដ្ឋធម្មនុញ្ញ និងការ​ផ្សះផ្សាជាតិ»។

លោក អំ សំអាត នាយកប្រតិបត្តិអង្គការ លីកាដូ បានថ្លែង​ប្រាប់អ្នកសារព័ត៌មាននាថ្ងៃទី​២៣ ខែឧសភា ដែរថា នៅថ្ងៃនេះ គ្រាន់តែការអានលើកំណត់ហេតុច្រើន ហើយសវនាការលើកទី១០ដែលនឹងធ្វើនៅ​ដើមខែក្រោយនេះក៏នៅតែបន្តការអានរបាយការណ៍ដដែលដែរ។

លោកថា លោក កឹម សុខាមិនមាន​ថ្លែងអ្វីច្រើននោះទេ ដោយគ្រាន់តែលោកបានបង្ហាញចំណាប់អារម្មណ៍យល់ស្របតាមការស្នើសុំរបស់មេធាវីរបស់​លោកដោយឱ្យកោះហៅមន្រ្តីនគរបាលយុត្តិធម៌មកធ្វើការបំភ្លឺ តែចុងក្រោយតុលាការបានបដិសេធលើចំណុចនេះ។

ទាក់ទងនឹងសំណើនៃការកោះហៅមន្រ្តីនគរបាលយុត្តិធម៌នេះដែរ​ លោកស្រី ម៉េង សុភារី មេធាវីរបស់​លោកកឹម សុខា ក៏បាន​ប្រាប់ដែរថា ការស្នើនេះព្រោះ​សហមេធាវីយល់ឃើញថាវាមានភាពចាំបាច់​នៅ​ក្នុង​ការ​ស្វែងរកយុត្តិធម៌ជូនលោក កឹម សុខា ទើបសហមេធាវីដាក់ពាក្យស្នើសុំឱ្យកោះហៅ​មន្រ្តីនគរបាលយុត្តិធម៌នេះ។

លោកស្រីបញ្ជាក់ថា ៖ «មូលហេតុនៃការស្នើនេះ ព្រោះ​យើងមើលលើឯកសារពីដំបូង​ឡើយដែ​ល​ជាដើមចមនាំឱ្យមានការ​ចាប់ខ្លួន​ឯកឧត្តមកឹម សុខាគឺលើវីដេអូឃ្លីបដែលមានរយៈពេល​១៣នាទី ដែលវីដេអូនោះមានការ​កាត់តមកភ្ជាប់គ្នា ចឹងហើយដែលធ្វើឱ្យមានបាត់ខ្លឹមសារសំខាន់ៗមួយចំនួន​ក្នុង​វីដេអូនោះ»។

ចំណែក លោកមេធាវី អាង ឧត្តម បាន​លើកឡើងដែរថា វាគឺជារឿងដែលហួសចិត្ត និង​ចម្លែកជាទីបំផុត ដោយលោកបញ្ជាក់ថា ក្នុង​សំណុំរឿង​ចោទលោកកឹម សុខាលើរឿងបាតុកម្ម ធ្វើបដិវត្តពណ៌ផ្តួលរំលំរដ្ឋាភិបាល ប៉ុន្តែ​នៅក្នុង​ក្រមនិយាយពី​រឿងប្រទូសរាយ ឈ្លានពានប្រឆាំងនឹងកម្ពុជា​។

លោកថា ៖ «ចឹង យើងនឹងបង្ហាញតុលាការ​យ៉ាងម៉េចបានជាមួយឆ្វេង មួយស្តាំបែបនេះ ខុសគ្នាដាច់»។

អ្នកគាំទ្រលោកកឹម សុខាមកពីខេត្តកំពង់ឆ្នាំង​ដែលមក​​រងចាំទទួលព័ត៌មានពី​សវនាការ​របស់​សា​លាឧទ្ធរណ៍នាថ្ងៃទី​២៣ ខែឧសភា លោក ចាន់ សុផាត បានប្រាប់ថា លោកចង់ឱ្យ​តុលាការបញ្ចប់​ករណីលោកកឹម សុខា ដោយសុំឱ្យតុលាការលើកលែងទោស និងការចោទប្រកាន់​លោក កឹម សុខា។

លោកថា លោកមកគាំទ្រនេះគឺមកដោយខ្លួនឯង មិនមាន​អ្នកណាបង្ខំ ឬជួលឱ្យ​លោកមក​គាំទ្រ​លោកកឹម សុខានោះទេ។

លោក ចាន់ សុផាត ថា ៖ «លោកកឹម សុខាជាមនុស្សល្អ ស្មោះត្រង់ ដែលអាចទុកចិត្តបាន ទើបធ្វើឱ្យខ្ញុំ ក៏ដូចជាប្រជាពលរដ្ឋ​ក្នុង​ភូមិរបស់ខ្ញុំហ្នឹងទុកចិត្តលើគាត់បាន​ ទើបពួកខ្ញុំគាំទ្រលោកកឹម សុខា»។

រីឯអ្នកគាំទ្រមួយរូបទៀតដែលធ្វើដំណើរមកពីខេត្តកំពង់ចាម គឺលោក ចេង សុខុន បានលើកឡើងដែរថា តាមការតាមដាន និងការ​លោកយល់ឃើញគឺលោកមិនមាន​ឃើញ​មានការទំនាក់ទំនងរវាងលោកកឹម សុខា និង​ពួក​បរទេសនោះទេ ដែលការចោទនេះគឺអយុត្តិធម៌សម្រាប់​លោក កឹម សុខា។

លោកថា ៖ «ខ្ញុំចង់ឱ្យតុលាការដោះលែងគាត់ ហើយត្រូវរ៉ូវគ្នាវិញ នោះខ្មែរយើងនឹង​មានសុខសន្តិភាពហើយ ឈប់បែកបាក់គ្នាទៀត»។​

សូមរម្លឹកថា លោក កឹម សុខា ត្រូវបានសាលាដំបូងរាជធានីភ្នំពេញ សម្រេចផ្តន្ទាទោស ដាក់ពន្ធនាគារកំណត់រយៈពេល ២៧ ឆ្នាំ ពីបទ សន្និដ្ឋិភាពជាមួយបរទេស ឬបទឃុបឃិតត្រូវរ៉ូវគ្នាជាមួយបរទេស ប្រព្រឹត្តនៅប្រទេសកម្ពុជា និងទីកន្លែងផ្សេងទៀត កាលពីអំឡុងឆ្នាំ២០១០ ដល់ថ្ងៃទី៣ ខែកញ្ញា ឆ្នាំ២០១៧ ជាបទល្មើសព្រហ្មទណ្ឌ និងត្រូវផ្តន្ទាទោស តាមបញ្ញត្តិមាត្រា ៤៣៩ និងមាត្រា ៤៤៣ នៃក្រមព្រហ្មទណ្ឌ៕