សម្តេចប៉ាប៖ ព្រះវិហារគឺជាស្នូលការប្រមូលផ្តុំប្រជារាស្រ្តរបស់ព្រះជាម្ចាស់

នៅក្នុងសារដែលថ្លែងទៅកាន់អ្នកចូលរួមក្នុងសន្និបាតគ្រីស្តបរិស័ទអ៊ីតាលីលើកទី២ដែលរៀបចំនៅថ្ងៃទី ៣១ ខែមីនា ដល់ថ្ងៃទី​៣ខែ មេសានេះ សម្តេចប៉ាប ហ្វ្រង់ស៊ីស្កូ បានរំឭកគ្រីស្តបរិស័ទថា ព្រះសហគមន៍ឬព្រះវិហារត្រូវបានបង្កើតឡើងដោយប្រជានុរាស្រ្តរបស់ព្រះជាម្ចាស់​ដែលដើរជាមួយគ្នា។

សម្តេចប៉ាបក៏បានមានបន្ទូលបន្តថា អំណរសប្បាយរបស់គ្រីស្តបរិស័ទមិនមែនមកពីដំណោះស្រាយងាយស្រួលចំពោះបញ្ហានោះទេ ប៉ុន្តែវាបានមកពីភាពប្រាកដប្រជាថា ព្រះជាម្ចាស់​មិនដែលបោះបង់ចោលយើងឡើយ។

វ៉ាទីកង់ញូវបានរាយការណ៍ថា​ នៅក្នុងសន្និបាតនេះ អ្នកចូលរួមបានពិភាក្សាយ៉ាងផុលផុសជំរុញ ប្រធានបទនៃសេចក្តីអំណរ។

គណៈកម្មការរៀបចំសន្និបាតនោះបានលើកឡើងថា អំណរសប្បាយគឺជាចំណុចស្នូលនៃកិច្ចពិភាក្សាដែលមានការចូលរួមដោយគ្រីស្តបរិស័ទនៅក្នុងព្រះសហគមន៍ ជាងមួយពាន់នាក់មកពីទូទាំងប្រទេសអ៊ីតាលី។  

សម្តេចប៉ាបបានសរសេរថា "សេចក្តីអំណររបស់គ្រីស្តបរិស័ទគឺការជឿទុកចិត្តលើព្រះនៅក្នុងគ្រប់ស្ថានភាពនៃជីវិត" វាត្រូវបានបំពេញនៅក្នុងផ្នែកនៃជីវិតប្រចាំថ្ងៃ និងការចែករំលែក ហើយ​វាក៏​ជាសេចក្តីអំណរជាមួយនឹងជើងមេឃដ៏ធំទូលាយ ដែលអមជាមួយនឹងអាកប្បកិរិយាស្វាគមន៍៕