សម្តេចប៉ាបហ្រ្វង់ស៊ីស្កូកាលពីថ្ងៃសៅរ៍ចុងសប្តាហ៍មុន បានបញ្ជាក់យ៉ាងម៉ឺងម៉ាត់នូវទំនួលខុសត្រូវផ្នែកសីលធម៌ចំពោះការប្រើប្រាស់ធនធានហិរញ្ញវត្ថុ គឺដើម្បីភាពប្រសើរឡើងនៃមនុស្សជាតិ មិនមែនសម្លាប់ជីវិត។
វ៉ាទីកង់ញូវបានរាយការណ៍ថា សម្តេចប៉ាបបានមានបន្ទូលបែបនេះនៅពេលដែលទ្រង់អញ្ជើញដឹកនាំកិច្ច ប្រជុំជាមួយគណៈប្រតិភូមកពីមូលនិធិកាតូលិកនៃទីក្រុងវីរ៉ូណា (Verona)។
នាឱកាសនោះ សម្តេចប៉ាប បញ្ជាក់ជាថ្មីអំពីកាតព្វកិច្ចខាងសីលធម៌ដោយផ្អែកលើគោលលទ្ធិសង្គមរបស់ព្រះសហគមន៍ ដែលប្រើប្រាស់ធនធានហិរញ្ញវត្ថុដើម្បីបម្រើផលប្រយោជន៍រួម និងថ្កោលទោសការវិនិយោគលើឧស្សាហកម្មអាវុធ។
សម្តេចប៉ាបបានសង្កត់ធ្ងន់លើតម្រូវការដឹកនាំទ្រព្យសម្បត្តិឆ្ពោះទៅរកគំនិតផ្តួចផ្តើមដែលគាំទ្រជនងាយរងគ្រោះ និងស្របតាមគោលលទ្ធិសង្គមរបស់ព្រះសហគមន៍កាតូលិក ហើយមានបន្ទូលថា ការវិនិយោគលើអាវុធជា «ភាពឆ្កួតលីលា»។
សម្តេចប៉ាបបានគូសបញ្ជាក់ពីទំនួលខុសត្រូវរួមក្នុងការថែរក្សាភពផែនដី ដោយបានលើកឡើងថា ការគ្រប់គ្រងនេះគួរតែឆ្លុះបញ្ចាំងពីការគោរព និងប្រាជ្ញាដើម្បីការពារបរិស្ថាននិងសង្គម។
សម្តេចប៉ាបក៏បានវាយតម្លៃខ្ពស់លើកិច្ចការមេត្តាករុណាថា ជាសក្ខីភាពចំពោះអត្តសញ្ញាណនៃព្រះសហគមន៍កាតូលិក ហើយបានលើកទឹកចិត្តគ្រីស្តបរិស័ទ ឱ្យតស៊ូបំពេញបេសកកម្មបម្រើអ្នកដទៃរបស់ពួកគេ ជាពិសេសអ្នកដែលងាយរងគ្រោះបំផុត។
សម្តេចប៉ាបក៏បានអំពាវនាវដល់សមាជិកមូលនិធិ ឲ្យបន្តជំនឿចិត្តលើពួកគេ ដែលកំពុងផ្តល់សេចក្តីស្រឡាញ់របស់ព្រះជាម្ចាស់ ដោយដឹកនាំប្រវត្តិសាស្ត្រដោយសេចក្តីស្រឡាញ់ និងអំពាវនាវឱ្យកសាងអនាគតដែលមានឫសគល់នៅក្នុងយុត្តិធម៌ ហើយលើកទឹកចិត្តពួកគេឱ្យបន្តការងារល្អរបស់ពួកគេ ដែលសាបព្រោះអនាគត សុភមង្គល និងសន្តិភាព៕
Daily Program
