សម្តេចប៉ាបៈ កាតូលិកនៅឥណ្ឌូនេស៊ីតែ៣ភាគរយទេ តែស្មើនឹងជាង៨លាននាក់

សម្តេច​ប៉ាប ហ្វ្រង់ស៊ីស្កូបានកត់សំគាល់និងវាយតម្លៃខ្ពស់អំពីកិច្ចការនិងការប្រកាសដំណឹងល្អរបស់ព្រះសហគមន៍កាតូលិកនៅក្នុងប្រទេសឥណ្ឌូនេស៊ី ។

វ៉ាទីកង់ញូវបានរាយការណ៍ថា នៅក្នុងពេលដែលទ្រង់ជួបសាវនាការជាមួយនឹងលោកបូជាចារ្យ នៃក្រុមសាសនទូតជេស្វីត នៅ​ប្រទេស​ឥណ្ឌូនេស៊ីកាលពីថ្ងៃទី ០៤ ខែកញ្ញា សម្តេចប៉ាបបានមានបន្ទូលថា ព្រះសហគមន៍កាតូលិកតូច តែមានគ្រិស្តបរិស័ទច្រើន ។

សម្តេចប៉ាបបានមានបន្ទូលថា នៅប្រទេសឥណ្ឌូណេស៊ី កាតូលិកយើងមានតែ ៣ភាគរយទេ ប៉ុន្តែទោះបីជាយ៉ាងណាក៏ដោយ យើងមានគ្រិស្តបរិស័ទសរុបដល់ទៅចំនួនជាង ៩ លានកាតូលិក ។

សម្តេចប៉ាបក៏បានលើកទឹកចិត្តនឹងជំរុញឲ្យបងប្អូនគ្រិស្តបរិស័ទ ត្រូវរួមគ្នាសហការនិងលើកកំពស់ចំណងភាតរភាព​ជាមួយនឹងសាសនាដ៏ទៃ ដើម្បីធានាសុខដុមនីយកម្មសង្គម ។

នាឱកាសនោះ សម្តេចប៉ាបក៏បានចំណាយពេលប្រមាណជា ១ ម៉ោងនៅក្នុងជំនួបជាលក្ខណៈឯកជនដោយមានការសួរសំនួរនិងផ្តល់ចម្លើយពិភាក្សាទៅវិញទៅមក លើបញ្ហានានា ជាច្រើន ផងដែរ ។