សម្តេចប៉ាប ហ្វ្រង់ស៊ីស្កូ កាលពីចុងសប្តាហ៍មុន បានអធិដ្ឋានដល់អ្នករងគ្រោះដោយយន្តហោះ និងឧទ្ធម្ភាគចក្រប៉ះគ្នា។ នេះបើតាមសេចក្តីរាយការណ៍ដោយវ៉ាទីកង់ញូវ។
ហេតុការណ៍នេះបានកើតមានឡើងរវាងយន្តហោះដឹកអ្នកដំណើរនៃក្រុមហ៊ុនអាកាសចរណ៍អាមេរិក និងឧទ្ធម្ភាគចក្រយោធាបានបុកគ្នានៅកណ្តាលអាកាសក្បែរអាកាសយានដ្ឋានជាតិ រ៉ូណាល់ រីហ្គេន។
មនុស្ស ៦៤នាក់នៅលើយន្តហោះ និង ៣ នាក់នៅលើឧទ្ធម្ភាគចក្រ ត្រូវបានគេជឿថា បានបាត់បង់ជីវិតទាំងអស់ ។
នៅក្នុងសារទូរលេខមួយផ្ញើទៅកាន់ប្រធានាធិបតី ដូណាល់ ត្រាំ សម្តេចប៉ាបបានបន្ទូលថា ទ្រង់សូមអធិដ្ឋានជូនដល់អស់ជនរងគ្រោះទំាងអស់ ហើយក៏ចូលរួមរំលែកទុក្ខជាមួយនឹងក្រុមគ្រួសារជនរងគ្រោះទាំងអស់ដែលឥឡូវនេះកំពុងកាន់ទុក្ខចំពោះការបាត់បង់មនុស្សជាទីស្រឡាញ់របស់ពួកគេ។
សម្តេចប៉ាបក៏បានបញ្ជាក់ដែរថា ទ្រង់កំពុងអធិស្ឋានសម្រាប់អ្នករង់ចាំដំណឹង នឹងការប្រឹងប្រែងសង្គ្រោះ និងអំពាវនាវដល់មនុស្សទាំងអស់ក្នុងប្រទេសចូលរួមរំលែកទុក្ខចំពោះហេតុការណ៍នេះ។
អ្នកដំណើរនៅលើជើងហោះហើរនេះ រួមមានសមាជិកក្រុមកីឡាករ ជិះស្គីលើទឹកកក ក្រុមគ្រួសារ និងគ្រូបង្វឹកដែលត្រឡប់មកពីព្រឹត្តិការណ៍នៃការប្រកួតនៅទីក្រុង វីឆីតា ( Wichita) រដ្ឋ ខាន់សាស ( Kansas) រួមទាំងអតីតជើងឯកពិភពលោកដែលមានដើមកំណើតរុស្ស៊ីពីរនាក់ផងដែរ។
ក្រុមអ្នកសង្គ្រោះបន្ទាន់បានធ្វើការពេញទំហឹង ហើយបានរាយការណ៍ថា ក្រុមអ្នកមុជទឹកបានរកឃើញឧបករណ៍ថតទិន្នន័យមួយក្នុងចំណោមឧបករណ៍ថតចម្លងពីរ ដែលហៅថាប្រអប់ខ្មៅចេញពីយន្តហោះ។
ការបុកគ្នានៅកណ្តាលអាកាសបានកើតឡើង ខណៈយន្តហោះដឹកអ្នកដំណើរដែលហោះចេញពី ទីក្រុង វីឆីតា កំពុងរៀបចំចុះចតនៅអាកាសយានដ្ឋាន រ៉ូណាល់ រីហ្គេន៕
Daily Program
