សម្តេចប៉ាបអធិដ្ឋានជូនជនរងគ្រោះដែលត្រូវបាញ់ប្រហារនៅសាលារៀនក្នុងប្រទេសស៊ុយអែត

បន្ទាប់ពីទទួលព័ត៌មានអំពីការបាញ់ប្រហារដ៏ធំមួយដែលបានសម្លាប់មនុស្សយ៉ាងហោចណាស់ ១០ នាក់នៅសាលារៀនមួយក្នុងប្រទេសស៊ុយអែតកាលពីថ្ងៃអង្គារ សម្តេចប៉ាបហ្រ្វង់ស៊ីស្កូ បង្ហាញការសោកសង្រេង និង បានអធិដ្ឋានជូនជនរងគ្រោះទាំងអស់។

ពាក់ព័ន្ធនឹងព្រឹត្តិការណ៍នេះ វ៉ាទីកង់ញូវបានរាយការណ៍ថា លោកកាឌីណាល់ ព្យែត្រូ ផារ៉ូលីន នាយករដ្ឋមន្រ្តីនៃសន្តអាសនៈបានផ្ញើសារជូនសមភាគីរបស់លោក នៅក្នុងនាមសម្តេច​ប៉ាប ដោយរួមរំលែកទុក្ខដ៏ក្រៀមក្រំនេះ។

នៅក្នុងទូរសារផ្ញើជូន នាយក​រដ្ឋមន្ត្រី​ស៊ុយអែត​លោក អ៊ុលហ្វ គ្រីស្តេសុន ( Ulf Kristersson ) លោកកាឌីណាល់ នៅក្នុងនាមសម្តេចប៉ាបបានថ្លែងរំលែកទុក្ខ ចំពោះ​សោកនាដកម្ម​ដែលបានកើតមានឡើងដ៏រន្ធត់នេះ។

លោកកាឌីណាល់ បានលើកឡើងថា ហេតុការណ៍ដែលសម្លាប់ជីវិតមនុស្សយ៉ាងហោចណាស់ ១០ នាក់ នៅក្នុងទីក្រុង អូរីប្រូ (Örebro ) នៅកណ្តាលប្រទេសស៊ុយអែត គឺជាឧប្បត្តិហេតុដ៏តក់ស្លុតបំផុត។

លោកអធិដ្ឋានអង្វរ​ព្រះជាម្ចាស់​ សុំឲ្យវិញ្ញាណក្ខន្ធអ្នកបាត់បង់ជីវិត​ទៅកាន់ស្ថានបរមសុខ និង​​រំលែកទុក្ខដល់ក្រុមគ្រួសារ និងមិត្តភក្តិដែលកំពុងសោកសៅ ហើយសម្រាប់អ្នករបួសគឺសូមឲ្យឆាប់ជាសះស្បើយ។

ជាចុងក្រោយ លោក​បានរំលឹកឡើងវិញថា ក្នុងគ្រាដ៏លំបាកនេះ សម្រាប់ប្រទេសជាតិ សម្តេចប៉ាបសូមអំពាវនាវដល់ប្រជាជនស៊ុយអែតអធិដ្ឋានហើយរិះគិតអំពីទុក្ខវេទនានៃអំពើហិង្សា។​

មកដល់ពេលនេះខ្មាន់កាំភ្លើងដែលបង្កហេតុត្រូវបានគេជឿជាក់ថា គឺជាម្នាក់នៅក្នុងចំណោមនុស្សដែលបានស្លាប់ទាំង១០ នាក់នេះ៕​