សម្តេចប៉ាបឡេអូ យាងជួបជាមួយអភិបាលរដ្ឋកំណើតរបស់ទ្រង់

សម្តេចប៉ាបឡេអូទី១៤ បានយាងទទួលជួបជាមួយអភិបាលរដ្ឋ អ៊ីលីណ័រ (Illinois) ដែលជាស្រុកកំណើតរបស់ទ្រង់ គឺលោក ជេប៊ី ព្រីស្គ័រ ( JB Pritzker ) កាលពីថ្ងៃពុធ នៅឯបុរីវ៉ាទីកង់ រួមជាមួយនឹងភរិយា គឺលោកស្រី អ៊ឹមខេ ព្រីស្គ័រ (MK Pritzker)។

លោក ព្រីស្គ័រ បានចែករំលែកតាមបណ្តាញសង្គមបន្ទាប់ពីជំនួបសាវនាការថា "វាជាកិត្តិយសសម្រាប់ខ្ញុំ និងភរិយា ដែលបានជួបជាមួយសម្តេចប៉ាប ដែលជាប្រុត្រានៅរដ្ឋ អ៊ីលីណ័រ ដើម្បីបង្ហាញពីមោទកភាព និងការគោរពរបស់ប្រជាជននៃរដ្ឋដ៏អស្ចារ្យនេះ"។

ជាមួយគ្នានោះ សេចក្តីថ្លែងការណ៍មួយបានត្រូវធ្វើឡើង​ដោយបញ្ជាក់ថា ក្នុងនាមជាសម្តេចប៉ាបដែលយាងមកពីសហរដ្ឋអាមេរិកដំបូងគេ និង ជាអ្នកស្រុកដើមនៅអ៊ីលីណ័រ និងជាអ្នកតស៊ូមតិសម្រាប់ជនក្រីក្រ សម្តេចប៉ាបឡេអូ គឺទ្រង់តំណាងអោយ ក្តីសង្ឃឹម សាមគ្គីភាព ការអាណិតអាសូរ និងសន្តិភាពនៅអ៊ីលីណ័រ និងទូទាំងពិភពលោក។

នៅក្នុង​ឱកាសនោះ លោកអភិបាលរដ្ឋនោះបានគោរពយាងសម្តេចប៉ាបឡេអូមកបំពេញទស្សនកិច្ចនៅឈីកាហ្គោ ដោយសង្កត់ធ្ងន់ថា ទ្រង់ក៏មានសុទិដ្ឋិនិយមថា ទ្រង់នឹងយាងមកទីក្រុងនេះ៕