សម្តេចប៉ាបឡេអូទី១៤សម្រេចបន្តប្រើប្រាស់ គណនីប្រព័ន្ធផ្សព្វផ្សាយសង្គមអតីតសម្តេចប៉ាប

សម្តេចប៉ាប ឡេអូទី ១៤ បានប្រកាសបន្តប្រើប្រាស់គណនីប្រព័ន្ធផ្សព្វផ្សាយសង្គមអតីតសម្តេចប៉ាប បន្ទាប់ពីបណ្តាញនេះត្រូវបានបង្កើតឡើងតាំងពីជំនាន់សម្តេចប៉ាបបេណេឌិកទី​១៦ និង សម្តេចប៉ាបហ្រ្វង់ស៊ីស្កូមក។

វ៉ាទីកង់ញូវបានរាយការណ៍ថា រាល់គណនីនៅលើបណ្តាញសង្គម X  និង Instagram គឺនៅរក្សាគណនីដដែល​ទាំងអស់។

ប្រភពដដែលបានបន្តថា ខ្លឹមសារដំបូងដែលទ្រង់បានបង្ហោះនោះគឺពាក់ព័ន្ធនឹងសកម្មភាពនៅពេលដែលទ្រង់ត្រូវបានជ្រើសរើសជាសម្តេចប៉ាបតាំងពីថ្ងៃទី ០៨ ខែឧសភា ឆ្នាំ ២០២៥មក។

ដោយឡែកសំណេរដែលទ្រង់បានសរសេរនៅលើបណ្តាញសង្គមនេះ គឺថា  «សូមសេចក្តីសុខសាន្ត​នៅ​ជាមួយ​អ្នករាល់គ្នា​​ នេះជាពាក្យជំរាបសួរដំបូងដែលនិយាយដោយព្រះគ្រីស្តនៅក្នុងនាមជាអ្នកគង្វាលដ៏ល្អ។ ខ្ញុំចង់ឱ្យការស្វាគមន៍នេះដក់ជាប់ក្នុងចិត្តបងប្អូន​ ក្នុងគ្រួសាររបស់បងប្អូន​ និងក្នុងចំណោមមនុស្សទាំងអស់ មិនថាពួកគេនៅទីណា គ្រប់ជាតិសាសន៍ និងទូទាំងពិភពលោក។»

មកដល់ពេលនេះ គណនី @Pontifex ផ្លូវការនៅលើ X មានអ្នកតាមដានសរុបចំនួន ៥២ លាននាក់នៅទូទាំង ៩ ភាសា ដោយឡែកនៅលើ Instagram គណនីថ្មីរបស់ទ្រង់​នឹងមានឈ្មោះ @Pontifex – Pope Leo XIV ដែលនឹងក្លាយជាគណនីរបស់​សម្តេចប៉ាប​ផ្ទាល់​ជា​ផ្លូវការតែមួយគត់នៅលើវេទិកាគ្រប់គ្រងដោយ Meta  ហើយគណនី @Franciscus របស់ សម្តេចប៉ាបហ្រ្វង់ស៊ីស្កូនឹង​នៅ​តែ​អាច​ចូល​ប្រើ​បាន​ជា​បណ្ណសារ​មួយ៕