សម្តេចប៉ាបលើកទឹកចិត្តឲ្យមានការសន្ទនាក្នុងគ្រួសារ ដើម្បីបន្សាយការយល់ច្រឡំ

ក្នុង​សារ​វីដេអូ​ខ្លីមួយ សម្តេច​ប៉ាប ហ្វ្រង់ស៊ីស្កូ បាន​សង្កត់​ធ្ងន់​អំពី​ភាព​ស៊ីសង្វាក់​គ្នា​ក្នុង​គ្រួសារ ដោយ​បញ្ជាក់​ថា «គ្រួសារ​ដែល​មិន​សន្ទនា​គ្នា​គឺ​ជា​គ្រួសារ​ដែល​ស្លាប់»។

វ៉ាទីកង់ញូវបានរាយការណ៍ថា នៅក្នុងសារជាវីដេអូខ្លីដែលមានរយៈពេលត្រឹមតែ ២៨ វិនាទី ដែលបានចេញកាលពីថ្ងៃសុក្រសប្តាយ៍មុន សម្តេចប៉ាប បានបញ្ជាក់សារជាថ្មីអំពីតម្លៃដែលជាចំណុចកណ្តាលទំនាក់ទំនងគ្រួសារ ។

សម្តេចប៉ាបបានមានបន្ទូលថា នៅក្នុងគ្រួសារការសន្ទនាគ្នាមានសារៈសំខាន់ណាស់ វាគឺជាធាតុផ្សំដ៏ សំខាន់សម្រាប់ធានាភាពគងវង្សនៃចំណងជីវិតគ្រួសារដែលមានសុខភាពល្អ។

សម្តេចប៉ាបមានបន្ទូលទៀតថា នៅពេលដែលមានការខ្វែងគំនិតគ្នាកើតមានឡើងគឺមានតែកិច្ចសន្ទនាគ្នា ទេដែលអាចបញ្ចប់ចំណុចខ្វះខាតនានា ហើយអាចនឹងកសាងភាពស៊ីសង្វាក់គ្នាក្នុងគ្រួសារឡើងវិញ ។

សម្តេចប៉ាប​បានមានបន្ទូលថា ពេល​ខ្លះ​មាន​ជម្លោះ​បន្តិច​បន្តួច ប៉ុន្តែ​នៅពេលដែលខ្វះ​ការ​សន្ទនាគ្នា វាក៏អាចក្លាយជាបញ្ហាធំក៏ថាបាន ។ ទ្រង់បានមានបន្ទូលថា ការមិននិយាយគ្នាឮជាជម្រើសគឺអាក្រក់ ហើយ ទំនាក់ទំនងក៏ងាយនឹងប្រេះស្រាំផងដែរ៕