សម្តេចប៉ាបរំលេចភាពចាំបាច់នៃសុខដុមរមនាក្នុងសង្គមក្នុងយុគសម័យឌីជីថល

ក្រៅពីសរសើរអំពីសមិទ្ធផលដ៏សំបូរបែបរបស់សិង្ហបុរី នៅក្នុងអំឡុងពេលស្នាក់នៅសិង្ហបុរីនាថ្ងៃទី២នេះ សម្តេចប៉ាបក៏បានរំលេចពីភាពចាំបាច់នៅក្នុងការរក្សាសុខដុមរមនាក្នុងសង្គមនាយុគសម័យឌីជីថលផងដែរ​។​

វ៉ាទីកង់ញូវបានរាយការណ៍ថា សម្តេចប៉ាបបានចំណាយពេលខ្លះធ្វើការ គូសបញ្ជាក់អំពីសារៈសំខាន់នៃការចិញ្ចឹមបីបាច់ទំនាក់ទំនងរបស់មនុស្សពិតប្រាកដ ជាពិសេសនៅក្នុងយុគសម័យឌីជីថល។

សម្តេចប៉ាប​បាន​ជំរុញ​ប្រជាជន​សិង្ហ​បុរី​ឱ្យ​ប្រើប្រាស់​ការ​ជឿនលឿន​ផ្នែក​បច្ចេកវិទ្យា​ដើម្បី «​លើក​កម្ពស់​ការ​យោគយល់ និង​សាមគ្គីភាព​» ជាជាង​ដាក់​បុគ្គល​ឱ្យ​នៅ​ដាច់​ពីគេ​ក្នុង​ពិភពនៃ«ទស្សនៈ ​អរូបី​»​។

សម្តេចប៉ាបក៏បានសង្កត់ធ្ងន់លើការរួមរស់ជាមួយគ្នា ក្នុង"សុខដុមរមនា" របស់សង្គមតែមួយរួមគ្នា ដោយមានបន្ទូលថា ការដាក់បញ្ចូលនេះគឺ ជាការសម្របសម្រួលដោយភាពមិនលំអៀងនៃអាជ្ញាធរសាធារណៈដែលចូលរួមក្នុងការសន្ទនាក្នុងន័យស្ថាបនាជាមួយទាំងអស់គ្នា ដោយធានាថាបុគ្គលគ្រប់រូបអាចរួមចំណែកដល់ផលប្រយោជន៍រួម។

សម្តេចប៉ាបបានបន្តទៀតថា ការគោរពគ្នាទៅវិញទៅមក ការសន្ទនា និងកិច្ចសហប្រតិបត្តិការនេះ គឺមានសារៈសំខាន់ក្នុង “ការជៀសវាងជម្លោះ និងភាពវឹកវរ” ហើយ ធានាថា ការអភិវឌ្ឍន៍នៅតែមានតុល្យភាព និងនិរន្តរភាព។

សម្តេចប៉ាប ក៏បានថ្លែងអំណរគុណដល់ប្រទេសសិង្ហបុរីសម្រាប់ការប្តេជ្ញាចិត្តរបស់ខ្លួនចំពោះការរក្សានិរន្តរភាពបរិស្ថាន ដោយទទួលស្គាល់រដ្ឋនេះថា ជាឧទាហរណ៍មួយអំពីរបៀបដែល ប្រទេសតូចៗអាចមានផលប៉ះពាល់យ៉ាងសំខាន់ក្នុងការប្រយុទ្ធប្រឆាំងនឹងវិបត្តិបរិស្ថាន។

សម្តេចប៉ាបក៏បានអំពាវនាវឱ្យសិង្ហបុរីបន្តការស្វែងរក ដំណោះស្រាយប្រកបដោយភាពច្នៃប្រឌិតដើម្បីដោះស្រាយបញ្ហាប្រឈមបរិស្ថាន" និងបានរំលឹកពួកគេថាការខិតខំប្រឹងប្រែងរបស់ពួកគេអាចជំរុញឱ្យប្រទេសផ្សេងទៀតធ្វើដូចគ្នា។