សម្តេចប៉ាបរំលឹកដល់កុមាររងគ្រោះដោយសារសង្រ្គាម ​

វ៉ាទីកង់ញូវបានរាយការណ៍ថា នៅថ្ងៃ រំលឹកខួបលើកទី ៧៥ នៃអនុសញ្ញាទីក្រុងហ្សឺណែវស្តីអំពីកុមារ ដែលនឹងត្រូវប្រារព្ធនៅសប្តាហ៍នេះ សម្តេចប៉ាបហ្រ្វង់ស៊ីស្កូបាន​រំលឹក​ដល់​កុមារ​រងគ្រោះ​ក្នុង​សង្រ្គាម ហើយអធិស្ឋាន​យ៉ាង​ខ្នះខ្នែង​ដើម្បី​សន្តិភាព​ពិភពលោក។ ​

សម្តេចប៉ាបបានបន្តរំលឹកនិងរក្សាការ​ចងចាំអំពី​កុមារ​ដែល​ជា​ជនរងគ្រោះ​ដោយ​សង្រ្គាម​សព្វថ្ងៃ ហើយបាន អំពាវនាវជាថ្មីសុំឲ្យគ្រិស្តបរិស័ទអធិដ្ឋាននិង​បួងសួង​សុំ​សន្តិភាព និង​បញ្ចប់​ការ​កើនឡើង​នៃ​អំពើ​ហិង្សា​នៅ​អ៊ុយក្រែន ប៉ាឡេស្ទីន អ៊ីស្រាអែល លីបង់។ ​

មានបន្ទូលទៅកាន់គ្រីស្តបរិស័ទដែលបានប្រមូលផ្តុំនៅទីលានសន្តសិលាកាលពីថ្ងៃអាទិត្យ សម្តេចប៉ាបបានអធិស្ឋានថា ការកើនឡើងនៃអំពើហិង្សាអាចបញ្ឈប់ ហើយការគោរពចំពោះភាពពិសិដ្ឋនៃជីវិតមនុ​ស្សក្លាយជាអាទិភាពកំពូល។​

សម្តេចប៉ាបបានចង្អុលបង្ហាញថា ជារៀងរាល់ថ្ងៃ យើងឃើញថា ការវាយប្រហារដំបូងគឺប្រជាជនស៊ីវិល ជនរងគ្រោះស្លូតត្រង់ជាច្រើន ដូចដែលបានឃើញនៅក្នុងរូបភាពដ៏គួរឱ្យភ័យខ្លាចនៃកុមារដែលត្រូវបា​នសម្លាប់ជារៀងរាល់ថ្ងៃ។​

ព្រះវបិតាដ៏វិសុទ្ធ បានសម្តែងក្តីសង្ឃឹមថា មនសិកាសង្គមគួរតែត្រូវដាស់ ដើម្បីឲ្យក្នុងអំឡុងពេលមានជម្លោះប្រដាប់អាវុធ ជីវិត សេចក្តីថ្លៃថ្នូររបស់មនុស្ស និងប្រជាជន ក៏ដូចជាសុចរិតភាពនៃសង្គមស៊ីវិល និងទីកន្លែងគោរពបូជាត្រូវបានគោរពស្របតាមច្បាប់មនុស្សធម៌អន្តរជាតិ។ ​

សម្តេចប៉ាបបាន​កត់​សម្គាល់​ថា វា​ជា​ការ​សោកស្ដាយ​ដែល​ឃើញ​មន្ទីរពេទ្យ និង​សាលារៀន​ត្រូវ​បាន​បំផ្លាញ​ក្នុង​សង្គ្រាម៕