សម្តេចប៉ាបបានអធិដ្ឋានិងអំពាវនាវមេដឹកនាំ​ពិភពលោកឈប់ប្រើប្រាស់អាវុធ

សម្តេចប៉ាបហ្រ្វង់ស៊ីស្កូបានបញ្ជាក់សារជាថ្មីអំពីការអំពាវនាវរបស់ទ្រង់សម្រាប់ដំណោះស្រាយសម្រុះ​សម្រួលចំពោះសង្គ្រាមដែលកំពុងបង្កើតនូវសេចក្តីទុក្ខលំបាកនានាលើភពផែនដី ហើយជំរុញឱ្យគ្រប់គ្នា ចូលរួមចំណែកក្នុងការលើកកំពស់ការប្រើប្រាស់ការសន្ទនាជំនួសការប្រើប្រាស់អាវុធ។

កាលពីថ្ងៃអាទិត្យថ្មីៗនេះសម្តេច​ប៉ាបបានមានបន្ទូលថា ប្រសិនបើគ្រប​ភាគីនៃ​ជម្លោះ​ជុំវិញ​ពិភពលោក​ចូលរួម​ក្នុង​ការ​សន្ទនា និង​បញ្ចប់​ជម្លោះវាគឺជារឿងដ៏ប្រសើរបំផុតសម្រាប់មនុស្សជាតិ។

សម្តេចប៉ាបបានមានបន្ទូលថា ​សង្គ្រាម​ជា​ឧបករណ៍​នៃ​បទល្មើស​ប្រឆាំង​នឹង​សេរីភាព​របស់​ប្រជាជន​ រីឯការ សន្ទនា​ជា​មធ្យោបាយ​សម្រាប់​ដោះស្រាយ​ជម្លោះ​អន្តរជាតិ​​។

សម្តេចប៉ាបបានមានបន្ទូលថា សូមឱ្យគោលការណ៍នេះត្រូវបានអនុវត្តនៅទូទាំងពិភពលោក ពីព្រោះវាគឺជាគោលការណ៍អាចឲ្យសង្រ្គាមឈានទៅបញ្ចប់ ហើយបញ្ហាត្រូវបានដោះស្រាយតាមរយៈច្បាប់ និងការចរចា។

សម្តេចប៉ាបបានមានបន្ទូលទៀតថា ប្រសិនបើ​អាវុធត្រូវបានរក្សាទុកឲ្យ​​ស្ងៀមស្ងាត់ ហើយ​ទុក​ឲ្យ​ការ​សន្ទនា​ចូល​មក​ជំនួស​វិញនោះ វាពិតជាល្អបំផុតសម្រាប់ភពផែនដី។ ​សូម​ឲ្យ​សង្គ្រាម​ត្រូវបាន​ហាមឃាត់ ហើយ​បញ្ហា​ត្រូវបាន​ដោះស្រាយ​តាមរយៈ​ច្បាប់ និង​ការចរចា​។

ដូចរាល់ដង សម្តេចប៉ាបបានសុំឱ្យគ្រិស្តបរិស័ទ ទាំងអស់ចូលរួមនៅក្នុងការអធិស្ឋានសម្រាប់ ប្រទេសអ៊ុយក្រែនដែលកំពុងរងទុក្ខវេទនា ប៉ាឡេស្ទីន អ៊ីស្រាអែល មីយ៉ាន់ម៉ា ស៊ូដង់ខាងត្បូង៕