សម្តេចប៉ាបបង្ហាញស្មារតីសាមគ្គីភាពជាមួយជនរងគ្រោះដោយគ្រោះរញ្ជួយដីនៅឥណ្ឌូនេស៊ី

សម្តេចប៉ាប លេអូ ទី១៤ បានបង្ហាញនូវស្មារតីសាមគ្គីភាពជាមួយជនរងគ្រោះដោយសារការរញ្ជួយដីកម្រិត ៧,៧រ៉ិចទ័រ ដែលបានវាយប្រហារខេត្តនូសា តេនហ្គារ៉ាខាងកើត (East Nusa Tenggara) នៃប្រទេសឥណ្ឌូនេស៊ី កាលពីថ្ងៃទី១៥ ខែសីហា ដោយបានសម្លាប់មនុស្សរាប់សិបនាក់ និងធ្វើឱ្យមនុស្សរាប់ពាន់នាក់ត្រូវផ្លាស់ទីលំនៅ។

នៅក្នុងទូរលេខផ្ញើទៅកាន់អគ្គអភិបាល ប៉ូលុស ប៊ូឌី ក្លេដេន (Paulus Budi Kleden) នៃភូមិភាគអេនឌី (Ende) សម្តេចប៉ាប លេអូ បានមានបន្ទូលថា ទ្រង់មានការសោកសៅយ៉ាងខ្លាំងចំពោះការបំផ្លិចបំផ្លាញដែលបង្កឡើងដោយគ្រោះរញ្ជួយដីនេះ។ យោងតាមសារព័ត៌មានវ៉ាទីកង់ញូវ (Vatican News) ចំនួនអ្នកស្លាប់បណ្តោះអាសន្នបានឡើងដល់ ៥៣នាក់ អ្នករបួសមាន ១៣៥នាក់ និងប្រហែល ១៣.០០០នាក់ ត្រូវបានផ្លាស់ទីលំនៅ។

នៅក្នុងគ្រោះមហន្តរាយនេះ សម្តេចប៉ាប លេអូ ក៏បានលើកទឹកចិត្តដល់អាជ្ញាធរ ព្រះវិហារ និងអង្គការសង្គមស៊ីវិលនៅក្នុងប្រទេសឱ្យបន្តកិច្ចខិតខំប្រឹងប្រែងផ្តល់ជំនួយមនុស្សធម៌ និងការស្តារសហគមន៍រងគ្រោះឡើងវិញ។ ព្រះអង្គក៏បានអធិស្ឋានសម្រាប់បុគ្គលិកសង្គ្រោះបន្ទាន់ ដែលកំពុងបំពេញការងារជួយដល់អ្នករស់រានមានជីវិត និងស្តារសហគមន៍ដែលរងផលប៉ះពាល់ឡើងវិញផងដែរ។

សម្តេចប៉ាប លេអូ បានចែករំលែក និងសម្តែងនូវមរណទុក្ខជូនគ្រួសារជនរងគ្រោះ ព្រមទាំងទូលអង្វរព្រះជាម្ចាស់ឱ្យមេត្តាជួយមើលឃើញពីទុក្ខលំបាករបស់សហគមន៍រងគ្រោះ។ ការរញ្ជួយដីនេះបានវាយប្រហារកោះផ្លរ៉េស (Flores) ដែលជាកោះមួយមានប្រជាជនភាគច្រើនកាន់សាសនាគ្រឹស្តកាតូលិក នៅភាគខាងកើតប្រទេសឥណ្ឌូនេស៊ី។

ក្រៅពីអ្នកស្លាប់ និងរបួស គ្រោះធម្មជាតិនេះបានបំផ្លាញលំនៅឋានជាង ៩០០ខ្នង និងប្រហែល ៤៥០ខ្នងផ្សេងទៀតត្រូវបានខូចខាត។ នៅក្នុងនោះ អគារសាធារណៈយ៉ាងហោចណាស់ចំនួន ១៦៧កន្លែង រួមទាំងសាលារៀន មណ្ឌលថែទាំសុខភាព និងព្រះវិហារ ត្រូវបានគេរាយការណ៍ថា មិនអាចប្រើប្រាស់បានឡើយ។